Jehova Uleelede Kutembaulwa Loko
Mulalilo wa Mwami Uuyakucitwa mu April 16
1 Tulacilangila kapati Ciibalusyo mbotuyaabuswena mu April 16, 2003. Mangolezya aayo, tuya kwiibaluka lufwu lwa Jesu, akusangana atuulunzuma twabakombima munyika mukutembaula zina lya Jehova. Tweelede kumutembaula Jehova akaambo kacipego citaliboteli cacinunuzyo. Kwiinda mucinunuzyo, uyoopa zilongezyo zibotu kubantu boonse ibamvwa. Camoyo woonse tulamusangana sintembauzyo mukwaamba kuti: “Jehova mupati, uleelede kutembaulwa loko.”—Int. 145:3.
2 Eeci nciindi cakuzinzibala kuyeeya bubotu bwa Leza alimwi akulumba nkotujisi kuli Jehova akaambo kakutuma “Mwanaakwe simuzyalwa-alike munyika, kuti tujane buumi kumaanza aakwe.” (1 Joh. 4:9, 10) Ikukubikkila maano ikwiibaluka Mulalilo wa Mwami, kutupa kusyoma camoyo woonse kuti “Jehova ngusibuuya, ngusiluzyalo . . . ulizwide luse.” (Int. 145:8) Masimpe, cinunuzyo ncitondezyo cipati caluyando lwa Jehova kubantu boonse. (Joh. 3:16) Iciindi notuyeeya luyando lwa Leza alimwi akuzinzibala kuyeeya mbwaakasyomeka Jesu, tulakulwaizyigwa kumutembaula Jehova. Mane kukabe kutamani, tuyoomutembaula akaambo kaluyando lwakwe lupati oolo ndwaakatondezya mukupa kuti cikonzyeke kulindiswe kuba abuumi butamani.—Int. 145:1, 2.
3 Amubagwasye Bantu Kutembaula Jehova: Ikulumba akaambo kacipego eeci ciinda kubota cacinunuzyo, kutukulwaizya kuti tubatambe bantu kuti batusangane mukutembaula Jehova. Sintembauzyo wakasololelwa amuuya kulemba kuti: “Bayookankaizya impuwo yabubotu bwako bupati; bayooimbila bululami bwako cakukondwa.” (Int. 145:7) Mwaka wamana, Bakamboni ba Jehova munyika yoonse bakabeleka mawoola aayinda ku 1,000,000,000 mumulimo wakukambauka. Ino ncinzi cakatobela akaambo kakubeleka kwabo canguzu? Nsondo ansondo, mweelwe waakati-kati wabantu ibali 5,100 bakabbapatizyigwa ikutondezya kulyaaba kwabo kuli Jehova. Mbwaanga boonse ibakajanika ku Ciibalusyo bakali 15,597,746, kubikkilizya abantu bainda ku tuulunzuma tuli 9 ibatanatalika kutembaula Jehova kabali basikumwaya bamakani mabotu, ikuyaambele kupati kulalangilwa. Mbotuli basikwaambilizya makani aa Bwami, tulalumba kapati kucoolwe cilibedelede cakwaambilizya makani mabotu alimwi akusololela bantu kuli Jehova, ku Mwanaakwe alimwi aku Bwami.
4 Inzila mbotu mbotukonzya kukulwaizya bantu kuti balemeke Jehova nkwiinda mukubatamba kuti batusangane mukucita Mulalilo wa Mwami. Sena mwakalemba kale mulongo wabantu mbomuyanda kuyootamba abaabo ibeelede kuyeekezyegwa buzuba alimwi aciindi? Sena mwakabatamba kale boonse ibali aamulongo wanu? Ikuti kamutana kucita boobo, amubatambe muciindi eeci cacaala. Amubagwasye kutegwa bamvwisye mbociyandika kucita cilengwa eeci. Nomuli kubusena bucitilwa Ciibalusyo, amubikkile maanu kukwaanzya beenzu. Amubagwasye kutegwa balimvwe kwaanguluka, amubazibye kubantu abambi alimwi akubalumbaizya akaambo kakujanika.
5 Ikujanika ku Ciibalusyo kulakonzya kubakulwaizya bapya kutegwa bayaambele kumuuya. Sikwiiya Bbaibbele uuciswa bulwazi bwa post-traumatic stress disorder (ipenzi lyakuyoowa zintu zyiyoosya zyakamucitikila), ibupa kuti cimuyumine kuunka mumasena aabuleya mujanika bantu banji, wakajanika ku Ciibalusyo. Naakabuzyigwa ncaakali kuyeeya kujatikizya muswaangano, wakaamba kuti: “Akali mangolezya aasetekene kapati, eelyo ndakajanika.” Ikuzwa buzuba oobo, wakatalika kujanika kumiswaangano.
6 Camana Ciibalusyo: Ino ncinzi cikonzya kucitwa kugwasya bapya aaba kuti batalike kutembaula Jehova? Baalu bayoobikkila maano kapati kubapya ibayoojanika ku Ciibalusyo alimwi akucita bubambe kutegwa basikumwaya ibacibwene kabotu babaswaye cainda buyo Ciibalusyo, kutegwa balange-lange twaambo tukulwaizya ntobakaiya alimwi akutobela. Bamwi balakonzya kuyanda kuba aciiyo ca Bbaibbele caaŋanda. Alimwi beelede kutambwa kutegwa kabajanika kumiswaangano yoonse yambungano yaansondo, mbwaanga kujanika lyoonse kulakonzya kubagwasya kuyungizya luzibo lwabo lwamu Bbaibbele.
7 Bubambe bwacitwa kutegwa boonse aabo batajaniki-janiki alimwi abaabo ibatacisungweede mumulimo bagwasyigwe kujanika kumiswaangano lyoonse. Ikuti naa mwalombwa abaalu kugwasya muntu ooyo uutacisungweede kuti atalike ikutola lubazu mumulimo wamumuunda, amulisungule ikuzumina mukuli ooyu. Ikubabikkila maano kapati bakwesu kuli boobu kuleendelana akukulwaizya kwamwaapostolo Paulo kwakuti: “Nitujisi ciindi cibotu, atucitile bantu boonse milimo mibotu, pele kwaambisya kulibaabo baciinga calusyomo.”—Gal. 6:10.
8 Aboobo toonse atulibambile kabotu kutegwa tukajanike ku Ciibalusyo ciyoocitwa mu April 16. Kunyina notuyanda kuyooyindwa cilengwa eeci cisetekene cakutembaula Jehova. Inzya, kusikila kukabe kutamani, atutembaule Jehova akaambo kamilimo yakwe mipati!—Int. 145:21.