Kuyandika Bapainiya Bakugwasilizya Ibali 6,000
Sena Inga Mwacita Bupainiya Bwakugwasilizya mu March? April? May?
1 “Kuyandika Bakambausi Bali 1,000” ngowakali mutwe wacibalo cimwi mukumwaya kwa April 1881 kwa Ngazi Yamulindizi. Cakajisi majwi aakukombelezya baalumi abamakaintu boonse balyaabide, “aabo Mwami mbaakapede luzibo lwakasimpe Kakwe” kuti babelesye kufwumbwa ciindi ncobakonzya ikutola lubazu mukumwaya kasimpe kamu Bbaibbele. Aabo ibakali kukonzya kupa cisela caciindi cabo nokuba kwiinda awo mumulimo walo-walo wa Mwami bakakulwaizigwa kuti balisungule kuba bavangeli basikumwaya mabbuku—ibakajulila bapainiya basunu mulyango.
2 Nokuba kuti mazuba acinca kuzwa mbuli mbwaakabede kuma 1800, ikaambo kamwi kalasyaala mbookabede—babelesi ba Leza balyaabide bayanda kuzumanana kubelesya ciindi cinga cakonzeka mukumwaya makani mabotu. Ikubeleka mubupainiya bwakugwasilizya kugwasya basikumwaya bamumbungano ikulondola mbobabeleka mbobayungizya ciindi camumulimo wa Bwami.—Kol. 4:17; 2 Tim. 4:5.
3 Kuzwa nobwakatalikwa, ibupainiya bwakugwasilizya bwacitwa amyaanda yazyuulu zyabakwesu abacizi. Ibusungu mumbazu eyi yamulimo wabupainiya bwakavwula cakuti mu April 1992, mweelwe waatala wabapainiya bakugwasilizya wakasika ku 5,823 mu Zambia! Masimpe nciconya eci ciciyookonzeka kucitika mumyezi ya March kusikila ku May 1997.
4 Twamukulwaizya kuti mube amakanze aabupainiya bwakugwasilizya muli umwi naa imwi myeezi akati ka March, April a May. Nkaambo nzi ncuweelede kubikkilizigwa March? Nkaambo kakuti kono Ciibalusyo calufwu lwa Kristo cili mubuzuba bwa Nsondo, bwa March 23. Taakwe nzila yakubelesya ciindi munsondo zitobelwaa Ciibalusyo kwiinda kutola lubazu cabusungu mumulimo wakukambauka Bwami walo Mwami Mufwutuli wesu, Jesu Kristo ngwaakatalika. Akaambo kabumboni bupati bupegwa mu March, tulakonzya kuyootamba banji bayandide kuti basangane andiswe mukwiibaluka lufwu lwa Kristo. Alimwi March uyooba mwezi waalubazu mukuti ciyooba ciindi cakusaanguna notuyoomwaya bbuku lipya lya, Inzila Yakujana Lukkomano Mumukwasyi. Kunze lyaboobo mwezi wa March ulaa mazuba osanwe aa Mujibelo alimwi osanwe aa Nsondo, iciyoopa kuti cikonzeke kuyungizya mulimo wamumuunda kumamanino aansondo. Aneeno, mukati kamyezi ya April a May, ikuzumanana kusoleka cabusungu mumulimo kuyootucita kuti tulingule luyandisisyo lwakajanika alimwi akutalika ziiyo zipya zya Bbaibbele zyaamunzi, ikubelesya broshuwa ya Ncinzi Leza Ncayanda Kulindiswe? Alimwi tuyoolomya kubeleka lubazu, ikapati kumamanino aansondo katulaa kumwaya kupya kwa Ngazi Yamulindizi alimwi a Awake!
5 Mbaani Beelede Ikucita Bupainiya Bwakugwasilizya?: Ibbuku lya Olinganizidwa Kutsiriza Uministala Wathu, apeeji 113-4, lipandulula kuti: “Kufwumbwa ciimo ncomubede nywebo, kuti kamubbapatizidwe, kamulaa ciimo cakulilemeka, kamukonzya kulibambila kuti mukatole mawoola aali 60 amwezi mumulimo wamumuunda, alimwi mulasyoma kuti inga mwabeleka mwezi omwe naa kwiinda awo mubupainiya bwakugwasilizya, ibaalu bambungano bayookkomana kulanga kulembela kwenu kumulimo ooyu mubotu.” Sena inga mwabamba ciindi cakubaa coolwe eci mu March? April? May?
