Ol Liklik Pikinini i Kisim Sik AIDS Long Blut
LONG yia i go pinis wanpela nius (The New York Times) i kamapim wanpela bikpela tok long namba wan pes, olsem: “Sik AIDS i laik kisim planti pikinini tru long Romenia, em ol i stap long ol haus bilong ol pikinini i no gat papamama na long ol klinik. As bilong dispela hevi, em wanpela pasin bilong ol dokta [long Romenia] long givim blut long ol nupela pikinini.”—Februeri 8, 1990.
Long hap bilong Romenia, taim ol meri i karim pikinini, sampela dokta i save sutim liklik blut i go long rop bilong pikinini; ating ol i mekim olsem, long wanem, ol i ting dispela liklik hap blut bai helpim pikinini long i go bikpela hariap. Tasol sori tumas, dispela pasin i givim sik AIDS long planti pikinini! Long wanem, sapos inap olsem hap lita blut i gat sik AIDS long en, em inap givim dispela sik long planti pikinini.
Wanpela lain bilong Yunaitet Nesen i gat wok long daunim ol sik (World Health Organization) ol i salim sampela dokta i go long Romenia bilong skelim dispela samting, na ol i tok, inap olsem 700 nupela pikinini i kisim pinis jem bilong sik AIDS, na dispela sik i kamap strong pinis long 50 pikinini. Nambawan bilong dispela lain i tokim dispela nius (Times), long hap bilong Romenia sik AIDS i go bikpela tru long ol liklik pikinini.
Taim gavman bilong Ceausescu i bosim Romenia, ol man i no save dispela sik AIDS i wok long i go bikpela long dispela hap, long wanem gavman i haitim dispela samting na stori bilong en i no kamap long ol nius. Na ol man i givim blut bilong ol long haus sik, tasol ol dokta i no glasim dispela blut, i gat sik AIDS long en o nogat. Tasol nau dispela gavman i pinis na dispela hevi bilong sik AIDS i kamap ples klia. Inap wanpela yia samting paslain long taim ol i pait na daunim dispela gavman, planti dokta long Romenia i no save ol pikinini i wok long kisim sik AIDS long rot bilong blut. Tasol bihain ol i lukim planti liklik pikinini em ol kain kain sik i wok long kisim ol na sik i no pinis long skin bilong ol. Em nau, tingting bilong ol dokta i kirap. Olsem wanpela dokta i tok: “Sapos ol i tokim yu, i no gat dispela sik long Romenia, orait yu no gat wok long kisim save long dispela sik, a?”