Malifalensi Aamu Kabbuku Kamuswaangano Wabuumi Amulimo Wesu
NOVEMBER 4-10
MBONO IZILI MU JWI LYA LEZA | 1 JOHANE 1-5
“Mutayandi Nyika Noziba Zintu Zili Munyika”
(1 Johane 2:15, 16) Mutayandi nyika noziba zintu zili munyika. Ikuti naa muntu kayanda nyika, nkokuti iluyando lwa Taata taluko pe mulinguwe; 16 nkaambo zintu zyoonse zili munyika—zisusi zyanyama alimwi azisusi zyameso amambonwa akaambo kazintu nzyajisi muntu—tazizwi kuli Taata pe, pele zizwa munyika.
Amuccilile Citondezyo Ncaakapa Jesu
Ibamwi balakonzya kuyeeya kuti tazili zintu zyoonse zyamunyika izilubide. Nokuba kuti masimpe aayo, inyika azisusi zyayo ilakonzya kutunyonganya mukubelekela Jehova. Alimwi kunyina cintu cipegwa anyika cibambidwe kutugwasya kuba acilongwe a Leza. Aboobo, ikuti naa twayandisya zintu zyamunyika, nokuba zintu eezyo zili kabotu, nkokuti tuliletela manyongwe. (1 Timoteo 6:9, 10) Kunze lyaboobo, imasimpe ngakuti zinji munyika tazili kabotu alimwi zilakonzya kutusofwaazya. Ikuti katweebela zintu zimwi acipekupeku zyalo zikulwaizya lunya, kuba alubono lunji naa ikutalilemeka kumakani akoonana, zintu eezyo zilakonzya kulibonya kuti zili buyo kabotu—mane akutoongelezya. Ikuti katusangana abantu bagamide buyo kusumpula bukkale bwabo naa ikuyandaula makwebo, zintu eezyo zilakonzya kuba nzyezintu nzyotubikkila kapati maano andiswe.—Matayo 6:24; 1 Ba-Korinto 15:33
(1 Johane 2:17) Kunze lyaboobo, inyika ilamana antoomwe azisusi zyanjiyo, pele ooyo uucita kuyanda kwa Leza unooliko lyoonse mane kukabe kutamani.
Ino Mweelede Kuba Muntu Uuli Buti?
Acimbi cintu icikonzya kutugwasya kutantamuka “zyintu zili munyika,” nkuyeeya majwi aa Johane aakasololelwa amuuya uusalala aakuti: “Nyika iyaabumana antoomwe azisusi zyayo, pele ooyo uucita kuyanda kwa Leza unooliko lyoonse mane kukabe kutamani.” (1 Joh. 2: 17) Bweende bwa Saatani bulibonya kuba bwancobeni alimwi bukkalilila. Nokuba boobo, bumwi buzuba, buyakumana. Kunyina cintu cijanwa munyika ya Saatani icikkalilila. Kuzumanana kuyeeya kaambo aaka kuyakutugwasya kuti tuteenwi akoongelezya kwa Diabolosi.
Kuyandaula Mbono Zyakumuuya
(1 Johane 2:7, 8) Nobayandwa, tandimulembeli mulawo mupya pe, pele mulawo wakaindi ooyo ngomwajisi kuzwa kumatalikilo. Imulawo wakaindi ooyu ndijwi eelyo ndimwakamvwa. 8 Pele lino ndimulembela mulawo mupya, iwamasimpe kujatikizya nguwe alimwi andinywe, nkaambo mudima uyaabumana eelyo mumuni wini-wini watalika kale kumweka.
Ziyeekezyo zya Jehova Zilasyomeka
Magwalo aa Banakilisito aa Chigiliki alijisi ziyeekezyo zyakutugwasya kutondezya luyando kuli umwi amweenzinyina. Jesu wakaamba kuti mulawo wabili mupati ‘nkuyanda simukobonyoko mbubonya mbuli mboliyanda omwini.’ (Mt. 22:39) Mbubwenya buyo, awalo Jakobo mwanookwabo Jesu wakaamba luyando kuti “mulawo wamwami.” (Jak. 2:8) Mwaapostolo Johane wakalemba kuti: “Nobayandwa, tandimulembeli mulawo mupya pe, pele mulawo wakaindi ooyo ngomwajisi kuzwa kumatalikilo.” (1 Joh. 2:7, 8) Ino Johane wakali kwaamba nzi naakati “mulawo wakaindi”? Wakali kwaamba mulawo wakutondezya luyando. Wakali “wakaindi” mukuti Jesu wakaupa myaka minji kaindi, “kuzwa kumatalikilo.” Pele alimwi wakali “mupya” mukuti kutondezya luyando oolo kwakali kuyandika kulyaaba, kwalo basikwiiya nkobakali kuyandika ciindi nobakali kujana bukkale bupya. Mbotuli basikwiiya ba Kristo, sena tulalumba kucenjezya ikutugwasya kutantamuka muuya wakuliyanda uuzwide munyika uukonzya kunyonganya luyando lwesu kuli basimukoboma?