6 Kuti kabasungweede ibakabunga kabaalu alimwi kuti bagwasilizigwa abasikumwaya bambi boonse ciyoopa kuti kuzumina kwiitwa oku kwabapainiya bakugwasilizya bali 6,000 kukazwidilile kapati. (Heb. 13:7) Boonse basilutwe bamikwasyi balakulwaizigwa kusinizya naa mbangaye banamukwasyi ibakonzya kusangana mumakamu aabapainiya bakugwasilizya muli umwi naa imwi akati kamyezi eyi iiboola.—Int. 148:12, 13; amweezyanye a Incito 21:8, 9.
7 Mutabindi kuyeeya kuti bupainiya bwakugwasilizya ncintu ncomunga mwalela kusika akaambo kamulimo wenu wakunyika waciindi coonse, iciindi ciyandika kucikolo, mikuli yamukwasyi, naa mikuli imwi yamu Magwalo. Bamwi inga catabaubila ikutola lubazu; nokuba boobo, kwiinda mubulondo bubotu alimwi azilongezyo zya Jehova, balakonzya kuzwidilila. (Int. 37:5; Tus. 16:3) Iluyando lwakutola lubazu mumulimo wabupainiya alube ndolweendelezya bukkale bwenu; bwalo bukkale bwenu butabi mbobweendelezya luyando lwenu lwakucita bupainiya. (Tus. 13:19a) Aboobo mukumuyandisisya Jehova alimwi abantuma, ibanji balakonzya kucinculula bubambe bwaciindi cansondo ansondo kutegwa bayungizye mulimo wabo mwezi omwe-omwe. (Lk. 10:27, 28) Kuli zilongezyo zinji ziyobwedwe izilindila baabo ibasolekesya mumulimo wa Bwami.—1 Tim. 4:10.
8 Icijanika Kwiinda Mubupainiya Bwakugwasilizya: Ikusoleka kwazyuulu zyababelesi ba Leza camoyo woonse mukucita bupainiya bwakugwasilizya kwaleta ngoloolo mpati yantembauzyo kuli Jehova. Aaba basikwaambilizya Bwami mbobasolekela kumwaya makani mabotu kubantu banji, bayaabuswena kuli Jehova lwakwe nkaambo balaiya kuyaamisya alinguwe kukutambula muuya wakwe alimwi azilongezyo zyakwe.
9 Ikubaa bapainiya bakugwasilizya, baciindi coonse, alimwi abaalubazu ibasungweede akati kesu kuleta muuya mupya uuyumya-yumya mukati kambungano. Ikusungwaala kwabo kulayambukila nobalwiida cibacitikila mumuunda. Eci cipa bambi kuti baindulule kweeleka zintu nzyobabikkide ambele alimwi ambuli mbobanga bakonzya kuyungizya lubazu ndobatola mumulimo ooyu mupati cini-cini. Imucizi umwi walo wakabbapatizigwa kalaa myaka yakuzyalwa iili 70 mpoona-mpoona wakatalika kucita bupainiya bwakugwasilizya cakuzumanana. Nokwakainda myaka misyoonto naakabuzigwa ncaakacili kusoleka kapati boobo mumulimo wabupainiya bwakugwasilizya mwezi amwezi, wakapandulula ategwa wakali kulimvwa kuti myaka yakwe mitaanzi iili 70 yakali yanyonyooka buyo, elyo taakali kuyanda kuti kacinyonyoona imbi myaka yakwe yakasyeede!
10 Umwi aumwi sikutola lubazu mumulimo wabupainiya bwakugwasilizya ulaiya buhaazibwene mumulimo. Umwi kamboni uucili mwana wakalyaambilila mwini ategwa: ‘Kubwana ndakali kubasindikila bazyali bangu mumilimo yabo yakukambauka. Mulimo wamumuunda wakali kunoneezya cini-cini. Nokuba boobo muciindi ndakabona kuti kucikolo ndakaliindene abeenzuma. Elyo cakatalika kunditunina ikwaambaula makani aakasimpe abasicikoloma. Kukukambauka kuŋandaa ŋanda, ndakatalika kuyoowa kuti ambweni ndilaswaana umwi wakucikolo ngwendizi. Ndasyoma mebo penzi lyangu lyakali lyakuyoowa muntu. [Tus. 29:25] Nindakamanizya cikolo, ndakasala kuti ndisole bupainiya kwakaindi-indi buyo. Eeci cakapa kuti kukambauka kundisungwaazye munzila njibwatakaningacitide. Teendakacili kukubona kuba cintu cakunoneezya, naa ikuba mukuli uuminya pe. Mbundakali kubona mbindakali kuyiisya Bbaibbele kabaya ambele mukasimpe, ndakali kukondwa kubona bumboni bwakuti Jehova Leza wakali kukugwasilizya kusoleka kwangu.’ Ooyu mukubusi wakaya ambele akubeleka mubupainiya bwaciindi coonse.
