Amucite Zibotu Ikutegwa Mutembaulwe!
1 “Balijisi bube bumwi mbonditanaa kubona kubantu bamwi.” “Cilakkomanisya kubaa nkamu eeyi.” Ootu ntwaambo tubotu akati katwaambo tunji tukulwaizya twakatambulwa kuzwa kubantu basikulangilila nowakamana muswaangano wacooko mwakali, kutondezya kulilemeka kubotu nkotujisi katuli mbunga. (Tus. 27:2; 1 Kor. 4:9) Ikapati, kutembaula kuli boobu kuunka kuli Jehova. (Mt. 5:16) Acimwi coolwe cibotu kapati cakutembaula Leza caboola kale uuno mwaka ku Muswaangano Wacooko wa “Bamayi ba Jwi lya Leza.”
2 Mwakaa mwaka tulatambula ziyeezyo ziluleme kujatikizya kulilemeka kweelede aamuswaangano. Nkaambo nzi? Nkaambo kakuti bube, nsamino alimwi akulilemeka kwanyika eeyi mbokuyaabubija, tulakaka kutobela kutalilemeka kwabo. Tatuyandi kulilemeka kwesu kubotu kuti kubisigwe pe. (Ef. 2:2; 4:17) Atuzibikke mumizeezo yesu incenjezyo zitobela.
3 Amucite Zibotu—Kubusena Bwamuswaangano: Kwajanwa kuti bamwi basimuswaangano balakaka kubelekela antoomwe abasikugwasilizya, nokuba kukanana kulimbabo munzila iitali yabunakristo buya. Masimpe, muuya wakuyanda kuba mutaanzi lyoonse tauzibyi umwi kuba muntu uucita zibotu nokuba kuleta ntembauzyo kuli Jehova Leza. Aboobo atube bantu batondezya luyando, bakkazyika moyo alimwi babelekela antoomwe.—Gal. 5:22, 23, 25.
4 Mumiswaangano imwi, bakwesu alimwi abacizi bali kuzuzaana buya alimwi akutonkana kutegwa bajane zyuuno “zibotu.” Kwakaba kulicisa akaambo kakulilemeka munzila iili boobu. Nokuba kuti kwakakulwaizigwa kuleta zilyo zyuuba-uba zyacikoboko, taceelede pe kubikka matafule mumasena musiigwa myootokala kutegwa mubikke zilyo zinji. Eeci cilakonzya kupa muzeezo wakuti mubamba tumapobwe tuduumide tucitika mumasena muli zisobano.
5 Atucite Kabotu Kwiinda Munsamino Yesu alimwi Ambotulibamba: Nowakamana muswaangano wacooko umwi mwakali, sikulingula zilembwa mumuteende umwi wakalemba kuti: “Kwiinda zyoonse, nkulilemeka kwa Bakamboni nkokwakabota kapati. Elo cakali kukatalusya kubona bantu banji kabalilemeka munzila yabulemu. Kabasamide zisani zyabo zibotu mbuli lyoonse mu Nsondo, myaanda-myaanda yamikwasyi kuzwa mumisyobo iisiyene-siyene alimwi amikowa bakanjila mubbuwa cakutayobeka. kulilemeka kwabo kwakaliindene kapati kunkamu zyabantu banji banjila kabali mumulongo mubbuwa. Mubwini, Bakamboni baliindene kapati kunkamu zyabantu zinji. Caba cintu cizizilwe kapati kubona banamaleya batalilemeki kabotu. . . . Ncobeni, inkamu zya Bakamboni zilakatalusya.” Atukanze kutazumizya nsamino yesu, kulibamba naa kulilemeka kwesu kubisya munzila iili yoonse ciimo cibotu cakumuuya amuswaangano.—Flp. 1:10; 1 Tim. 2:9, 10.
6 Amucite Kabotu—Kulubbapatizyo: Basikubbapatizigwa beelede kucilemeka kapati ciindi eeci. Ikusama cisani cilibonya kabotu iciindi nobbapatizyigwa, kuyootondezya kulumba kukusetekana kwaciindi eeci. Inga cainda kugwasya kulibaabo basololela ziiyo zya Bbaibbele kwiindulula aziiyo zyabo kabatana kuunka kumuswaangano “Mibuzyo kuzwa kuli Basikubala” mu Ngazi Yamulindizi yamu Chichewa yamu April 1, 1995.
7 Bulondo bwesu alimwi akulilemeka kwabunaleza kusinizya lusyomo lwesu lwa Bunakristo alimwi akupa kuti cuube-ube kubantu babombe myoyo kuziba kasimpe. Aboobo, tweelede “[ku]cita bubotu” kutegwa tukatembaulwe twaakujanika Kumuswaangano Wacooko wa “Bamayi ba Jwi lya Leza.”—Rom. 13:3.
8 Bayanzene “Kabotu Akucililana”: Ikutegwa muswaangano wacooko uzwidilile, kweelede kuba kubelekela antoomwe. Beendelezi bamuswaangano balabamba busena bubotu bwakuswaanganina kubikkilizyaa masena aakoona. Umwi aumwi kumugama alimwi atubunga twamikwasyi balalibambila mbobayooyenda alimwi amasena aakoona. Alimwi mbungano zileendelezya mulimo wakugwasya kwiinda mukupa basikulisungula muzibeela zisiyene-siyene ziyandika kweendelezya muswaangano. Imakanze ngakuti “zintu zyoonse buyo zicitwe kabotu akucililana.”—1 Kor. 14:40.
9 Mbomubeleka calukamantano abaabo beendelezya muswaangano, kamuyeeya kuti myezi—cimwi ciindi myaka—yakulibambila ilayandika. Myaanda-myaanda yabakwesu batola ciindi cilamfwu kubamba zintu. Eeci cibikkilizya kulomba busena azintu zyakubelesya eezyo nzyobeelede kubbadelela, kubikka antoomwe zibelesyo alimwi akujinzya basimilimo. Kulibambila ooku ciindi kaciciliko kuleta zilongezyo zyakumuuya kubantu boonse. Ino ncinzi ncotukonzya kucita kutegwa tugwasilizye?
10 Amubutobele Bubambe Boonse: Cilayandika kapati kuti toonse tutobele bubambe bwamuswaangano. Mbotuli babelesi ba Jehova Leza, tulijisi coolwe cakutondezya bube bwakwe muzintu zyoonse nzyotucita. Eeci cibikkilizya kulibambilila ziyandika alimwi akujanika kumuswaangano ooko zina lya Leza nkolijatikizidwe. Kamuyeeya kuti walo “Leza tali Leza walupilingano pe, ngwaluumuno.” (1 Kor. 14:33) Aboobo, atukanze kuti boonse basikulangilila bakabone bube oobo kujatikizya Jehova kuzwa kuzintu nzyobayoobona mulindiswe—kulilemeka kwesu mbotukanza zyamuswaangano alimwi akuyoojanika Kumuswaangano Wacooko wa “Bamayi ba Jwi lya Leza.” Atulekele babombe myoyo ibalangilila kubona kuti mbungano ya Jehova ileendelezegwa “kabotu akucililana.”—Int. 68:26.