(1 Johane 5:16, 17) Ikuti umwi wabona munyina kacita cibi citaleteli lufwu, uyoolomba, alimwi Leza uyoopa buumi kuli yooyu, inzya kuli baabo bataciti cibi cikonzya kuletela lufwu. Kuli cibi ciletela lufwu. Eeci ncecibi ncenditamwaambili kuti amulombele. 17 Kutalulama koonse ncibi, nokuba boobo kuli cibi citaleteli lufwu.
it-1 862 ¶5
Kulekelela
Cileelela kupailila bamwi kuli Leza kutegwa abalekelele, noiba mbungano yoonse buya. Musa wakacita oobo kujatikizya bana Israyeli, ikulyaambilila kulubizya kwacisi cabo alimwi akulomba kulekelelwa, aboobo Jehova wakamuswiilila. (My. 14:19, 20) Awalo Solomoni, ciindi tempele nolyakali kwaabwa, wakapailila kuti Jehova abalekelele bantu bakwe ikuti babisya alimwi akuleka nzila zyabo zibi. (1Bam. 8:30, 33-40, 46-52) Ezara wakabaiminina ba Juda ibakapilusyigwa kuzwa mubuzike mukulyaambilila zibi caantangalala. Mupailo wakwe iwakali kuzwa ansi aamoyo alimwi akulomba kwakwe zyakapa kuti bantu babweze ntaamu kutegwa balekelelwe a Jehova. (Ezr. 9:13–10:4, 10-19, 44) Jakobo wakakulwaizya yooyo iwakali kuciswa kumuuya kwiita baalu bambungano kutegwa bamupailile, mpoonya “ikuti naa wakacita zibi, ulalekelelwa.” (Jak. 5:14-16) Nokuba boobo, kuli “cibi ciletela lufwu,” nkokuti kubisyila muuya uusalala, ikucita cibi acaali kwalo kutakonzyi kulekelelwa. Munakristo teelede kubapailila aabo ibabisya munzila eeyi.—1Joh. 5:16; Mt. 12:31; Heb. 10:26, 27.
AMUSUGWAALE MUMULIMO WAMUMUUNDA
Mibuzyo Yabasikubala
Ciindi mwaapostolo Johane naakalemba kuti “luyando lulondokede lukusowela anze kuyoowa,” ino ncinzi ncaakali kupandulula kwiinda mukwaamba kuti “luyando lulondokede,” alimwi ino ‘nkuyoowa’ nzi kusowelwa anze?
Mwaapostolo Johane wakalemba kuti: “Kunyina kuyoowa muluyando, pele luyando lulondokede lukusowela anze kuyoowa, nkaambo kuyoowa kulatusinkilila. Ncobeni, ooyo uuyoowa tanalondolwa pe muluyando.”—1Joh. 4:18.
Twaambo tuzingulukide kapango aaka tutondezya kuti Johane wakali kwaamba kujatikizya kwaambaula cakutayoowa, nkokuti kuswaangana kuliko akati kaluyando lwa Leza alimwi akwaambaula cakutayoowa kujatikizya nguwe. Tulakonzya kucibona eeci kwiinda mumajwi ngotubala mukapango 17 ikaamba kuti: “Oobu mbolwalondolwa luyando mulindiswe, kutegwa tukacikonzye kwaamba cakutayoowa mubuzuba bwalubeta.” Munakristo mbwamuyandisya Leza alimwi ambwalimvwa kuyandwa anguwe kulakujatikizya kwaambaula kwakwe cakutayoowa naa kwaambaula cakuyoowa ciindi napaila kuli Leza.
Majwi aakuti “luyando lulondokede” alayandika kapati. Kweelana ambolibelesyedwe mu Bbaibbele, ibbala lyakuti ‘kulondoka’ talili lyoonse nolyaamba kulondoka cakumaninina, pele kanji-kanji lyaamba kulondoka ikutali cakumaninina. Mucikozyanyo, mu Mulumbe wakwe Waacilundu, Jesu wakaamba kuti: “Mweelede kulondoka mbuli Uso wakujulu mbwalondokede.” Jesu wakali kwaambila basikumutobela kuti, ikuti naa kabayanda buyo baabo ibakali kubayanda, nkokuti luyando lwabo tiilwakamaninide, tiilwakali lwini-lwini pe. Bakeelede kululondola naa kutondezya luyando lumaninide kwiinda mukubayanda nobaba basinkondonyina. Mbubwenya buyo, ciindi Johane naakalemba kujatikizya “luyando lulondokede,” wakali kwaamba luyando lwa Leza luzwa ansi amoyo, ilumaninide alimwi iluzijatikizya mbazu zyoonse zyabuumi bwamuntu.—Mt. 5:46-48; 19:20, 21.
