Ol Dokta i Pret Long Sik AIDS
LONG nau ol dokta i save pret taim ol i katim sikman, nogut man i gat sik AIDS na hap blut bilong em i pas long skin bilong dokta na dispela sik i kalap long em. Olsem na ol dokta i tingim rot bilong sakim dispela sik, olsem sampela kain klos samting i karamapim gut skin bilong ol. Wanpela nius (The New York Times) i kolim olsem ‘nupela kain klos pait bilong ol dokta nau long taim bilong sik AIDS.’ Ol i putim ol su gumi i kam antap liklik long lek, na ol i pasim wanpela kain laplap em wara o blut i no inap i go insait long en, na dispela laplap i kirap long nek na i go daun olgeta; na ol i putim samting bilong karamapim gut han—tasol ol i no putim wanpela tasol, ol i putim tupela—narapela i go antap long narapela; na daunbilo long han bilong klos, ol i pasim wanpela laplap i olsem plastik, na ol i putim wanpela kain aiglas i karamapim gut ai. Na sapos dokta i ting bikpela blut bai lus, em bai putim wanpela kain hat i karamapim gut het na i gat samting bilong karamapim pes tu.
Klostu long pinis bilong 1990, wanpela lain bilong gavman i gat wok long pasim ol sik ol i tok, namel long ol dispela 153,000 manmeri i gat sik AIDS, inap 637 ol i dokta, na 42 em ol dokta bilong katim man, na 156 em ol dokta bilong stretim tit na ol man bilong lainim man long klinim gut skin samting, na 1,199 em ol nes.
Sik AIDS i bin kamap ples klia long 1981; em namba wan taim ol dokta i bin kisim save long en. Pastaim em i bin kisim ol man i save slip wantaim man, na ol man bilong kisim drak long rot bilong sut. Tasol nau dispela sik i kisim planti meri tu. Wanpela nius (World Health, bilong Novemba-Disemba, 1990) i tok, ‘Ol i ting, insait long tupela yia moa, planti meri tru long olgeta hap bai kisim sik AIDS.’
Na dispela lain bilong gavman i tokaut olsem: Klostu long pinis bilong yia 1990 long Amerika i gat 15,696 manmeri i winim pinis 50 krismas ol i kisim sik AIDS. Dispela namba i winim tru namba bilong ol pikinini i no winim yet 13 krismas na ol i kisim dispela sik, tasol ol nius i mekim bikpela stori long ol dispela pikinini na ol i no stori tumas long dispela narapela lain.
Tasol olsem wanem na sik AIDS i kisim ol dispela lain i winim pinis 50 krismas? Planti ol i man bilong slip wantaim man. Tasol dispela nius (The New York Times) i tok, sampela ol i kisim sik AIDS long blut ol i bin kisim long haus sik. Olsem na namba bilong ol lapun i kisim sik AIDS long blut ol i kisim long haus sik, dispela namba i olsem wankain long namba bilong ol pikinini i no winim yet 13 krismas na ol i bin kisim dispela sik!