Zilyo Zyakumuuya Kuciindi Ceelede
1. Ino mbuti ibbuku lya Ezekieli 36:29 mbolili mukuzuzikizigwa sunu?
1 “Njooleta maila kuti avule, kutabi inzala akati kanu,” mbwaamba Mwami Mupati Jehova. (Ezk. 36:29) Majwi aaya aabusinsimi alabeleka kubantu ba Leza sunu. Mumwaambo wacikozyano, Jehova wavwuzya maila aapa buumi kubantu bakwe. Zilyo zyakumuuya zipegwa kuciindi ceelede lyamiswaangano yacooko zilaasinizya makani aaya.
2. Mbuti Jehova mbwaabelesya miswaangano yacooko ikupa zilyo zyakumuuya kuciindi ceelede?
2 Kumuswaangano wakacitika ku Columbus, Ohio mu 1931, Jehova wakalailila kuti bakombi bakwe bazumine zina lipya lyakuti Bakamboni ba Jehova. (Is. 43:10-12) Mu 1935, inkamu impati yaambwa kubbuku lya Ciyubunuzyo 7:9-17 yakazibwa kabotu. Mu 1942, Mukwesu Knorr wakakanana makani aabuleya aakuti: “Peace—Can It Last?” (Luumuno—Sena Inga Lwazumanana?) Makani aayo akakulwaizya kucita mulimo wakukambauka munyika yoonse alimwi akasololela kukutalisyigwa kwacikolo cabamisyinali citegwa Watchtower Bible School of Gilead. Nokuba kuti miswaangano imwi ilaibalukwa kwiinda imwi, muswaagano umwi aumwi nditafwule lizwide zilyo zyakumuuya zipedwe kuciindi ceelede.—Int. 23:5; Mt. 24:45.
3. Ncinzi ncotweelede kucita kutegwa tugwasyigwe apobwe lyakumuuya amuswaangano wesu wacooko?
3 Sena Mulalya Kabotu? Tulakonzya katujisi zyakulya zinji, pele ikuti katutasolekesyi kuzilya inga tazikonzyi kutugwasya. (Tus. 26:15) Mbocibede oobo amunzila yakumuuya. Kumiswaangano imwi, kwajanika kuti bantu banji inga baile kweendeenda naa kwaambaula abamwi ciindi camapulogilamu. Nokuba kuti kuyanzana amuswaangano ncintu cimwi ciyandika, kweelede kucitwa kacitanatalika anocamana cibeela acimwi. (Muk. 3:1, 7) Ikuti katutakkede akuswiililisya, inga twaindwa kaambo kamwi kapati. Balangizi bazibeela zyamuswaangano abakwesu bajisi mikuli cimwi ciindi balakonzya kwaambauzyanya kujatikizya zimwi zyamuswaangano nokuba kuti makani ali mukukananwa. Kwataba boobo, beelede kupa citondezyo cibotu cakuswiililisya kupulogilamu. Taakwe akati kesu weelede kwiindwa cakulya cakumuuya cili coonse ncotwapegwa.—1 Kor. 10:12; Flp. 2:12.
4. Mbuti mbotunga twatondezya kuti tulalumba kuzilyo zinji zyakumuuya nzyatupa Jehova?
4 Elo kaka tulatukkomanina kapati twaambo twakumuuya twakasimpe tunji ntwapa Jehova mukwiindana anjiisyo zyakubeja zyazikombelo zyanyika! (Is. 65:13, 14) Inzila imwi mbotunga ‘twatondezya kulumba’ nkwiinda mukubona muswaangano kuba coolwe cakuyiisyigwa a Jehova. (Kol. 3:15) Amubikkile maanu kumakani aakananwa amukwesu akubona mulumbe ooyo kuti uzwa kuli Jehova “Mwiiyi [wesu Mupati].” (Is. 30:20, 21; 54:13) Amuswiililisye. Amulembe twaambo tupati-pati mubufwaafwi. Amwiinduluke twaambo tupati-pati twabuzuba oobo mangolezya. Amuzibelesye nzyomwiiya.
5. Ntwaambo nzi tutupa kukondwa ntotujana amiswaangano yacooko?
5 Imuswaangano uuli woonse uucitwa kaitanasika Harmagedoni, kunyina makani naa uli munkambi yabazangalisi, mucisi muli nkondo naa mubusena bupati bwaluumuno, nkuzundwa kwa Saatani! Mbotuli babunyina banyika yoonse bakamantene, tulakukkomanina kulida antoomwe amiswaangano yacooko. (Ezk. 36:38) Tulijisi lusyomo lwakuti Jehova muluyando lwakwe, uya kutupa alimwi “zilyo . . . kuciindi ceelede”—Lk. 12:42.
[Kabbokesi kali apeeji 4]
Amutondezye Kuti Mulalikkomanina Itafwule lya Jehova
◼ Amuswililisye
◼ Amulembe twaambo tupati-pati
◼ Amwiinduluke twaambo tupati-pati mangolezya
◼ Amuzibelesye nzyomwiiya