Ciindi napaila kuli Leza, Munakristo inga ulizyi kabotu-kabotu kuti ngusizibi alimwi akuti talondokede. Nokuba boobo, ikuti luyando ndwajisi kuli Leza kalumaninide alimwi kalimvwa kuyandwa anguwe, takonzyi kunyonganizyigwa akaambo kakuyoowa kukakwa. Muciindi caboobo, ulakkomana kwaamba cakutayoowa kujatikizya zili mumoyo wakwe alimwi akulomba kulekelelwa kwiinda mucituuzyo cacinunuzyo, eeco Leza ncaakapa kwiinda muli Jesu Kristo. Inga ulisinizyide kuti Leza ulakumvwa kulomba kwakwe.
Ino mbuti muntu mbwakonzya ‘kulondolwa muluyando’ ‘akukusowela anze’ kuyoowa kukakwa? Mwaapostolo Johane wakaamba kuti: “Kufwumbwa muntu uubamba jwi lyakwe [Leza], luyando ndwajisi muntu ooyo kuli Leza lwalondolwa ncobeni.” (1Joh. 2:5) Amuciyeeyele buyo: Ikuti naa Leza wakatuyanda ciindi notwakacili basizibi, sena inga tanaatuyanda kapati ikuti naa tweempwa kuzwa ansi amoyo alimwi ‘akubamba jwi lyakwe’ cabusungu? (Rom. 5:8; 1Joh. 4:10) Masimpe, kufwumbwa buyo kuti twazumanana kusyomeka, tulakonzya kuba alusyomo mbuli ndwaakajisi mwaapostolo Paulo ciindi naakaamba boobu kujatikizya Leza: “Ikuti naa tanaakalesya Mwanaakwe mwini kupenga, pele wakamulekela kuti atufwide swebo toonse, sena alimwi antoomwe anguwe takatupi zintu zimbi zyoonse?”—Rom. 8:32.
NOVEMBER 11-17
MBONO IZILI MU JWI LYA LEZA | 2 JOHANE 1–JUDA
“Tweelede Kulwana Kutegwa Tuzumanane Kukkala Mukasimpe”
(Juda 3) Nobayandwa, nokuba kuti ndakali kusoleka kusikila mpondigolela kuti ndimulembele makani aalufwutuko ndotujisi toonse, ndakabona kuti ndeelede kumulembela makani aakumukulwaizya kuti muyume kulwanina lusyomo ilwakapegwa ciindi comwe buyo kubasalali.
‘Amuzumanane Kuyuma Mu Mwami’
Tulaazyi makanze aa Saatani nkaambo Magwalo alaziyubununa nzila zyakwe. (2 Ba-Korinto 2:11) Kapenzya mwaalumi wakali mululami Jobu, Diabolosi wakabelesya penzi lyakumunyonyooda lubono lwakwe, kufwidwa bayandwa, kukazyigwa mumukwasyi, kuciswa alimwi akutongookwa kakunyina kaambo abalongwe basilweeno. Jobu wakatyompwa alimwi wakalimvwa kuti Leza wakamulekelezya. (Jobu 10:1, 2) Nokuba kuti Saatani takonzyi kutuletela mapenzi aali boobu cacigaminina sunu, imakatazyo aali boobo alabacitikila Banakristo banji alimwi Diabolosi ulakonzya kwaabelesya.
Izintu ziletela ntenda yakumuuya zyavwula muciindi cino cakumamanino. Tukkede munyika oomo ikubikkila maano kuzintu zyakumubili mokuli kumbele kwiinda zintu zyakumuuya. Inzila zibelesyegwa kumwaya makani lyoonse zitondezya koonana ikutali kwamu mulawo kuti ncintu cikkomanisya, muciindi cakuba cintu ciletela mapenzi. Alimwi ibunji bwabantu “bayandisya misalo yaansi kwiinda Leza.” (2 Timoteo 3:1-5) Ikuyeeya kuli boobu kulakonzya kutunyonganya kumuuya ccita kuti ‘twalulwanina lusyomo.’—Juda 3.
Kuyandaula Mbono Zyakumuuya
(Juda 4) Ndacita boobo nkaambo kuli bantu bamwi ibali kunjila akati kanu cakusobelela, aabo kuzwa kaindi ibasalidwe a Magwalo kuti babe alubeta oolu; ibantu basampaula Leza, ibasandula luzyalo lwa Leza kuba cilitamizyo cakuba abukkale busesemya, alimwi batasyomeki kuli yooyo mukamwini alimwi Mwami wesu uuli alikke, Jesu Kristo.
