‘Amunjilwe’ Amulimo Wanu
1 Iciindi notubala kuti mwaapostolo Paulo wakali sikusuma matente naakali ku Korinto, tulakonzya kuyeeya kuti eeci cakali kumusinkilizya mumulimo wakwe wakukambauka. Pele Incito 18:5 yaamba kuti: “Paulo wakanjidwe makani, wakabalungulwida ba-Juda kuti Jesu ngu-Kristo.” Nkaambo nzi Paulo ncowakamunjide boobo mulimo wakukambauka? Nokuba kuti ibanji bamu Korinto bakali kale basyomi, Mwami wakazuminizya kuti bakacili banji mumunzi oomo ibakacili kuyandika kuti babe basikwiiya. (Inc. 18:8-11) Sena tulijisi kaambo keelene akaaka ncotweelede kunjilwaa mulimo wesu? Inzya. Ibantu banji balakonzya kujanwa akuyiisigwa kasimpe.
2 Amukatole Ciindi Cinji Mumulimo mu Mwezi wa April: Tusyoma kuti mulaamakanze akujata bubi mumulimo wakukambauka makani mabotu mwezi uli woonse. Pesi myezi imwi ipa coolwe cibotu ‘cakunjilwa’ amulimo ooyu. Myezi eeyi ilabikkilizyaa mwezi wa April, uuli akati eeni aciindi ca Ciibalusyo. Sena bukkale bwanu bulamuzumizya kubeleka kamuli mupainiya wakugwasilizya naa ikuyungizya ciindi canu mumulimo kuciindi eeci? Basikumwaya banji ibayungizya ciindi cabo balongezyegwa kapati. (2 Kor. 9:6) Ikuti kamubeleka kweelanaa mbomukonzya, Jehova ulakkomanaa mulimo ngomucita camoyo woonse. (Lk. 21:2-4) Kufwumbwa bukkale mbomujisi, aabe makanzeenu ‘aakunjilwa’ amulimo wanu mu April. Alimwi tamweelede kuluba kutola lipooti yanu yamulimo wamumuunda kumamanino amwezi kutegwa awalo mulimo wanu ukabikkilizigwe antoomwe awabantu ba Jehova boonse.
3 Amubaswaye Bapya Ibakajanika ku Ciibalusyo: Mu Zambia ibakajanika ku Ciibalusyo mwakali bakali 474, 933. Tatuzyi mweelwe wabaabo batiikanjanike uno mwaka. Pele malipooti atondezya kuti kuli bulangizi bubotu kapati bwakuti kuyooba “kutebula” kupati. (Mt. 9:37, 38) Aboobo cakufwambaana mbuli mbokukonzeka, amulibambile kuyoobaswaya bapya ibakajanika ku Ciibalusyo kutegwa mubagwasye munzila yakumuuya. Ikuccelwa kubaswaya kulakonzya kupa ciindi cakuti ‘mubi abanyanzye jwi lyabwami lyakaminzyigwa mumyoyo yabo.’ (Mt. 13:19) Ikubaswaya cakufwambaana kuyootondezya kuti ncobeni ‘ulimunjide’ mulimo wanu.
4 Amuzumanane Ikugwasya Batacisungweede Mumulimo: Mu February kwakatalisigwa bubambe bwaalubazu bwakugwasya batacisungweede mumulimo. Ikuti kakuli bamwi batanaswaigwa munyendo zyabweembezi, baalu beelede kulibambila kuyoobaswaya bantu aabo kautanamana mwezi wa April. Baalu bayoosola canguzu ikubona cimupenzya muntu umwi aumwi alimwi ambobakonzya kumugwasya kutegwa atalike alimwi kubelekela Jehova cabusungu. Oolu lugwasyo lwaluyando lutondezya kuti baalu balabikkila maanu kumikuli njobajisi kabali beembezi ba “butanga bwa-Leza.” (1 Pet. 5:2; Inc. 20:28) Ngazi Yamulindizi yamu Chichewa ya September 15, 1993 mapeeji 22-3, ilapa malailile kubaalu ngobakonzya kubelesya ciindi nobalanganya penzi limwi lyamapenzi aali musanu aakonzya kujatikizya batacisungweede mumulimo. Inga cabota kuti bamwi bakulwaizigwa kutola lubazu mumulimo wamumuunda mumwezi wa April.
5 Amugwasye Banji Ikuba Basikumwaya Batabbapatizidwe: Sena bana banu baleelela kuba basikumwaya bapya bamakani mabotu? Ino mbuti kujatikizya bamwi aabo mbomwiiya limwi Bbaibbele? Ikuti naa bantu aaba bazuminizigwaa baalu, sena tacikonzyi kuba ciindi cibotu cakuti batalike kumwaya mumwezi wa April? Ikuti naa muntu kayaambele akuti wakayiiya kale broshuwa lya Ncayanda alimwi abbuku lya Luzibo, ulakonzya kuzumananaa ciiyo ca Bbaibbele mubbuku lyabili—lilakonzya kalili bbuku lya Mawu a Mulungu, Mtendere Weniweni naa Ogwirizana m’Kulambiridwa. Mbaakani yanu njakugwasya sikwiiya kuti asime mukasimpe, akweelela kuba sikumwaya uutabbapatizidwe mane akuba Kamboni wa Jehova ulyaabide alimwi uubbapatizidwe.—Ef. 3:17-19; 1 Tim. 1:12; 1 Pet. 3:21.
6 Ikuti mwazumanana kubatondezya luyando lwini-lwini mbomwiiya limwi Bbaibbele, muyoobagwasya ikuti bayaambele mukasimpe. Kamboni umwi wakayaanya banabukwetene ibacembeede balo bakazumina kwiiya Bbaibbele. Pele banabukwetene aaba bakacisumpya ciiyo kwansondo zyotatwe zitobelene. Mukuya kwaciindi, ciiyo cakatalisyigwa. Mpoonya, banabukwetene aaba tiibakali libambilide kwiiya mvwiki zyoonse nzyakali kubaswaya. Pele kumamanino, imukaintu wakayaambele mane wakabbapatizigwa. Mukwesu ulayeeya kati “naakabbapatizigwa, imeso aakwe akazwide misozi yakukondwa kwalo, alimwi eeci cakatupa kuzwa misozi mebo amukaintu wangu akaambo kakukondwa.” Inzya, ‘ikunjilwa’ amakani mabotu kuletela lukkomano lunji!
7 Businsimi bwa Bbaibbele alimwi azintu zicitika munyika zitondezya kuti tuli kwini-kwini kuciindi cakumamanino. Eecino nceciindi bantu ba Jehova ncobeelede ‘kunjilwa’ amulimo wakuzibya bamwi zyamakani mabotu. Mwaapostolo Paulo ulatusyomezya kuti milimo njotubeleka ncobeni “yamu-Mwami tiikonzyi kuba yabuyo pe.”—1 Kor. 15:58.