April—Iciindi Cakulyaaba Kumana Milimo Mibotu!
1 Ciindi iguwo ipati amvwula yaajuzya kacembele nolisika afwaafwi abusena bumwi bukkede bantu, kulayandika cakufwambaana ikubacenjezya zyantenda iilangilwa kubacitikila. Mboliyaabusika afwaafwi iguwo pati eeli, akwalo kucenjezya kweelede kukankaizigwa. Nkaambo nzi? Nkaambo kakuti bantu bali muntenda! Ibamwi ambweni tiibakakumvwa kucenjezya kwakusaanguna. Ibamwi balakonzya kuti bakamvwa pele bakaungizya kucenjezya ooku. Ncimwi buyo amulimo wakucenjezya ngotwakapegwaa Leza kuti tuucite ‘kalitanainda iguwo’ lyabukali bwa Leza bululeme lyakugwisya zibi zyoonse ziliko munyika ino. (Tus. 10:25) Icoolwe cakubaa buumi butamani cazyuulu zyatuulunzuma twabantu cili muntenda! Aboobo tweelede kubacenjezya. Tweelede ‘kulyaaba kumana milimo mibotu.’—Taitasi 2:11-14, BT.
2 Kwamakumi aamyaka aali mbwaabede aainda, ibantu ba Jehova bali kulyaaba ikumana milimo cabusungu kapati ciindi ca Ciibalusyo. Kumatalikilo aamwaka wa 1939, Informant, mbuwakali kwiitwa Mulimo Wesu Wabwami kaindi, yakali amajwi aaya aakulwaizya: “Mbwaanga cilimo cili afwaafwi nobuca kabotu, tulangila kuti maola amumuunda aabasikumwaya [mumbungano] ayooyungizigwa ziindi zyobilo alimwi akuti bapainiya bayoociyungizya kapati ciindi cabo. Mwezi wa April ulaa Nsondo zili musanu. Alimwi ulaa mazuba aamu Mujibelo ali musanu. Mazuba aamu Mujibelo amu Nsondo mumwezi wa April aabe . . . ciindi cilibedelede cakukambauka.” Eeyo yakali mbaakani iikulwaizya kapati yakabikkilidwe bakwesu myaka iili 60 yainda! Mbubwena buyo mbuli mu 1939, imwaka uno mwezi wa April ujisi nsondo zikkwene izili musanu. Ino mujisi makanze nzi mwezi uno? Sena kuli zyakucita nzimwakalembaa kkalenda yanu yamu April 2000? Amulibambile kuyootola lubazu luzwide mumilimo mibotu mumwezi ooyu uulibedelede wakusungwaalila kuyungizya milimo yakumuuya antoomwe abantu ba Jehova boonse.
3 Ncotulombozya Kuyoozuzikizya: Buzuba buyandika kapati mumwaka wa 2000 buyooba mumwezi nguwena uno. Ibuzuba bwakwiibaluka lufwu lwa Jesu bunooli mu April 19. Atusoleke canguzu ikutamba bantu banji mbuli mbotukonzya ku Ciibalusyo. Mbuli mbukwakaambwa mwezi wamana, amulembe mazina abaabo boonse ibalangilwa kuyoojanika ku Ciibalusyo akubona kuti boonse mwabayeekezya. Kuli baabo mbomutamba amubikkilizye abasikumwaya bali boonse ibatacuunki mumulimo, mbomwiiya limwi Bbaibbele, nkomucita nyendo zyakupilukila, aabo ibakali kwiiya Bbaibbele kaindi, mbomubeleka limwi kumilimo, mbomwiiya limwi kucikolo, basimukobonyoko, basazinyoko alimwi abamwi buyo mbomuzyibene limwi. Sena aabo bayanda kuzoojanika balijisi zyakweendela? Ikuti kabatajisi, sena mulakonzya kubagwasya? Mangolezya aabuzuba bwa Ciibalusyo ayootupa ciindi cibotu toonse cakubasamausya aabo ibayoojanika kuti bazyibe kuti twabatambula a maanza obilo. Caakumana Ciibalusyo, tulakonzya kupilukila kuli baabo ibayanda akubagwasya munzila yakumuuya.