(Juda 12) Aaba bantu mabwe aatalibonyi mumaanzi mumapobwe aanu aaluyando ciindi nobalya andinywe, mbeembezi balisanina beni cakutayoowa; makumbi aatakwe maanzi aapepululwa amuwo ooku akooku; masamu aatazyede micelo kuciindi cangawo, aafwide ziindi zyobilo, aazyulidwe;
it-2 279
Mapobwe Aaluyando
Bbaibbele kunyina nolyaapandulula mapobwe aaya alimwi kunyina nolitondezya ziindi naakali kucitwa. (Jud. 12) Tali Mwami Jesu Kristo naa baapostolo bakwe ibakalailila kuti kaacitwa alimwi kweelede kuti tiiwakali mulawo buya kuti kaacitwa naa kuti akeelede kucitwa lyoonse. Bamwi baamba kuti cakali ciindi Banakristo ibakavwubide nobakali kuba amapobwe alo ngobakali kutamba abasyominyina ibakali bacete. Aboobo, bamucaala, bamukabafwu, bavwubi alimwi abacete bakali kulida antoomwe mbuli babunyina bakumuuya.
it-2 816
Bbwe
Bbala lya Chigiriki limbi ilyakuti spi·lasʹ, kweelede kuti lyaamba bbwe naa mabwe aatalibonyi aali mumaanzi. Juda wakalibelesya kupandulula baalumi bamwi ibakanjila mumbungano ya Banakristo cakusobelela kabajisi makanze aatali kabotu. Mbubwenya mbuli mabwe aatalibonyi mbwaakali kukonzya kuleta ntenda kubwato, baalumi aaba bakali kukonzya kunyonganya bamwi mumbungano. Kujatikizya baalumi aaba wakaamba kuti: “Aaba bantu mabwe aatalibonyi mumaanzi mumapobwe aanu aaluyando ciindi nobalya andinywe.”—Jud. 12.
(Juda 14, 15) Inzya, Enoki, imuntu waciloba mumulongo kuzwa kuli Adamu awalo wakasinsima kujatikizya mbabo, naakati: “Amubone! Jehova wakaboola amakumi-makumi aazyuulu zyabangelo bakwe basalala, 15 kuti abeteke bantu boonse, akubazula boonse basampaula Leza mumicito yabo iisampaula Leza njobakacita munzila iisampaula Leza, alimwi akujatikizya zintu zyoonse ziyumya mate nzyobakali kumwaamba basizibi basampaula Leza.”
“Wakakkomanisya Leza”
Ino Enoki wakasinsima nzi? Wakasinsima kuti: “Amubone! Jehova wakaboola amakumi-makumi aazyuulu zyabangelo bakwe basalala, kuti abeteke bantu boonse, akubazula boonse basampaula Leza mumicito yabo iisampaula Leza njobakacita munzila iisampaula Leza, alimwi akujatikizya zintu zyoonse ziyumya mate nzyobakali kumwaamba basizibi basampaula Leza.” (Juda 14, 15) Lino cintu cakusaanguna ncomukonzya kubona ncakuti, Enoki wakali kwaamba zintu mbuli kuti zyakacitikide kale, mbuli kuti Leza wakazizuzikizyide kale izyakaambidwe mubusinsimi. Eeyi nenzila businsimi bunji ibwakatobela mbobwakali kulembwa. Kaambo nkakuti: Musinsimi waamba cintu cimwi cisinizyide kuti cilacitika calo cikonzya kwaambwa mbuli kuti cacitika kale!—Is. 46:10.
“Wakakkomanisya Leza”
Lusyomo lwa Enoki lulakonzya kutupa kuti tulibuzye naa ambweni nyika eeyi motukkala twiibona mbuli mbwaibona Leza. Lubeta Enoki ndwaakali kwaambilizya cabusicamba nkolucili; lulayandika kunyika yamazuba aano mbubwenya mbolwakali kuyandika kunyika yakumazuba aa Enoki. Kweelana akucenjezya kwa Enoki, Jehova wakaleta Zambangulwe kubantu ibakali kusampaula Leza mumazuba aa Nowa. Pele lunyonyooko oolo lwakapa cikozyanyo calunyonyooko lupati iluboola. (Matayo 24:38, 39; 2 Petro 2:4-6) Mbubwenya mbuli kaindi, mazuba aano Leza ulilibambilide amakumi-makumi aazyuulu zyabangelo bakwe basalala kuleta lubeta lwabululami munyika yabantu batakombi Leza. Umwi aumwi wandiswe weelede kukubikkila maano kucenjezya kwa Enoki alimwi akwaambila bamwi. Bamukwasyi wesu alimwi abalongwe besu balakonzya kututantamuka. Aboobo zimwi ziindi tulakonzya kulimvwa kulendelelwa. Pele Jehova kunyina naakamulekelezya Enoki; ncimwi buyo amazuba aano kunyina nakonzya kubalekelezya babelesi bakwe basyomeka!
NOVEMBER 18-24
MBONO IZILI MU JWI LYA LEZA | CIYUBUNUZYO 1-3
“Ndiliizyi Milimo Yako”
(Ciyubunuzyo 1:20) Lino kujatikizya maseseke aa Leza aanyenyeezi zili ciloba nzyowabona mujanza lyangu lyalulyo, alimwi aazibikkilo zyamalambe zyangolida izili ciloba: Inyenyeezi zili ciloba ziiminina bangelo bambungano zili ciloba, mpoonya zibikkilo zyamalambe zili ciloba ziiminina mbungano zili ciloba.
Ino Muuya Nzi Ngomutondezya?
