“Yasana Lumamba Lubotu Lwalusyomo”
1 Imwaapostolo Paulo wakakulwaizya Timoteo ‘kuyasana lumamba lubotu lwalusyomo.’ (1 Tim. 6:12) Paulo lwakwe wakacicita eeci caambwa mumajwi aaya. Kumamanino aabuumi bwakwe, wakaamba cakusinizya kuti walo mwini wakalwana nkondo mbotu. (2 Tim. 4:6-8) Mumbazu zyoonse buyo, wakabeleka cabusicamba alimwi calukakatilo. Kwiinda mukwiiya cikozyanyo cakwe, tulakonzya kubaa lusyomo mbuli ndwaakajisi lwakuti tuli mukucita kabotu mbuli mbotukonzya mukulwanina lusyomo lwa Bunakristo.
2 Atubeleke Canguzu: Paulo wakabeleka canguzu mumulimo. (1 Kor. 15:10) Andiswe tulabeleka canguzu notuyandaula bantu beelede mucilawo cesu. (Mt. 10:11) Ikutegwa tubasikile bamwi ambweni tuyandika kufwambaana kubuka mafwumofwumo ikukambaukila baabo mbotuswaanganya mumigwagwa. Ambweni inga kwayandika kuti katubeleka masikati naa kumangolezya kutegwa katubajana bantu mumaandaabo eelyo nobapiluka kuzwa kumilimo.
3 Tuyandika kulyeendelezya alimwi akubaa mulongo wazintu zyakucita uuli kabotu kutegwa katutamuki kusika kumuswaangano wakulibambila kuya mumulimo ankamu yesu yaciiyo cabbuku. Mucikozyanyo, ibamwi bamukwasyi wa Beteli beenda woola lyomwe kuya kumbungano nkobaabilidwe kutegwa bakatole lubazu mumulimo kumamanino aamvwiki. Cimwi ciindi tulakonzya kulombozya basikumwaya alimwi abanamukwasyi bamwi mumbungano yesu balo ibeenda musinzo uuli mboubede pesi tabamuki pe lyoonse. Zikozyanyo eezi zyakusoleka canguzu alimwi akulibambila kabotu tweelede kuziiya.
4 Tweelede kunookulwaizigwa kapati ikupilukila ooko kuli koonse nkotwakajana bantu bakatondezya luyandisisyo. Noliba leelyo notuli mukumwaya mamagazini mumugwagwa naa tuli mukwiizya buyo, tweelede kusola kubweza kkeyala naa nambala yaluwaile yamuntu ooyo ngotubandika limwi. Mpoonya tulakonzya kuyoopilukila naa kubandika awalo alimwi kutegwa tukomezye luyandisisyo akusola kutalisya ciiyo ca Bbaibbele.
5 Atutole Lubazu Lyoonse Mumulimo: Paulo wakali kukambauka lyoonse alimwi wakacita oobo mpoceela. (Rom. 15:19) Ino nywebo mbuti? Sena mulatola lubazu lyoonse mumulimo? Sena mwakatola kale lubazu mumulimo wamumuunda mwezi uno? Beendelezi Baziiyo Zyabbuku Zyambungano bayoobikkila maanu kubona kuti muntu amuntu wamunkamu yabo ulatola lubazu mumwezi wa August. Bayoomugwasya kucita boobo.
6 Kwiinda mukwiiya cikozyanyo ca Paulo mukukambauka makani mabotu, tuyoozumanana “[ku]yasana lumamba lubotu lwalusyomo.”