“Mboobu Buumi Ubutamani”
1 Imajwi aa Jesu aalembedwe ku Johane 17:3 ayelede kubikkilwa maanu kapati. Wakalisinizide amakani ngaakali kwaamba—kuti, kuziba Leza a Kristo caamba buumi butamani! Pele sena kolikke ikubaa luzibo lwa Jehova a Jesu nkokuyootupa kuti tulumbulwe abuumi butamani? Peepe. Ibana Israyeli bakalizi kuti Jehova ngowakali Leza wabo, pele bukkale bwabo teebwakali kutondezya kuti basyoma boobo. Nkakaambo kaako wakaleka kubafwida luzyalo. (Hos. 4:1, 2, 6) Sunu mamiliyoni aabantu balakonzya kabalaa “busungu kumakani aa-Leza, pele busungu mbubajisi teensi bwaluzibo.” (Rom. 10:2) Beelede kumuziba Jehova Leza mwini-mwini ‘uuli alikke’ akwiiya mbwanga wabelekelwa munzila yeelede. Akaambo kaboobo, mumwezi oyu wa November tuyoomwaya bbuku lya Luzibo Lutola Kubuumi Butamani. Muyoobelesya nzila nzi kumwaya bbuku lya Luzibo? Zyeezi nzila zimwi zikonzya kumugwasya.
2 Mbwaanga muzeezo wa kupona kukabe kutamani anyika ncintu cipya kubunji bwabantu, kutalika makani munzila eeyi kulakonzya kubapa kuti baswiilile:
◼ “Tuyaabubuzya basimukoboma mubuzyo. Ikuti naa mwatambwa kupona kukabe kutamani munyika iili mbuli yeeyi, sena inga mwazumina? [Amutondezye cifwanikiso cili amapeeji 4-5 mubbuku lya Luzibo. Amulindile kwiingula.] Eeci cilakonzya kumukkomanisya kapati mubuumi bwanu. Pele ino muyeeya kuti ncinzi ncomweelede kucita kutegwa mukacibone kuti cacitika ncobeni? [Amulindile kwiingula.] Amulange ciyandika kucitwa kweelana a bbuku lya Johane 17:3. [Amubale.] Eeli bbuku lyabagwasya banji kubaa luzibo olu lwaalubazu. Sena mulayanda kuba a kkopi lyenu lyakubala? [Amulindile kwiingula.] Ndaakumuswaya ino tuyoobandika ncocili camaanu kusyoma kuti tulakonzya kubaa buumi butamani mpoonya ano anyika.”
3 Mwajokelela kuli baabo mbomwakabandika limwi makani aali kuli Johane 17:3 mulakonzya kuzumanana munzila eeyi:
◼ “Nondakamuswaide ciindi cakamana ndakabala majwi aa Jesu aakondelezya aajanwa ku Johane 17:3, kwalo nkwatusyomezya kuti ikuziba Leza alimwi anguwe caamba buumi butamani. Pele bantu banji basyoma kuti buumi bubotu bukonzya buyo kujanwa kujulu. Muyeeya buti amakani ayo? [Amulindile kwiingula.] Ikuti kaliliko afwaafwi liya bbuku ndindakamusiila, ndiyanda kumutondezya tupango twamu Bbaibbele tusinizya kuti Paradaiso iyoopilusigwa anyika yaansi. [Amubandike maparagrafu 11-16 amapeeji 9-10 mubbuku lya Luzibo.] Ndaakumuswaya ino, ndiyanda kuyoomutondezya ncotukonzya kusyoma zisyomezyo ezi zijanika mu Bbaibbele. Bwalino ambweni mulakonzya kubala cibalo 2 mubbuku lyanu.”