Kutegwa tuutantamuke muuya uuli boobo, tweelede kuyeeya kuti mu Bbaibbele, Jesu waambwa kuti ‘mujanza lyakwe lyalulyo ulijisi nyenyeezi zili ciloba.’ “Nyenyeezi” ziiminina balangizi bananike alimwi zilaiminina abalangizi boonse mumbungano. Jesu ulakonzya kusololela “nyenyeezi” izili mujanza lyakwe munzila iili yoonse walo njabona kuti ili kabotu. (Ciy. 1:16, 20) Aboobo, mbwali Mutwe wambungano ya Bunakristo, Jesu ulijisi bweendelezi boonse bwatubunga twabaalu. Kuti naa umwi mukabunga uyandika ncobeni kugwasyigwa, Ooyo uujisi ‘meso mbuli mulilo uuvwilima’ uyakubona kuti eeci cacitwa ciindi ncayanda walo alimwi munzila njayanda. (Ciy. 1:14) Kacitanacitika eeco, tulazumanana kupa bulemu bweelede kuli baabo basalidwe amuuya uusalala, nkaambo Paulo wakalemba kuti: “Kamubamvwida aabo basololela akati kanu alimwi kamulibombya, nkaambo balanganya buumi bwanu kabali baabo ibayoobuzyigwa makani; ikutegwa kabacita boobu cakukondwa ikutali cakuusa pe, nkaambo eeci inga camuletela mapenzi.”—Heb. 13:17.
(Ciyubunuzyo 2:1, 2) “Kumungelo wambungano iili mu Efeso, kolemba kuti: Eezyi nzyezintu nzyaamba ooyo uujisi nyenyeezi zili ciloba mujanza lyakwe lyalulyo, ooyo weendeenda akati kazibikkilo zyamalambe zyangolida izili ciloba: 2 ‘Ndiliizyi milimo yako, ambobeleka canguzu alimwi akuliyumya kwako, alimwi akuti tokonzyi kubaleka buyo bantu babi, akuti ulabasunka aabo balyaamba kuti mbaapostolo kakuli tabali boobo pe, alimwi wakajana kuti mbabeji.
Jehova Ulatukwabilila Kutegwa Tukafwutuke
Mucilengaano cilembedwe mulugwalo lwa Ciyubunuzyo caandaano 2 a 3, Jesu Kristo iwakasumpulwa ulingula mbungano zili ciloba zyaku Asia Minor. Cilengaano citondezya kuti Kristo ulabona bukkale bujatikizya bantu boonse alimwi abukkale bugaminide. Mubukkale bumwi, ulabaamba bantu bambi, alimwi mubukkale bumwi abumwi ulapa lulayo naa majwi aakukulwaizya aayelede. Ino eeci citondezya nzi? Mukuzuzikizyigwa kwacilengaano, mbungano zili ciloba ziiminina Banakristo bananike bakaliko mwaka wa 1914 niwakainda, alimwi lulayo ilwakapegwa kumbungano zili ciloba munzila imwi luleelela akumbungano zyoonse zyabantu ba Leza mazuba aano nyika yoonse mbwiizulwa. Aboobo, tacidoonekwi buya kwaamba kuti Jehova kwiinda mu Mwanaakwe uluujisi kusololela bantu bakwe. Mbuti mbotukonzya kugwasyigwa abusolozi buli boobu?
w01 2/1 14-15 ¶20
Ikweendelaamwi Ambunga ya Jehova
Ikweendelaamwi ambunga ya Jehova iiyaabuya kumbele bucebuce ciyanda kuziba mulimo Jesu Kristo ngwapedwe kuli Leza kali “mutwe wambungano.” (Ba-Efeso 5:22, 23) Icimbi ciyandika kubikkila maanu nceeco cilembedwe kuli Isaya 55:4, nkotwaambilwa kuti: “Ngonguwe [mebo nde Jehova] ngundabika kuti abe kamboni kumisyobo yabantu, musolozi asilutwe kubantu.” Masimpe, Jesu ulizi mbokweendelezyegwa. Alimwi ulizizi mbelele zyakwe alimwi azintu nzyoziyandika. Mubwini, eelyo naakali kulingula mbungano zili ciloba mu Asia Minor, iziindi zyosanwe wakati: “Ndizi milimo yako mbwiibede.” (Ciyubunuzyo 2:2, 19; 3:1, 8, 15) Alimwi Jesu ulizizi nzyotuyandika mbuli mbwazizi Wisi, Jehova. Katanaamba mupailo wacikozyanyo, Jesu wakati: “Usowanu ulizi zintu nzimubula kamutana kumubuzya.”—Matayo 6:8-13.