11 Ikulanga zinga zyakonzeka, ikuti bavwula ibacita bupainiya bwakugwasilizya mumbungano, ilubazu lulaloma kubelekwa. Imukwesu uulanganya zyakwaabanya mbazu ulakonzya kulomba bapainiya bakugwasilizya kuti bagwasye mukubeleka mbazu zitabelekwi-belekwi. Ikutolelezya bulilu alimwi akubumanina mumulimo buzuba boonse kuyoopa kuti cikonzeke ikutubeleka notuba tumpetu-mpetu toonse twalubazu ituli mulaale.
12 Baalu Beelede Kulibambila Kakucili Ciindi: Lyoonse mumyezi eyi yotatwe iiboola, kweelede kumvwanwa kuti kulibambilwe misyobo yiindene-indene yamulimo wakukambauka kuziindi zindene-indene nsondo ansondo, kubikkilizya akumazuba akumangolezya, kutegwa bavwule mbuli mbokukonzeka aabo ibatola lubazu. Kunze lyamulimo walyoonse wakuŋandaa ŋanda, abikkilizye aziindi zyakukambauka kwamumigwagwa, kubeleka mulubazu lwamakwebo, alimwi akuswaya batakkaliwo amunzi. Kwiinda mukucita boobu, baalu bayoogwasya baabo bacita bupainiya ikutola lubazu mumulimo antoomwe ambungano aciindi iciyooinda kukonzeka akuuba-uba kweelana abubambe bwabo bapainiya. Imbungano yeelede kuzibisigwa bubambe boonse bwamulimo wamumuunda. Ibweendelezi bwamiswaangano yoonse yamulimo wamumuunda bweelede kuloma. Kunze lyaboobo, kweelede kakubambidwe zyaabilo zyalubazu alimwi kweelede kufwambaana kooda mamagazini amabbuku ambi.
13 Amulicitile Bubambe Bwamumulimo Nobeni: Umwi mukwesu, iwakalengeene kubupainiya bwakugwasilizya kumatalikilo, wakati: “Ncuuba-uba loko kwiinda mbundakali kuyeeya kuti ciyooba. Kuyandika buyo bubambe bubotu bwaciindi.” Apeeji yeelezya yapepa lyamukati eli, sena mwabona bubambe bwaciindi cabapainiya bakugwasilizya ibunga bwakonzeka kulindinywe? Mawoola aali 15 buyo ngaayandika nsondo ansondo kuli bapainiya bakugwasilizya.
14 Kutegwa babeleke mubupainiya bwakugwasilizya, ibakaintu batabeleki mulimo wakunyika alimwi ababelesi aabo banjila kumazuba kanjikanji balabamba mafwumofwumo kuti abe amulimo wamumuunda. Bana bacikolo alimwi ababelesi banjila akati kamasiku kanjikanji balakonzya kupa ciindi cakumazuba kwini mumulimo wamumuunda. Ibabeleka milimo yaciindi coonse balo bajana kuti cilakonzeka kuti ambweni balombe buzuba bwakulyookezya mukati kansondo naa bape mamanino aansondo mumulimo, kunze lyakukambauka kumangolezya. Ibanji aabo balaa mulimo wamumuunda uuvwulide kumamanino aansondo basala myezi iilaa mamanino aansondo aali osanwe aazwide. Oobu kono mbuubede mwezi wa March, alimwi mbubonya August a November. Ikubelesya bubambe bwaciindi ibutalembedwe apeeji 6 bwalo bwapegwa kuti bube busolozi, amuyeeye kabotu-kabotu alimwi cakusinizya ikuti naa mbuli bubambe bwaciindi ibuyoomubeda bwenu-bwenu kweelana abukkale bwenu.
15 Bumwi bubotu bwabubambe obu bwabupainiya bwakugwasilizya nkuti bulanyoneka. Mulakonzya kusala myezi njomuti kacite bupainiya, alimwi mulakonzya kwiindulula-indulula mbuli mbomuyanda. Kuti kamuyanda bupainiya bwakugwasilizya bwalyoonse pele tamukonzi, sena kuli nomwakayeeyede zyakulilembya ikuyaabusotoka mwezi omwe-omwe mwaka woonse? Pesi nkobali bamwi ibakonzya kubeleka mubupainiya bwakugwasilizya kwaziindi zilamfwu cakutayaabusotauka.
