“Sena Inga Ndalonga?”
1 Kweelanaa malailile aa Jesu ‘akuya buyiisya bantu bamisyobo yoonse,’ babelesi banji ba Jehova balyaabide balonga akuyakubelekela kumasena kuyandika lugwasyo kapati. (Mt. 28:19) Batobela Paulo walo wakazumina bwiite bakuti: “Zubukila ku-Makedoniya, utugwasye.” (Inc. 16:9) Ino eci inga cacitwa buti mubwini?
2 Amucite Cintu Comwe Aciindi Comwe: Sena kuli cilawo citabelekelwi-belekelwi cambungano yanu? Ikuti kakuli boobo, ambweni mulakonzya kusoleka kubelekela mumasena aayo. Kamutanasala kuya kumbi, kusaanguna amwaambaule abaalu kutegwa mumvwe mbobayeeya naa mulilibambilide kulongela kumbi. Mulakonzya kubuzya mulangizi wanu wabbazu naa kuli mbungano ilaafwaafwi njazi kwalo nkomukonzya kuyoobelekela. Kulubazu lumbi, mwamana kulanga-langa mbazu zyoonse zijatikizidwe, mulakonzya kuyanda kuyoogwasilizya kubusena bumbi buyo mucisi mweena naa mucisi cimbi. Ikuti naa ngamakanze anu aaya, nywebo antoomwe akabunga kabaalu kankomuzwa mweelede kulembela kuofesi lyamutabi kujatikizya busena nkomuyanda kuyoobelekela akupandulula kabotu-kabotu bukkale bwanu bwateokrasi. Cilainda kubota naa mwaakububonena limwi busena oobo kamutanasala kulongela limwi akuyookkalila nkweena ooko.
3 Amukucenjelele Kulongela Kucisi Ceenzu: Ibakwesu banji balalonga akuyookkala kuzisi zimbi akaambo kakuyandaula bukkale buli kabotu naa kutija kudyaamininwa. Mukuya kwaciindi, ibamwi bawida mukooze akucengwaa bantu bampelenge balo babasyomezya kuti balakonzya kubagwasya kujana akukkala mucisi ceenzu pesi bababbida buyo mali aabo bamana babatija akubasiya buyo balikke. Zimwi ziindi aaba bantu basungilizya basikulonga aaba kucita milimo iitaluzi. Ikuti naa bakaka, balabatija akubasiya mumaanza cisi eeco nkobaunka. Aboobo bukkale bwabasikulonga aaba bulabijila limwi kwiinda mbobwakabede kucisi cokwabo. Zimwi ziindi batalika kulomba lugwasyo kubakwesu kuti ndiza inga bakkala ambabo naa kubayandawida ŋanda buya ikubikka mukuli amikwasyi iimbi ya Banakristo yalo iijisi kale mapenzi amakatazyo abo ngobeelede kulanganya. Banamukwasyi mumaandaamwi baandanizigwa kuluumwi amweenzinyina alimwi mikwasyi yayaansi munzila yakumuuya akaambo kakulonga ooku kwakutayeeyela kabotu.—1 Tim. 6:8-11.
4 Ikuti naa kamuyanda kulongela kumbi akaambo kakuyandaula bukkale buli kabotu, ncomweelede kuziba ncakuti kufwumbwa nkomukonzya kukkala akwalo kuli mapenzi ngomweelede kulanganya. Ncuuba-uba ikulanganya mapenzi aaya nomuli kubusena ooko nkomuzi kale mwaambo alimwi azilengwa kwiinda kuyootalika buya kubusena nkomutazi kabotu pe.