4 ‘Ikulyaaba kumana milimo mibotu’ kacitana alimwi anocainda Ciibalusyo njenzila mbotu yakutondezya Jehova kuti tulamulumba kapati kuzintu zyoonse nzyatucitila. Akaambo kakuti kunooca kabotu ciindi eeci, ibunji bwesu tuyoocikonzya kusoleka kuyungizya milimo yesu mumulimo wakukambauka. Ikuti kamucita bupainiya bwakugwasilizya muyooyanda kubeleka kusikila mpomukonzya ikutegwa musisye mawoola aali 50 naa kwiindaawo mumulimo. (Mt. 5:37) Amuutobelesye mulongo wazyakucita ngomwakabamba kumatalikilo aamwezi. (Muk. 3:1; 1 Kor. 14:40) Swebo tobamwi toonse atubagwasilizye bapainiya boonse kwiinda mukubakulwaizya alimwi akubeleka ambabo mumuunda. (Amweezyanisye 2 Bami 10:15, 16.) Ikuti naa twasyanga mumwezi wa April, tulakonzya kulangila kuyookkomana kapati alulongezyo lwa Jehova. (Malk. 3:10) Ambweni aaya ayooba ngamatalikilo aakuzumanana abupainiya bwakugwasilizya naa bupainiya bwaciindi coonse. Ikuyaambele munzila yakumuuya nkotuyoobaankuko mu April, atukazumanane ankuko amumyezi iboola kumbele katuli basikumwaya ba Bwami lyoonse.
5 Cakutadooneka, zyuulu-zyuulu zyabantu ba Jehova bayootalisya ziiyo zya Bbaibbele zyaaŋanda zinji mumwezi uno. Sena inga mwayanda kutalisya ciiyo comwe? Amukapailile kubaa ciiyo, mpoonya kamubeleka kweelana amipailo yanu. Mulakonzya kusinizya kuti Jehova uyooikkomanina akwiingula mipailo yanu njomupailila lugwasyo lwakujana muntu mubombe moyo kutegwa kamumuyiisya.—1 Joh. 3:22.
6 Ngooyu muzeezo iwakasolwa kale uubeleka mukutalisya mibandi. Mulatalika akubuzya kuti: “Sena muyeeya kuti bulwani buliko mumunzi muno, buli akaambo kamilimo yamadaimona naa nkaambo kabazyali batayiisyi kabotu bana babo?” Amulindile bwiinguzi. Ikuti naa muntu oyo waingula kuti nkaambo “kamilimo yamadaimona,” amubale Ciyubunuzyo 12:9, 12, mpoonya mumupandulwide lubazu ndwajisi Diabolosi mukwiindizya manyongwe munyika. Mpoonya amujalule broshuwa ya Ncayanda aciiyo 4 akumubuzya naa kuli naakalibuzyide kujatikizya nkwaakazwa Diabolosi. Amubale alimwi akubandika mincali yakusaanguna yobilo. Ikuti naa muntu wasala kuti nkaambo “kabazyali batayiisyi kabotu bana babo” ncokuli bulwani mumunzi, amubale 2 Timoteo 3:1-3 akumupandulwida tumpenda tupa kuti kube penzi eli. Mpoonya amujalule broshuwa ya Ncayanda aciiyo 8, akubala muncali wa 5 akuzumanana amubandi wanu. Ikuti mwamwaambila kuti muyoopilukila alimwi, nkokuti mwabamba kale nzila yakubaa ciiyo ca Bbaibbele cikkalikide amuntu ooyo. Mwaakupilukila, amukamubuzye ikuti naa kuli aumwi ngwazi uunga wakkomana kumvwa nzyali mukwiiya.
7 Nzila imwi motunga ‘twalyaaba kumana milimo mibotu’ mumwezi wa April nkwiinda mukutola lubazu mumbazu ziindene-inde zyakukambauka. Sena kuli nomwakayeeyede zyakuyoocita bukamboni mupaaki antela aawo aasiigwa myootokala? Acitisyini camabbaasi naa cacitima? Ambweni muyanda kusola bukamboni bwaaluwaile, bwamumugwagwa, naa bwamumasena mucitilwa makwebo? Nkaambo nzi ncomutazumanani amakanze aaya mumwezi uno? Jehova uyoomugwasya ikubaa basicamba bayandika. (Inc. 4:31; 1 Tes. 2:2b) Ambweni mulakonzya kubikka bubambe bwakuyoobeleka amupainiya naa sikumwaya uulaa luzibo mumbazu eezi zyamumulimo.