Kuyandaula Mbono Zyakumuuya
(Ciyubunuzyo 1:7) Amubone! Ulaboola amakumbi, eelyo meso oonse ayoomubona, antoomwe abaabo bakamuyasa; alimwi bantu bamisyobo yoonse anyika bayoolyuuma acamba akulila akaambo kanguwe. Akube boobo, Ameni.
kr 226-227 ¶10
Bwami bwa Leza Bwabagwisya Basinkondo ba Bwami
Lubeta. Basinkondo ba Bwami bwa Leza boonse bayakulibonena cintu cimwi ciyakucitika calo iciyakupa kuti banyongane naa bapenge kapati. Jesu wakaamba kuti: “Bayoobona Mwana wamuntu kaboola mumakumbi kajisi nguzu zinji abulemu.” (Mk. 13:26) Zitondezyo zyanguzu zipati eezyi ziyakutondezya kuti Jesu waboola kuzoobeteka. Mucibeela acimbi cabusinsimi oobu bujatikizya mazuba aamamanino, Jesu waamba twaambo atumbi tujatikizya lubeta iluyoocitika aciindi eeci. Makani aaya tulaajana mucikozyanyo cambelele ampongo. (Amubale Matayo 25:31-33, 46.) Basikugwasyilizya basyomeka ba Bwami bwa Leza bayakubetekwa kuba “mbelele” alimwi ‘bayakulungumana,’ akaambo kakuzyiba kuti ‘lufwutuko lwabo lwaswena afwaafwi.’ (Lk. 21:28) Nokuba boobo, basikukazya Bwami bayakubetekwa kuba “mpongo” alimwi “bayoolyuuma acamba akulila” akaambo kakuzyiba kuti balindila ‘kunyonyoonwa kukabe kutamani.’—Mt. 24:30; Ciy. 1:7
(Ciyubunuzyo 2:7) Ooyo uujisi matwi aamvwe ncowaamba muuya kumbungano: Ooyo uuzunda ndiyoomuzumizya kulya kucisamu cabuumi, icili muparadaiso ya Leza.’
Twaambo Tugwasya Mubbuku lya Ciyubunuzyo—Cibeela I
2:7—Ino “Paradaiso wa-Leza” ninzi? Mbwaanga majwi aaya aambilwa Banakristo bananike, paradaiso eeyi ilakonzya kwaamba buponi buli mbuli paradaiso kujulu—kwini nkwabede Leza. Ibananike basyomeka bayoopegwa bulumbu “[ibwa]kulya kumusamu wabuumi.” Bayoopegwa buumi butafwi.—1 Kor. 15:53.
NOVEMBER 25–DECEMBER 1
MBONO IZILI MU JWI LYA LEZA | CIYUBUNUZYO 4-6
“Basimabbiza Bone”
(Ciyubunuzyo 6:2) Mpoonya ndakalanga akubona bbiza lituba, lino ooyo wakatantide alindilyo wakajisi buta; alimwi wakapegwa musini, eelyo wakaunka kayaabuzunda akuti amanizye kuzunda.
Basimabbiza Bone—Ino Mbaani?
Ino nguni ooyo uutantide abbiza lituba? Icikonzya kutugwasya kutegwa tumuzyibe, cilajanika mubbuku lyamu Bbaibbele ndilyonya eeli lya Ciyubunuzyo, lyalo ilyaamba sibbiza ooyu wakujulu kuti “Jwi lya Leza.” (Ciyubunuzyo 19:11-13) Zina eeli lyabulemu lyakuti Jwi, lyaamba Jesu Kristo nkaambo ulabeleka kali mwaambilizi wa Leza. (Johane 1:1, 14) Kuyungizya waawo, wiitwa kuti “Mwami wabami alimwi Simalelo wabasimalelo” alimwi waambwa kuti “Uusyomeka alimwi Wamasimpe.” (Ciyubunuzyo 19:16) Cilasalala kuti, ulijisi nguzu zyakuba mwami sikalumamba, alimwi tazibelesyi munzila iitali kabotu. Nokuba boobo, kuli mibuzyo iibuzyigwa.
wp17.3 4 ¶5
Basimabbiza Bone—Ino Mbaani?
Ino ndilili basimabbiza nobakatanta amabbiza? Amubone kuti sikutanta bbiza wakusaanguna, Jesu, wakalitanta ciindi naakatambula musini. (Ciyubunuzyo 6:2) Ino ndilili Jesu naakapegwa musini wakuba Mwami kujulu? Tanaakapegwa ciindi naakafwa akupiluka kujulu. Bbaibbele litondezya kuti ciindi cakulindila cakatalika aciindi eeco. (Bahebrayo 10:12, 13) Jesu wakabapa citondezyo basikumutobela cakuzyiba mamanino aaciindi eeco cakulindila alimwi amatalikilo abulelo bwakwe kujulu. Wakabaambila kuti aakutalika kweendelezya, bukkale bwamunyika buyoocinca akubija kapati. Kwakali kuyooba nkondo, nzala, alimwi azilwazi. (Matayo 24:3, 7; Luka 21:10, 11) Mboyakatalika buyo Nkondo Yakusaanguna Yanyika Yoonse mu 1914, cakalibonya kuti bantu banjila muciindi eeco, iciindi camapenzi munyika calo Bbaibbele ncoliita kuti ‘mazuba aamamanino.’—2 Timoteyo 3:1-5.
