Ncinzi Ncomunga Mwamwaambila mu Juda?
1 Mumwaanda wamyaka wakusaanguna, ibunji ‘bwabana ba Israyeli’ bakakutambula camaanza obile ikukambauka kwa Jesu abaapostolo bakwe. (Inc. 10:36) Mbubwenya mbucakali kaindi, ibunji bwabama Juda sunu ibabombe myoyo balakateelelesya kasimpe ikutali ku Israyeli kwalo pele aku Russia aku United States alimwi amumasi ambi. Sena mulayanda kuzwidilila ikukambaukila bama Juda? Inzila zitobela ziyoomugwasya kukambauka cabusongo kuli bama Juda bakombi alimwi abatakombi.
2 Ikukambaukila bama Juda Bakombi: Tweelede kuziba kuti bama Juda bakombi babikkila kapati maanu kukutobela zilengwa zyabamayi ikwiinda kupandulula njiisyo zyabukombi zigaminide. Ezi zilengwa bazibona kuti zilijisi nguzu mbubwenya mbuli Magwalo. Aboobo inga tabayandisisyi ikubandika twaambo tupati-pati twamu Bbaibbele. Alimwi bayeeya kuti Ibbaibbele ndibbuku lya Banakristo. Akaambo kaboobo, inga cainda kugwasya ikuti naa notwaamba Bbaibbele katubelesya majwi mbuli aakuti “Imagwalo aa Cihebrayo,” “Tora” naa “Imagwalo.” Ibbuku libotu kapati ilyakabambwa kakuyeeyedwe bama Juda mumizeezo ndi broshuwa lyakuti Will There Ever Be a World Without War?
3 Mitwe nzi iikonzya kubakkomanisya bama Juda bakombi? Basyoma kuti nkwali Leza omwe uubabikkila kapati maanu ibantunsi. Alimwi basyoma kuti Leza ulanjilila mubweende bwazintu bwabantunsi. Mulakonzya kubelesya twaambo otu ikutegwa mujane kaambo komwe nkomuzuminizyanya. Kunze lyaboobo, ibunji bwaba Juda balizi kabotu-kabotu mbuli mbubakapenga bama Judanyina mu Nkondo Yanyika Yabili. Balalibuzya ncaakazumizila kutalulama kuli boobu Leza alimwi anobuyoomana bubi. Tulilibambilide kabotu kwiingula mibuzyo iili boobu kwiinda mukwaamba cakacitikila bakwesu kuciindi Cakunyonyoonwa kupati.
4 Ikutegwa tutamusowi siŋanda, ncibotu kutafwambaana kwaaleta makani aajatikizya kuziba Mesiya. Pele, mulakonzya kubandika mulimo ngwaakabeleka Musa mubukkale bwabana Israyeli akubuzya siŋanda kuti naa ulasyoma kuti njiisyo zya Musa zicibeleka asunu. Casika ciindi ceelede cakubandika makani aajatikizya Mesiya, mulakonzya kusaanguna kubala bbuku lya Deuteronomo 18:15 lyalo lyaamba kuti: “Jehova Leza wanu ulamubusizya musinsimi, akati kabanabakwanu, uuli mbuli ndime. Amuswiilile nguwe.” Amumubuzye siŋanda ikuti naa nguni ngwaakali kwaamba Musa kuti musinsimi mbuli nguwe. Mpoonya amubandike twaambo tusyoonto ituli mubroshuwa lya World Without War apeeji 14 muncali 17 a 18.
5 Bama Juda Batakombi Bazibona Bumbi Zintu: Tabali boonse ibalyaamba kuti mbaama Juda ibazizumina njiisyo zyabukombi bwaba Juda. Ibunji bwaba Juda bazilanga munzila yakumubili zintu. Babikkila kapati maanu ikusumpula musyobo waba Juda iwaandeene uujisi zilengwa alimwi alwiiyo lwawo ikwiinda kutobela bukombi bwaba Juda. Bama Juda bamwi batakombi mbaasikudooneka alimwi ibasyoonto tabasyomi pe kuti Leza nkwali. Kumatalikilo mulalangilwa kutazwidilila ikuti naa mwavwuzya kuzubulula Magwalo aa Cihebrayo. Inga cainda kugwasya kuti naa mubandi wanu mwaweendelezya mbuli mbomunga mwacita mubandi umbi uli woonse amuntu uutali mukombi. Mucikozyanyo, mulakonzya kupandulula mbolitugwasya Bbaibbele sunu. Ikuti naa siŋanda tasyomi kuti Bbaibbele lyakasololelwaa muuya, itwaambo tumwi ituli mubroshuwa lya World Without War tulakonzya kugwasya ikapati oto itujanwa apeeji 3 acibeela cilaa mutwe wakuti “The Bible—Inspired by God?”
6 Nomukambaukila mu Juda, mulakonzya kwaamba kuti:
◼ “Ibunji bwesu tulibuzi buumba ibuboola akaambo kakufwidwa muyandwa wesu. Ino muyeeya kuti ncinzi cicitika twafwa?” Amulindile bwiinguzi. Mpoonya amulombe siŋanda kuti alange kukabbokesi kalaamutwe wakuti “Death and the Soul—What Are They?” ikali apeeji 22 mubroshuwa lya World Without War. Aka kabbokesi keezyanisya caambwa mu Magwalo kujatikizya buumi bumbi lwainda lufwu alimwi ancobayiisya bamayi baci Juda. Mpoonya amulange muncali 17 apeeji 23 akutondezya siŋanda kuti ikweelana a Magwalo, ibafwide bayoobusigwa anyika yaparadaiso. Amusoleke kumusiila broshuwa. Nomulibambila lweendo lwakupilukila, mulakonzya kwaamba kuti Jobu wakajisi bulangizi bwabubuke. Amubelesye magwalo aali kumamanino aamuncali 17 akwaamba kuti muyoopilukila kuti mukazyooabandike.
7 Imabbuku aa Matayo a Luka a Johane alimwi a Incito aluula zintu nzyobakacita bama Juda ibakateelela akutobela zyakali kwaamba kasimpe. Inzila ya Jehova iisololela kubuumi butamani icijulidwe. Ibunji bwabama Juda babombe myoyo balakonzya kwiiya makani aajatikizya Jehova Leza wakasimpe ikutegwa abalo bakakonzye kupona kukabe kutamani munyika ya Leza mpya.—Mik. 4:1-4.