8 Oonse uuyanda kuyungizya milimo yakwe mumulimo wakucita bukamboni uyootola lubazu mubukamboni bwamukwiizya. Ciyandika nkutalisya mubandi mbuli kuti muli buyo mukwiizya. Kamwiile kuleta buyo kaambo kakondelezya, ambweni inga mwabelesya nzila yaambwa mumuncali wa 6. Amusole ikucibelesya kabotu ciindi nociceya buti calo calikunga caile kunyonyooka. Nkaambo nzi ncomutakonzyi kubelesya maminiti aali musanu, ikkumi, naa maminiti aali buyo 15 ikucita bukamboni bwamukwiizya mpoonya akwaalemba?
9 Ciindi Cakutelaika: Amwiibaluke twaambo tupati twakaambwa mucisobano camwaka wamana ku Muswaangano Wacooko wa “Ijwi lya Leza Lyabusinsimi.” Cisobano camutwe waamba kuti: Ikuyandisya Lukono Lwesu Lwakumuuya cakatugwasya kuyeeyesya ikwiindana kwakaliko akati ka Jakobo alimwi a Esau. Esau wakali kwaamba kuti wakaamba kuti mbubwena mbuli Jakobo awalo wakali kuziyanda zintu zyakumuuya, pele milimo ya Esau teeyakatondezya boobo pe. (Matl. 25:29-34) Nciiyo cipati kaka eci cakutucenjezya! Mbuli Jakobo, atulibambile ikubeleka canguzu, nokuba kuzilwanina buya zilongezyo zya Jehova. (Matl. 32:24-29) Nkaambo nzi ncotutakonzyi kubelesya mwezi wa April alimwi amyezi iboola kumbele ikubukulusya busungu bwesu ikutali kuubya-ubya lukono lwesu lubotu lwakumuuya?
10 “Buzuba bupati bwa-Jehova buli kufwaafwi, ncobeni buli kufwaafwi, bulafwambaana loko kusika.” (Zef. 1:14) Makani mabotu aa Bwami ayelede kwaambilizigwa. Ibantu bali muntenda! Tupaila kuti mwezi uno ube cilongezyo ikapati kubantu ba Jehova boonse notubeleka antoomwe kutondezya kuti ‘tulalyaaba kumana milimo mibotu.’
Kabbokesi kali apeeji 4]
Ziyeezyo zya Ciibalusyo
Iciibalusyo mwaka uno ciyoocitwa muli Bwatatu mu April 19. Baalu beelede kubikkila maanu kutwaambo otu tutobela:
◼ Mukusala ciindi camuswaangano, mukasinizye kuti zikozyanisyo taziinzyigwi pe kusikila mane zuba lyabbila.
◼ Boonse kubikkilizya a mwaambi, beelede kuzibisyigwa ciindi cini-cini alimwi abusena nkociyoocitilwa Ciibalusyo eci.
◼ Mweelede kujana musyobo wacinkwa alimwi awaini weelede akubona kuti zintu eezi nkozili.—Amubone Ngazi Yamulindizi yamu Chichewa yamu February 15, 1985, apeeji 17.
◼ Mitiba, nkapu zyamagilazi, atafwule lyeelede alimwi akasani kaatafwule zyeelede kuletwa kubusena oobo akuzibikka kabotu kakucili ciindi.
◼ Ŋanda ya Bwami naa busena buli boonse nkomuyooswaanganina bweelede kusalazigwa kabotu-kabotu kakucili ciindi.
◼ Mweelede kusalila limwi bagwasilizi abasikwiinzya zikozyanyo zyamulalilo akubalailila kabotu ncobeelede kucita alimwi ambobeelede kweenda kakucili ciindi.
◼ Kweelede kucitwa bubambe bwakutolela zikozyanyo zyamulalilo eezi kubananike aabo batakonzyi kusika akaambo kakuciswa.
◼ Ciindi nokuli mbungano zinji zibelesya Ŋanda ya Bwami yomwe, mweelede kumvwana kabotu akati kambungano kutegwa kutabi kwaatikizyanya kwabantu mubusena bulindililwa naa amulyango wakunjilila, amutuzila twiinda bantu alimwi aabusena aasiigwa myootokala.