Iziiyo zya Bbaibbele Zigwasya Bantu Kuba Basiciiya
1 “Ncinzi ino icindikasya kubapatizigwa?” mweendelezi waku Etiopiya oobo mbwaakabuzya Filipo naakamana ‘kumwaambila makani mabotu aa-Jesu.’ (Inc. 8:27-39) Ooyu mweendelezi wakajisi kale luyando lwamalembe aa Leza aakamunikilwa amuuya, alimwi naakamana kugwasigwa kuli Filipo munzila yakumuuya, wakalilibambilide kuba siciiya. Pele tabali bantu boonse bazumina kuti bayandika kulingula Magwalo balo lwabo beni.
2 Mucoolwe, imbunga ya Jehova yamwaya broshuwa mpya itegwa A Book for All People, yakukulwaizya bantu kulingula makani aa Bbaibbele aamba zyamazubaano. Makani aali mubroshuwa ayelede kukonda bantu balomene ibanga ambweni baliyiide pele tabalizi kabotu Bbaibbele. Eeyi broshuwa mbotu kapati yakabambilwa kukulwaizya bantu kuyanda kubala Bbaibbele.
3 Nomutalika ciiyo ca Bbaibbele, inga cagwasya kwaalangila limwi malailile aali mupepa lyamukati lya Mulimo Wesu Wabwami wa June 1996 aajatikizya mbokucitwa ciiyo cigwasya mubbuku lya Luzibo. Nomweendelezya ciiyo, amuyeeye sikwiiya mbwayabuya ambele kutegwa mubone naa mpali mpayandika kugwasya. Amumukulwaizye sikwiiya kulibambilila limwi ciiyo cakwe, kabala magwalo aamuciiyo. Kwiingula nkwayingula mumajwi aakwe inga kwatondezya luyando ndwajisi kukasimpe. Ibafwambaana kuyaambele kanjikanji mbaabo babala mabbuku aa Sosaiti aambi alimwi ibajanika lyoonse kumiswaangano yambungano. Amumukulwaizye kwaambila beenzinyina zintu nzyayiya nobali mukwiizya. Amumutondezye ciyandika kutegwa aye ambele munzila yakumuuya. Tutazumanani kwiiya abantu batayandi kubweza ntaamu. Basikwiiya beelede kulisalila kwiiya, beelede kuyumina kasimpe alimwi akubelekela kuti bakalyaabe akubbapatizigwa.
4 Mumaanda mumwi takucitwi buyo ciiyo comwe nkaambo umwi aumwi ulaaciiyo cakwe. Pele kubaa ciiyo comwe camukwasyi icicitilwa antoomwe ncibotu kanjikanji nkaambo inga cagwasya kukamantanya mukwasyi antoomwe munzila yakumuuya.
5 Jesu ulailila kuti tuunke tukagwasye bantu kuba basiciiya. (Mt. 28:19) Ikutegwa eco cikonzeke, tweelede kucita ziiyo zya Bbaibbele izinga zyagwasya basikwiiya kusika aciimo mpobanga babuzya kuti, “Ncinzi ino icindikasya kubapatizigwa?”