Cibeela 8—Ikweendelezya Ziiyo zya Bbaibbele Ziyaambele
Kusololela Basikwiiya ku Mbunga
1. Nkaambo nzi ncociyandika ikwaamba kaambo komwe kujatikizya mbunga ya Jehova amvwiki nomweendelezya ciiyo ca Bbaibbele?
1 Makanze eesu notweendelezya ziiyo zya Bbaibbele taali buyo aakuyiisya nzyotusyoma pele akugwasya basikwiiya kuba cibeela cambungano ya Bunakristo. (Zek. 8:23) Ibroshuwa yakuti Mboni za Yehova—Kodi Iwo Ndani? Kodi Amakhulupirira Chiyani? ilakonzya kutugwasya kucita boobu. Amubape broshuwa eeyi basikwiiya Bbaibbele bapya alimwi akubakulwaizya kunooibala. Kunze lyaboobo, amvwiki amube aciindi cakumuyiisya kaambo komwe kujatikizya mbunga ya Jehova nomweendelezya ciiyo.
2. Mbuti mbomukonzya kubakulwaizya basikwiiya Bbaibbele ikujanika kumiswaangano yambungano?
2 Miswaangano ya Mbungano: Nzila iiyandika kapati basikwiiya Bbaibbele mobazyiba mbunga ya Leza nkwiinda mukuyanzana andiswe kumiswaangano ya mbungano. (1 Kor. 14:24, 25) Aboobo, mulakonzya kutalika kubazibya kwiinda mukupandulula miswaangano iili musanu iicitwa amvwiki, kutalika amuswaangano omwe aciindi nsini. Amubaambile mutwe wamakani aabuleya uutobela. Amubatondezye makani ayoolangwa-langwa lya Ciiyo ca Ngazi Yamulindizi alimwi alya Ciiyo Cabbuku Cambungano. Amupandulule Cikolo ca Mulimo Weendelezyegwa a Leza alimwi a Muswaangano wa Mulimo. Mwapegwa makani mucikolo ambweni mulakonzya kulibambila antoomwe ambabo. Amubaambile twaambo tupati-pati twabandikwa kumiswaangano. Amubelesye zifwanikiso zili mumabbuku eesu ikubagwasya kubona zitola busena. Mbomwatalikila buyo ciiyo, amubatambe kuyoojanika.
3. Nimbazu nzi zyambunga nzyotunga twabandika?
3 Ciibalusyo, miswaangano mipati alimwi akuswaya kwa mulangizi wabbazu nokulondelela, amukkale ansi kupandulula alimwi akukulwaizya sikwiiya kulangila bubambe oobu. Bucebuce amwiingule mibuzyo mbuli yakuti: Nkaambo nzi ncotwiitwa kuti Bakamboni ba Jehova? Nkaambo nzi ncotwiita masena motuswaanganina kuti Maanda aa Bwami? Ino mmilimo nzi baalu abakutausi njobabeleka? Ino mulimo wakukambauka alimwi azilawo motukambaukila zibambidwe buti? Ino mabbuku eesu abambwa buti? Ino mbunga yaajana kuli mali? Ino ofesi yamutabi alimwi a Kabunga Keendelezya bajisi milimo nzi mukulanganya mulimo ooyu?
4, 5. Ino mbuti mavidyo eesu mbwakonzya kugwasya ikumvwisya mboibede mbunga alimwi akutondezya kulumba?
4 Mavidyo Aagwasya: Aimbi nzila basikwiiya Bbaibbele mobakonzya kubona mbunga ya Jehova yeebeka nkwiinda mumavidyo eesu. Ividyo itegwa To the Ends of the Earth itondezya mulimo wesu wakukambauka ngotucita nyika yoonse; Our Whole Association of Brothers itondezya bukwesu bwanyika yoonse; alimwi aya United by Divine Teaching itondezya lukamantano ndobajisi Bakamboni ba Jehova. Imukaintu iwakali kutambula mamagazini eesu kubikkilizya amabbuku amwi kwamyaka iili musanu wakalosya misozi naakali kweebelela vidyo yakuti Jehovah’s Witnesses—The Organization Behind the Name. Wakatalika kubasyoma Bakamboni bakamuswayide, pele naakamana kweebelela vidyo wakabona kuti wakali kukonzya kwiisyoma mbunga ayalo. Iciiyo cakatalisyigwa anguwe mane mvwiki yakatobela wakajanika kumiswaangano ku Ŋanda ya Bwami.
5 Kwiinda mukujana ciindi cili mbocibede cakuba ambotwiiya limwi mvwiki amvwiki alimwi akubelesya zibelesyo ziliko, bucebuce tulakonzya kusololela basikwiiya Bbaibbele ku mbunga eeyo Jehova njabelesya mazuba aano.