Bubambe Bupya bwa Muswaangano Wabbazu

Ino mbuti mbotukonzya kubazunda basikukazya bukombi bwakasimpe? Ino mbuti mbotukonzya kumuzunda Saatani walo uusoleka kutusunka ciindi coonse kuti tujokele kunyika iitakombi Leza? Pulogilamu yamuswaangano wabbazu yamwaka wamulimo wa 2009 iyakwiingula mibuzyo eeyi iiyandika. Imutwe wamakani ngwakuti: ‘Amuzunde Bubi Kwiinda Mukucita Zibotu.’ (Rom. 12:21) Amulange-lange makani aayakubandikwa.

Imulangizi wacooko uyakukanana makani aaya: “Kuyumizyigwa Kutegwa Tuzunde Bubi Kwiinda Mukucita Zibotu,” “Mutani Kulisyomi!,” “Bubi Boonse Buya Kumana Ino-ino!,” alimwi aakuti: “Mbotukonzya Kuyumya Lusyomo Lwesu Kutegwa Twiizunde Nyika.” Imulangizi wabbazu uyakukanana makani aajisi mutwe wakuti: “Ecino Nciindi Cakupakamana!,” kuzwa mulugwalo lwa Ba-Roma 13:11-13, alimwi awakuti: “Tamweelede Kutyompwa Mubuzuba Bwamapenzi,” kuzwa mulugwalo lwa Tusimpi 24:10. Alimwi tulangila makani aamulangizi wabbazu aakuti: “Kulanganya Ziyandika Mubbazu.” Makani aambi aakulwaizya ngakuti: “Sena Mulakonzya ‘Kubikka Moyo Kukukutauka’ Mulimo Ooyu—Kwiinda Mukuba Bapainiya?” Makani aakusaanguna kumakani obile aakusiilana ngakuti: “Amwiime Nji Kutegwa Muzunde Mumeeneeno aa Diabolosi.” Ciyakutugwasya kuzyiba alimwi akutazundwa mumeeneeno aa Diabolosi muzyintu zipangwa abasayaansi, zyakulikondelezya alimwi amumakani aalwiiyo. Makani aakusiilana aajisi mutwe wakuti: “Amujane Nguzu Kutegwa Muliyumye Mubuzuba Oobu Bubi,” ayakututondezya mbotukonzya kulubelesya lulayo lwakasololelwa amuuya lujanwa mulugwalo lwa Ba-Efeso 6:10-18.

Kuli kweendelana kuliko akati kakuzunda cileta bubi abubi kubugama alimwi akukambauka mulumbe wa Bwami. (Ciy. 12:17) Aboobo tacigambyi kuti Saatani ulazumanana cankazi kulwana Bakamboni ba Jehova! (Is. 43:10, 12) Pele Diabolosi uyakwaalilwa cuusisya akaambo kakuti tulikanzide kuzumanana ‘kuzunda bubi kwiinda mukucita zibotu.’ Amulibambile kuyoojana mpindu kuzibeela zyoonse zyone zyamuswaangano wabbazu ooyu.