(Ciyubunuzyo 6:4-6) Eelyo kwakazwa limbi, ibbiza lisalala pyu mbuli mulilo, mpoonya ooyo wakatantide alindilyo wakazumizyigwa kugusya luumuno anyika ikutegwa bantu batalike kujayana, alimwi wakapegwa panga lipati. 5 Mpoonya naakanamatula cinamatizyo catatu, ndakamvwa cilenge cuumi catatu kacaamba kuti: “Boola!” Eelyo ndakalanga akubona ibbiza lisiya, alimwi ooyo wakatantide alindilyo wakajisi cikkelo mujanza lyakwe. 6 Alimwi ndakamvwa icakali kulimvwisya mbuli kuti ndijwi lizwa akati kazilenge zyuumi zyone kaliti: “Kkilo lyomwe lyawiiti lilaulwa dinari lyomwe, makkilo otatwe aabbaale alaulwa dinari lyomwe; alimwi mutaanyonyooni pe mafwuta aamaolifa alimwi awaini.”
Basimabbiza Bone—Ino Mbaani?
Ooyu uutantide abbiza eeli wiiminina nkondo. Amubone kuti ugwisya luumuno kutali buyo muzisi zisyoonto, pele munyika yoonse. Mu 1914, kwaciindi cakusaanguna kuzwa kaindi, kwakatalika nkondo yanyika yoonse. Mpoonya alimwi kwakacitika nkondo yabili yanyika yoonse yalo iyakanyonyoona bantu banji kapati kwiinda yakusaanguna. Kuyeeyelwa kuti mweelwe wabantu boonse ibakafwa akaambo kankondo alimwi amazwanga kuzwa mu 1914 ulainda ku 100 miliyoni! Kuyungizya waawo, bantu banji bamwi bakalicisa kapati.
wp17.3 5 ¶4-5
Basimabbiza Bone—Ino Mbaani?
“Ndakalanga akubona ibbiza lisiya, alimwi ooyo wakatantide alindilyo wakajisi cikkelo mujanza lyakwe. Alimwi ndakamvwa icakali kulimvwisya mbuli kuti ndijwi lizwa akati kazilenge zyuumi zyone kaliti: ‘Kkilo lyomwe lyawiiti lilaulwa dinari lyomwe, makkilo otatwe aabbaale alaulwa dinari lyomwe; alimwi mutaanyonyooni pe mafwuta aamaolifa alimwi awaini.’”—Ciyubunuzyo 6:5, 6.
Ooyu uutantide abbiza eeli wiiminina nzala. Aawa tujana citondezyo camweelwe wacakulya icisyoonto kapati cakuti kkilo lyomwe lyawiiti lyuulwa dinari lyomwe, mweelwe wamali ngaakali kuvwola muntu iwabeleka buzuba oobo mumwaanda wamyaka wakusaanguna! (Matayo 20:2) Ndimunya dinari lyakali kukonzya kuula makkilo otatwe aabbaale, icakulya icakali kubonwa kuti ncaansi kapati kwiinda wiiti. Ino mukwasyi mupati wakali kukonzya kulya cakulya eeco kwamazuba ongaye? Mpoonya bantu bacenjezyegwa kwaabelesya kabotu mali noziba zyakulya zyabuzuba abuzuba, calo ciimininwa azilyo zyakuciindi eeco alimwi azilengwa mbuli mafwuta aamaolifa alimwi awaini.
(Ciyubunuzyo 6:8) Eelyo ndakalanga akubona bbiza lituba-tuba, alimwi ooyo wakatantide alindilyo wakajisi zina lyakuti Lufwu. Alimwi Cuumbwe cakali kumutobela munsi-munsi. Eelyo eezyi zyakapegwa nguzu kucibeela cane canyika, zyakujaya apanga lilamfwu, anzala azilwazi zijaya alimwi abanyama bamusyokwe bamunyika.
wp17.3 5 ¶8-10
Basimabbiza Bone—Ino Mbaani?
Ooyo uutantide abbiza lyane wiiminina lufwu iluboola akaambo kazilwazi alimwi azintu zimbi buyo. Mbowakamanina buyo mwaka wa 1914, bulwazi butegwa Spanish flu bwakajaya mamiliyoni aabantu. Kulangilwa kuti bantu babalilwa ku 500 miliyoni bakaciswa bulwazi oobu, ambweni muntu omwe akati kabantu botatwe ibakali kupona kuciindi eeco!
Pele bulwazi bwa Spanish flu akali buyo matalikilo. Basyaazibwene bayeeyela kuti mamiliyoni aabantu bakafwa akaambo kabulwazi butegwa smallpox mumwaanda wamyaka wa 20. Kusikila sunu, mamiliyoni aabantu balafwa akaambo kabulwazi bwasikalileke (AIDS), bwakakweekwe (TB), alimwi abwantuntumaanzi (malaria) nokuba kuti basilisi basoleka canguzu.
Icicitika ncintu comwe buyo, ndufwu—kufwumbwa naa nkaambo kankondo, nzala, naa zilwazi. Cuumbwe cazumanana kubweza bantu kakunyina bulangizi mbocipa.
