Atweende Munzila Mbotu Iipa Bulemu Kuli Leza
1 Kufwumbwa nkotubede, ibukkale bwesu, nsamino alimwi akulibamba kupa bukamboni kujatikizya mbotubede alimwi a Leza ngotukomba. Eci cilabonwa ikapati amiswaangano mipati yabantu ba Leza oko ibantu banji nkobatulangilila. Elyo notupa cikozyanyo cibotu izina lya Jehova lilalemekwa. (1 Pet. 2:12) Pele ikutalilemeka naa kucita zintu cakutayeeyela kucitwaa bantu basyoonto buyo kulakonzya kusampula zina lya Leza alimwi abantu bakwe. (Muk. 9:18b) Ikuziba kuti ikwiinda mukubona mbotulilemeka ibantu bakunze batondezyegwa mboibede mbunga yesu alimwi a Leza ngotukomba kweelede kutupa kubikkila maanu kapati ‘kukucita zintu zyoonse kuti Leza alemekwe.’—1 Kor. 10:31.
2 Ikulilemeka Kabotu lya Muswaangano: Tacikwe makani ambokubede ooko nkotucitila muswaangano, tweelede kukubona kuti nkuu Ŋanda ya Bwami mpati elyo notuli kumuswaangano. Tweelede kusama alimwi akulibamba kabotu mbubwenya buyo mbotucita elyo notuli kumiswaangano yambungano yankotuzwa. Ciindi camuswaangano alimwi anowamana, ibakwesu alimwi abacizi tabeelede kusama zisani zitali kabotu izitondezya muuya wanyika cakuti bantu tabakonzyi kubona kwiindana kuliko akati kandiswe abantu bakunze mumakani aakulilemeka. Bacizi beelede kubikkila maanu kubona kuti basama misinsi alimwi azyisani zili kabotu alimwi zilamfwu zyitondezya bulemu. (1 Tim. 2:9, 10) Kufwumbwa nkotunoobede, kube kumuswaangano, muŋanda yakulida zyakulya naa katuula zintu mucintoolo tweelede kutondezya kuti tuli babelesi ba Leza kutegwa tutakapi bantu kaambo kakusampaula nzyotucita.—2 Kor. 6:3.
3 Ikubbapatizigwa kuyoobako mubuzuba bwabili bwamuswaangano imafwumofwumo. Ngazi Yamulindizi yamu Chichewa yamu April 1, 1995 apeeji 30, ilapandulula mbotweelede kulimvwa aciindi eeco. Itwaambila kuti tweelede “kutondezya bulemu bweelede elyo nokuli kubbapatizigwa. Tacili ciindi cakukondwa kwakutalijata naa kusekelela cakunzwa munzila buya. Pele alimwi tacili ciindi cakuusa buya pe.” Tacitondezyi bulemu pe kuli baabo ibabbapatizigwa ikusama zisani zyakusambila alimwi izijatilila kumubili naa zibalangala taakwe makani naa mbaalumi antela mbanakazi. Aboobo, boonse beelede kutondezya bulemu alimwi alukkomano lwakubbapatizigwa kwa Bunakristo.
4 Petro ulatwiibalusya ‘mbotweelede kuba bantu ibeenda munzila iisalala amukulemeka Leza.’ (2 Pet. 3:11) Ikwaambaula alimwi amicito yesu ku Muswaangano Wacooko wa “Basikucita Zyaambwa mu Jwi lya Leza” azikabe zyeezyo ziyoogwasya babombe myoyo ibanootulangilila ikuziba alimwi akutalika kukomba Leza wesu mupati walo weelede kupegwa bulemu boonse.—1 Kor. 14:24, 25.