Amusalale Mubukkale Bwanu Boonse
1. Ino nkaambo nzi ncociyandika kusalala mubukkale bwesu boonse?
1 Mbotuli babelesi ba Jehova Leza uusalala, tulasolekesya kusalala mubukkale bwesu boonse. (1 Pet. 1:15, 16) Eeci caamba kuti tuli kanzide kutobela zyeelelo zya Jehova mubukkale bwesu boonse. Imuswaangano wacooko wamwaka uuno uyootupa coolwe cilibedelede cakutondezya ibukkale busalala.
2. Ino mbuti mbotukonzya kubamba busena bwamuswaangano kuti kabusalala?
2 Busena Bwakuswaanganina Bweelede Kusalala: Kulaba mulimo mupati wakubamba masena aakuswaanganina alimwi akwaasalazya kautanatalika muswaangano. Kufwumbwa zintu nzyotwaletelezya mubusena bwamuswaangano, tweelede kuzitoleezya kubikkilizya azipepa zyakunyamwida zyakulya zitajisi zintu alimwi amabbodela. Ikuti naa tulakonzya kuletelezya zintu eezyi eelyo nozyabikkide zintu, mmasimpe tweelede kuzitoleezya aleelyo notwamana kuzibelesya.
3. Ino ncinzi cipa kuti kube tombe alimwi ino mbuti mbokukonzya kusalazyigwa amuswaangano?
3 Kumiswaangano imwi mikwasyi ilida zyakulya mubusena mucitilwa muswaangano alimwi eeci cilakondelezya kapati. Pele tatweelede kusiya tombe kusikila ipulogilamu yoonse yamana. Bamana kulya masyikati aumwi mukwasyi ulijisi mukuli wakusalazya kufwumbwa tombe liliko. Amubone kuti takusyaali mabbodela aatajisi zintu, tusinsyo twamabbodela, tufwefwelenga twazyakulya, tupepa mwakubikkila zintu, mapepa aakucimbuzi, mapepa aakulembela twaambo alimwi notuba tupepa twapulogilamu yamuswaangano katwaalabene ansi ciindi pulogilamu yakumazuba noyatalika. Mulakonzya kuletelezya kakwese naa kapepa oomo banamukwasyi mobakonzya kusowela tombe kuti likasowegwe muzingungulu naa mukkomba libambidwe amuswaangano. Mwalombwa kutasiya mabbodela aajisi zintu naa aatajisi zintu kaalabene, alakonzya kuleta ntenda alimwi apa kuti busena kabutalibonyi kabotu. Ikuti katujisi kaanda naa kadumba kumuswaangano, amubone kuti busena bulasalala kuzinguluka nkako. Bana balakonzya kuyiisyigwa kukukula alimwi akuyoosowa tombe kubusena bubikkidwe kweelede kusowelwa.
4. Ino milawo nzi mu Israyeli yakali kuyandika kutegwa bantu babe abuumi bubotu, alimwi nciiyo nzi ncobakonzya kwiiya bantu ba Jehova sunu kuli ceeci?
4 Kusiya cimbuzi kacisalala notwamana kucibelesya mbumboni bumbi butondezya kuti ‘tucitila bantu boonse milimo mibotu.’ (Gal. 6:10) Mulawo wa Leza kubana Israyeli kujatikizya tubi twabantu ulisalede alimwi muuba-uba kutobela. (Amubale Deuteronomo 23:12, 13) Mulawo ooyu wakapegwa kaindi ulabeleka asunu alimwi tulakonzya kuba abuumi bubotu ikuti naa twatobela njiisyo zyanguwo. Kusyomeka kuzyeelelo zya Jehova kujatikizya kusalala lyoonse kuletela zilongezyo alimwi kulatwaandaanya kunyika eeyi.—Dt. 28:9, 10.
5, 6. Ino mbuti luyando mbolukonzya kutukulwaizya kuba balondo?
5 Luyando ndotujisi kubakwesu luyootukulwaizya kubalanganya. (1 Kor. 13:4, 5) Tacipi bulemu kusiya tombe abusena mbotukkede akaambo kakuti kuli bamwi bakkede munsi lyesu. Tacipi bulemu kutacibamba kabotu cimbuzi akaambo kakuti kuli bambi baciboola kuti bacibelesye. Aboobo atutondezye luyando kuli basimukoboma.—Joh. 13:35.
6 Tulaakkomanina masena eesu aakukombela alimwi tweelede kulumbaizyigwa akaambo kakuyaambele kubotu kulibonya munzila mbotubamba masena aaya kuti kaasalala. Toonse atuzumanane kusolekesya kuti “tulisonzole busofwaazi boonse nibuba bwamubili nibuba bwamoyo, atulondole busalazi bwesu cakuyoowa Leza.” (2 Kor. 7:1) Amwiiye bulondo kuŋanda alimwi akuyiisya bana kutola lubazu kwiinda mukubamba ŋanda kuti kiisalala. Amube balondo ku Maanda aa Bwami eesu alimwi camamanino twaswaangana antoomwe kumiswaangano mipati, kuswaangana kwesu akutondezye zyeelelo zisumpukide zya Leza wesu Jehova Uusalala.—Is. 60:2.
7. Ino ibukkale bubotu bubikkilizya nzi mubusena bwamuswaangano?
7 Kumuswaangano: Ikapati ibukkale bwesu bubotu bweelede kulibonya kubusena bwamuswaangano. Mwalombwa kutobela busolozi mbobamupa basikugwasyilizya kujatikizya busena bwakusiila myootokala alimwi amucitilwa muswaangano. (Heb. 13:17) Mikwasyi yeelede kukkala antoomwe muciindi cakulekela bana kuti kabalikkalila, ikubikkilizya abakubusi kuti bakkale mutukamu twabakubusinyina bamwi. Zyakulekkodela zili zyoonse tazyeelede kuswaanganizyigwa kumagesi naa mincini iili amuswaangano alimwi zilakonzya kubelesyegwa buyo munzila iitabanyonganyi bamwi. Ikuti kamuyanda kubweza zifwoto, mutabelesyi mumuni wakkamela ciindi camuswaangano. Amubone kuti tuncini tuzyibya muntu kuti ulayandika alimwi amafooni akweenda angawo tazinyonganyi bamwi. Ikuti naa mwabona ntenda mubusena bucitilwa muswaangano, mwalombwa kumuzibya sikugwasyilizya antela Cibeela Calugwasyo Lutaanzi.
8. Ino mbuti ibukkale bwesu kumuswaangano mbokumulemeka Leza?
8 Ibukkale bwesu bulatwaandaanya kubantu bamwi alimwi bulamulemeka Leza wesu. (1 Pet. 2:12) Kumuswaangano, milimo ya Bakamboni ba Jehova inoolibonya antangalala. Aboobo, amube amakanze aakuba balondo kumubili, kubamba cilawo cesu kacisalala alimwi akusalala mubukkale bwanu boonse.
[Kabbokesi kali apeeji 5]
Amube Abukkale Busalala
◼ Amube balondo
◼ Amubabikkile maano bana
◼ Amubalanganye bantu