Mamagazini Eesu Akabambilwa Kuti Kaabasika Amoyo Bantu Basiyene-siyene
1. Mbuti baciinga camuzike musyomesi uucenjede mbobamwiiya mwaapostolo Paulo?
1 Mbubwenya mbuli mwaapostolo Paulo mbwaakali kubelesya nzila zisiyene-siyene zyakukambauka makani mabotu kutegwa agwasye “bantu bamisyobo yoonse,” baciinga camuzike musyomesi uucenjede abalo babelesya mamagazini eesu kutegwa babakambaukile bantu basiyene-siyene. (1 Ko. 9:22, 23) Tweelede kubazyiba kabotu basikubala bakalembelwa mamagazini a Ngazi Yamulindizi alimwi a Sinsimuka! kutegwa twaabelesye kabotu.
2. Mbaani bakabambilwa magazini ya Sinsimuka!?
2 Sinsimuka!: Magazini eeyi yakabambilwa bantu bakozyenye abantu mwaapostolo Paulo mbakaamba kuti ‘mbaalumi bamu Atene.’ (Mil. 17:22) Bamaalumi aaba kunyina nobakali Banakristo, alimwi taakwe nobakali kwaamvwisya Magwalo. Mbubwenya buyo, basikubala ibakabambilwa Sinsimuka! bamwi bajisi luzyibo lusyoonto pele bamwi tabajisi luzyibo luliloonse kujatikizya Bbaibbele. Ndiza buya kunyina ncobazyi kujatikizya njiisyo zya Banakristo, ambweni tabazisyomi zikombelo, antela tabazyi kuti Bbaibbele lilagwasya. Mulimo mupati wa Sinsimuka! ngwakugwasya basikubala kuzyiba kuti Leza nkwali. Mulimo umbi wamagazini eeyi ngwakugwasya basikubala kuba alusyomo mu Bbaibbele alimwi akubagwasya kuzyiba Bakamboni ba Jehova mbobaindene abasizikombelo bambi.
3. Mbaani bakabambilwa Ngazi Yamulindizi yakwaabila kubuleya alimwi ayakwiiya?
3 Ngazi Yamulindizi: Basikubala bakabambilwa Ngazi Yamulindizi yakwaabila kubuleya mbabaabo balemeka Leza alimwi a Magwalo. Balijisi luzyibo lusyoonto lwamu Bbaibbele, pesi tabazimvwisyi njiisyo zyandilyo. Balikozyenye abantu mbakaamba Paulo kuti ‘balamuyoowa Leza.’ (Mil. 13:14-16) Ngazi Yamulindizi yakwiiya yakabambilwa Bakamboni ba Jehova. Paulo wakali kusyoma kuti aabo bakali kubala magwalo aakwe bakalaazyi Magwalo alimwi bakalijisi luzyibo lwini-lwini lwakasimpe. (1 Ko. 1:1, 2) Mbubwenya buyo, zibalo zijanika mumagazini yakwiiya zyakabambilwa baabo bajanika kumiswaangano yesu alimwi baazyi mabala ngotubelesya anjiisyo zyesu.
4. Nkaambo nzi ncotweelede kwaabala mamagazini ngotwaabila mumuunda akuzyiba zili mukati?
4 Nokuba kuti kanji-kanji twaabila mamagazini oonse obilo aciindi comwe, inga tubandika buyo zijanika mumagazini yomwe. Aboobo, amube amakanze aakubala mamagazini oonse obilo akuzyiba zili mukati. Kuti mwacita oobo, muyoocikonzya kusala zibalo zikonzya kubasika amoyo bantu.