Kuyandaula Mbono Zyakumuuya
(Ciyubunuzyo 4:4) Mpoonya ikuzinguluka cuuno cabwami eeco kwakali zyuuno zyabwami zili 24, alimwi azyuuno zyabwami eezyi ndakabona baalu bali 24 ibakakkede alinzizyo kabasamide zisani zituba alimwi kumitwe bakasamide misini yangolida.
(Ciyubunuzyo 4:6) Kumbele lyacuuno cabwami kwakali icakali kulibonya mbuli lwizi luŋaima mbuli gilazi, mbuli bbwe libalangala. Mpoonya akati kacuuno cabwami alimwi akuzinguluka cuuno cabwami kwakali zilenge zyuumi zyone izijisi meso koonse-koonse, kumbele akusyule.
re 76-77 ¶8
Bupati Bwacuuno Cabwami ca Jehova
Johane wakalizyi kuti bapaizi bakali kusalwa kutegwa kababeleka mutente lyakukombela lyakaindi. Aboobo kweelede kuti wakagambwa kubona cintu citobela ncaakapandulula naakati: “Mpoonya ikuzinguluka cuuno cabwami eeco kwakali zyuuno zyabwami zili 24, alimwi azyuuno zyabwami eezyi ndakabona baalu bali 24 ibakakkede alinzizyo kabasamide zisani zituba alimwi kumitwe bakasamide misini yangolida.” (Ciyubunuzyo 4:4) Inzya, muciindi cabapaizi, kwakali baalu bali 24, ibakakkede azyuuno zyabwami alimwi ibakasamide misini mbuli bami. Ino baalu aaba mbaani? Mbananike bamumbungano ya Banakristo, ibakabusyigwa akukkala mumasena aabo aakujulu aayo Jehova ngaakabasyomezya. Ino tuzyi buti oobo?
re 80 ¶19
Bupati Bwacuuno Cabwami ca Jehova
Ino zilenge eezyi ziiminina nzi? Cilengaano ncaakaamba musinsimi umwi, nkokuti Ezekieli, cilatugwasya kujana bwiinguzi. Ezekieli wakabona Jehova kakkede acuuno cabwami icili ankalaki yakujulu, iyakali azilenge zyuumi izyakali kulibonya mbuli zyeezyo nzyaakapandulula Johane. (Ezekieli 1:5-11, 22-28) Nokwakainda ciindi, Ezekieli alimwi wakaibona nkalaki yabwami eeyo kaili azilenge zyuumi. Nokuba boobo, aciindi eeci, zilenge zyuumi eezyi wakazyaamba kuti bakali bakerubi. (Ezekieli 10:9-15) Zilenge zyuumi zyone nzyaakabona Johane kweelede kuti zyakali kwiiminina bakerubi ba Leza ibatalivwulili, nkokuti zilenge izijisi zyuuno zyaatala mumbunga yakwe iitalibonyi. Johane tanaakagambwa kubona bakerubi kabali afwaafwi kapati a Jehova akaambo kakuti mutente lyakukombela lyakaindi, kwakali bakerubi bangolida bobilo ibakali acivwunisyo cabbokesi lyacizuminano, ikwiiminina cuuno cabwami ca Jehova. Kuzwa akati kabakerubi aaba, jwi lya Jehova lyakali kupa malailile kucisi. —Kulonga 25:22; Intembauzyo 80:1.
(Ciyubunuzyo 5:5) Pele umwi wabaalu wakandaambila kuti: “Koleka kulila. Bona! Syuumbwa wamusyobo wa Juda, imuyanda wa Davida, wazunda eelyo ulakonzya kunamatula zinamatizyo zili ciloba zyabbuku eelyo akulivwungulula.”
cf 36 ¶5-6
“Bona! Syuumbwa Wamusyobo wa Juda”
Kanji-kanji syuumbwa ulaambwa kwiiminina busicamba. Mucikozyanyo, sena kuli nomwakaimide kale kumbele lyasyuumbwa musankwa kamulangene? Ikuti naa mboobo, kweelede kuti kuli mwaakabede munyama ooyu kutegwa atamulumi, ambweni wakali muwaya yabanyama. Nokuba boobo, kwiima buyo kumbele lyasyuumbwa cilayoosya kapati. Ikuti mwamulanga kubusyu munyama ooyu mupati alimwi uujisi nguzu kapati, mpoonya wamulanga andinywe, mulakonzya kubona kuti syuumbwa kunyina cintu ncayoowa. Bbaibbele lyaamba “syuumbwa, imunyama uujisi nguzu zinji kapati kwiinda banyama boonse, alimwi uutatiji kumbele lyauli woonse.” (Tusimpi 30:30) Oobu mbobubede busicamba bwa Kristo.
Atubandike Jesu mbwaakatondezya busicamba mbuli bwasyuumbwa munzila zyotatwe: mukwiiminina kasimpe, mukusumpula bululami alimwi aciindi naakali kukazyigwa. Alimwi tulabona kuti toonse, tacikwe makani naa twakazyalwa katuli basicamba naa pe, tulakonzya kumwiiya Jesu mukutondezya busicamba.