16 Nkulizibizya Mukulibambila Mulimo Wabupainiya Bwaciindi Coonse: Ibanji bajisi muuya wabupainiya inga balayanda kuti babeleke bupainiya bwaciindi coonse, pele balazumbauzya naa inga balicijisi ciindi, ibukkale bweelede, alimwi anguzu ziyandika. Cakutadooneka bunji bwabaabo ibali mbaapainiya baciindi coonse lino kukusaanguna bakabelesya mulimo wabupainiya bwakugwasilizya kuti abe mpaakuzibizya mukulibambila mulimo waciindi coonse. Kwiinda mukuyungizya woola lyomwe buyo mububambe bwaciindi cabupainiya bwakugwasilizya ibuzubaa buzuba, naa kuyungizya buzuba bomwe buzwide ansondo ansondo, cilakonzeka ikuzuzikizya ciindi cabupainiya bwaciindi coonse. Kutegwa mubone naa eci cilakonzeka kulindinywe, mbuti ino kusoleka kupa mawoola aali 90 mumulimo mumwezi umwi wabupainiya bwakugwasilizya? Aciindi mpoona awo mulakonzya kubona mpomukonzya kucita nyendo zyakupilukila alimwi aziiyo zya Bbaibbele, zyalo iziyoomucita kuti mube amulimo wabupainiya uuzulide.
17 Umwi mucizi wakatola lubazu mubupainiya bwakugwasilizya kwamyezi iili cisambomwi itobelenye. Coonse eco ciindi makanze aakwe akali akunjila bupainiya bwaciindi coonse. Kweendelana amakanze ayo wakasola milimo yakunyika yone yiindene-indene kalangila kujana bukkale bunga bulamugwasya kwaakonzya mawoola aali 90 aayandika kuli bapainiya baciindi coonse. Mwezi amwezi, wakali kucibambulula ciindi munzila yomwe naa zyobile kutegwa asanganye naa inga cakonzeka kuzulizya. Pele naakazilanga, wakalimvwa kulela kusika kumulimo waciindi coonse. Nokuba boobo wakazumanana kulomba busolozi kuli Jehova. Mpoona bumwi buzuba naakali kulibambila Muswaangano Wamulimo, wakabala cibalo cimwi mu Mulimo Wesu Wabwami wa September 1991 mwalo mwakaambwa kuti: “Muciindi cakwiide kuyeeya mawoola aayandika, mbuti ino kugamika mizeezo kukuyungizya kwaciindi cakutola lubazu mumulimo wakutebula? (Joh. 4:35, 36)” Ulaluula ategwa: “Aaka kaambo ndakakabala ambweni ziindi zyosanwe naa cisambomwi, elyo ndakasyoma kapati kuti oobu mbwiinguzi bwa Jehova. Aciindi mpoona awo ndakasala kuti ndinjile mumulimo wabupainya bwaciindi coonse.” Nokuba kuti bubambe bwakumilimo yakunyika bwakacili kulela kule-kule kuti kube mbuli mbwaakali kuyandika, wakalembela kuti abe painiya waciindi coonse. Kwiinde nsondo yomwe, bukkale bwakwe bwakacinca, kumilimo yakunyika wakapegwa mawoola eeni-eni aakamweelede. Mboobu mbwaakazibona zintu, “Sena eli ndijanza lya Jehova, naa pe?,” amane wakayungizya wati: “Ciindi nomulomba busolozi kuli Jehova akubutambula, mutatiji pe, amubuzumine.” Ikuti kamuyandisisya kucita bupainiya bwaciindi coonse, ambweni kumamanino aamyezi yotatwe yabupainiya bwakugwasilizya ya March, April, alimwi a May, mulakonzya kusyoma kuti ncobeni anywebo mulakonzya kuzwidilila.
18 Tulasyoma kuti Jehova uyoobulongezya busungu bwabantu bakwe alimwi uyoobagwasya mukusoleka kwabo mbobamwayila makani mabotu aalufwutuko mukati kaciindi eeci cilibedelede icamulimo wakumamanino aamainza. (Is. 52:7; Rom. 10:15) Sena muyooingula kukwiitwa kwabapainiya bakugwasilizya ibali 6,000 kwiinda mukutola lubazu mu March? April? May?
Kabbokesi kali apeeji 3]
Mbokuzwidililwa mu Bupainiya Bwakugwasilizya
■ Amusyome kuti muyoocikonzya
■ Amupaile kuli Jehova kuti alongezye kusoleka kwenu
■ Amulombe umbi sikumwaya kuti acite bupainiya andinywe
■ Amucite bubambe bwaciindi camumulimo ibukonzeka
■ Amuode mamagazini aanga azulila
■ Amugwasilizye bubambe bwamulimo ibucitwaa mbungano
■ Amuyandaule ziindi zyakuti mukambaukile mukwiizya