Bubambe Bupya bwa Muswaangano Wabbazu

Jehova weelede kulemekwa. Ino mbuti mbotumulemeka Jehova? Ino ncinzi cipa kuti bamwi kabatamulemeki? Nzilongezyo nzi nzyobajana aabo bamulemeka Leza lino? Pulogilamu yamuswaangano wabbazu wamwaka wamulimo wamu 2008 iyootupa bwiinguzi bukkwene kumibuzyo eeyi. Ujisi mutwe wamakani wakuti “Amuzicite Zyoonse Cakuti Kube Bulemu kwa-Leza.” (1 Kor. 10:31) Amuyeeye buyo nzyotwabambilwa kwamazuba obilo aaboola aajisi lulayo lwakumuuya.

Mulangizi wacooko uyookanana mitwe yamakani mbuli yakuti “Nkaambo nzi Ncotweelede Kumulemeka Leza?” alimwi aakuti “Amube Cikozyanyo Cibotu Kwiinda Mukuzuzikizya Zyeelelo zya Leza.” Uyookanana makani abuleya aajisi mutwe wakuti, “Mbabaani Bantu Bamulemeka Leza?,” alimwi amakani amamanino aajisi mutwe wakuti, “Kulemeka Leza Calukamantano Nyika Yoonse.” Alimwi uyooendelezya Cikolo Camulimo Weendelezyegwa a Leza. Mulangizi wabbazu uyookanana makani aajisi mitwe yamakani eeyi “Amukukkomanine Kutondezya Bulemu bwa Leza,” “Ikubikkila Maano Kuziyandika Zyabbazu,” alimwi a “Amuzumanane Mulusinizyo,” ayoozwa kubbuku lya 2 Petro 1:12. Kuyungizya waawo, tuyooiya “Mulimo Wabupainiya Mboumulemeka Leza.” “Kulemeka Leza Mubukkale Bwesu Boonse,” anooli makani akusaanguna aakusiilana obilo ayoolanga-langa bupanduluzi bwamajwi aajanwa ku 1 Ba-Korinto 10:31. Makani aakusiilana aajisi mutwe wakuti “Kubeleka Mulimo Uusetekene Kutegwa Tutembaule Jehova” ayoobandika nzila ziindene-indene zyabukombi bwesu. Tuyooba aciiyo ca Ngazi Yamulindizi mubufwaafwi amubandi wakulingaula lugwalo lwabuzuba bwamu Nsondo. Alimwi kuyooba bantu baya kubbapatizyigwa.

Bantu banji tabayandi kumuziba Leza. Bantu banji balanyongana amizeezo yabantu yakuyeeya bupati bwa Jehova. (Joh. 5:44) Pele tulizi kabotu bubotu bwakutola ciindi cinji kulanga-langa mbotukonzya ‘Kucita Zyoonse Cakuti Kube Bulemu kwa-Leza.’ Amulibambile kuyoojanika akugwasyigwa kuzibeela zyoonse zyone.