4 Njeeyi nzila njomukonzya kubelesya kubantu bakomba:
◼ “Twalikubandika abasimukoboma kujatikizya ncokuli zikombelo zinji zyaandeene-andeene munyika. Kuli zikombelo zisyoonto-syoonto zisika ku 96 mu Zambia mwalikke azimwi ziinda ku 10,000 nyika yoonse mbwiizulwa. Kakuli kuli buyo Bbaibbele lyomwe. Mumuzeezo buyo wanu, ncinzi cipa kuti kube kunyongana kwazikombelo kuli boobu? [Amulindile kwiingula. Amujalule bbuku lya Luzibo acibalo 5 akubala paragrafu 1.] Muyoojana kwiingula kukkalika moyo kumibuzyo eeyo kwiinda mukubala cibalo eeci. Inga ndakkomana kumusiila bbuku eeli kuti kamuyanda kutegwa mulibale.” Ikuti naa lyabwezegwa amusyomezye kuyoopilukila akwaamba kuti: “Ndaakuboola ino, antela inga twabandika makani aakuti naa zikombelo zyoonse ninzila buyo zyaandeene zitola kubusena bomwe.”
5 Nomwapilukila kuyoozumanana mubandi uujatikizya ncokuli zikombelo zinji, mulakonzya kwaamba kuti:
◼ “Notwakabandika ciindi cakamana, ndakabuzya mubuzyo wakuti naa zikombelo zyoonse ninzila buyo zyaandeene zitola kubusena bomwe. Muyeeya buti amakani aya? [Amulindile kwiingula.] Ndiyanda kumutondezya Jesu ncakaamba kumakani aya kuzwa mubbuku ndindakamusiila. [Amujalule a cibalo 5 mubbuku lya Luzibo akubala maparagrafu 6-7 kubikkilizya a Matayo 7:21-23.] Mulakonzya kamulibuzya kuti nkaambo nzi ncociyandika kapati kuziba kuyanda kwa Leza. Mulajana kuti maparagrafu aatobela alapandulula kabotu-kabotu. Ndamulomba mukabale makani aacaala mucibalo eeci. Ndaakuboola ciindi ciboola ndiyookkomana kumutondezya mbokuyandika kubaa luzibo lwini-lwini lwamu Bbaibbele.”
6 Mulakonzya kuzwidilila kanjikanji kubelesya nzila iigaminina kutalisya ziiyo zya Bbaibbele. Njeeyi nzila yakutalika makani iijanwa apeeji 12 mu bbuku lya “Kukambitsirana”:
◼ “Ndaboola kuti ndimugwasye kwiiya Bbaibbele aŋanda cakutabbadela. Kuti kacikonzyeka, ndiyanda kumutondezya mukaindi kasyoonto buyo bantu mumanyika aali 200 mbobabandika Bbaibbele mumaanda aabo mbuli mikwasyi. Tulakonzya kubelesya kufumbwa mutwe wamakani akati kayeeyi kutalika mubandi wesu. [Amutondezye peeji lya zili mukati mu bbuku lya Luzibo.] Nguli mutwe aawa wamukonda kapati?” Amulindile kutegwa asale. Amujalule kucibalo casalwa akutalika ciiyo muparagrafu yakusaanguna.
7 Njeeyi aimwi nzila iigaminina iizwiidilila njomunga mwasoleka kutalisya ziiyo:
◼ “Ndilaiisya Bbaibbele kanditabbadalisyi alimwi ndijisi ciindi cakwiiya abasikwiiya bambi. Eeli bbuku ndotubelesya kwiiya Bbaibbele. [Amumutondezye bbuku lya Luzibo.] Eeci ciiyo citola buyo myezi misyoonto alimwi cilapa kwiingula kumibuzyo mbuli yakuti: Nkaambo nzi Leza ncalekelede kupenga? Nkaambo nzi ncotucembaala akufwa? Ncinzi cicitika kubayandwa besu bafwide? Alimwi inga twaswena buti kuli Leza?” Mpoonya amubuzye kuti, “Sena inga ndamutondezya mbotwiiya?” Ikuti naa wakaka kubaa ciiyo, amusoleke kusiya bbuku lya Luzibo akusyomezya kumuswaya akale.
8 Elo ndubono luyandika kaka luzibo lwini-lwini lwa Leza a Kristo kuli baabo boonse balujisi! Ikuluziba masimpe caamba buumi butamani muziimo zilondokede. Atubelesye ciindi coonse ncotujana mumwezi oyu wa November kwaabila bamwi luzibo lutola kubuumi butamani.