Pasin Bilong Belhat Inap Nogutim Yu
OLSEM WANEM? Yu save kros kwik? Na taim wanpela i mekim ol toktok o sampela pasin i no stret na i skrapim bel bilong yu, kwiktaim yu belhat? O sapos narapela i bagarapim bel bilong yu, yu save tingim tingim yet dispela samting? Sapos olsem, yu surik long ol man i stap klostu long yu—na tu, ating yu wok long bagarapim skin bilong yu yet long dispela pasin.
Pasin bilong kros na belhat em inap long bagarapim man o olsem wanem? Wanpela nius (The New York Times News Service) i tok, belhat inap kilim man i dai. Em i tok ‘pasin bilong belhat i save bagarapim skin bilong man wankain olsem smok na kaikai i gat gris long en i save bagarapim skin bilong man.’
Ol dokta samting i laik save gut long dispela samting, olsem na ol i bin makim sampela sumatin long wanpela yunivesiti em ol i gat 25 krismas, na ol i skelim ol samting i save painim ol dispela sumatin long olgeta wan wan de—ol i save bel nogut na kros o nogat? Inap 25 yia bihain ol i lukim ol dispela sumatin gen na ol i kisim save olsem ol man i no save belhat kwik ol i save stap inap longpela taim. Inap olsem 4 pesen tasol ol i save dai taim ol i no winim yet 50 krismas. Tasol inap 20 pesen bilong ol man bilong kros na belhat i save dai taim ol i no winim yet 50 krismas! Na tu, ripot i soim olsem ol yangpela i gat pasin bilong kros taim ol i stap yangpela yet, orait taim ol i bikpela pinis, skin bilong ol i no strong na planti ol i kisim sik bilong klok.
Olsem wanem long ol man i save pulim kros na ol i no wok long painim rot bilong stretim ol hevi bilong ol? Wanpela dokta meri, em Mara Julius bilong yunivesiti long Misigen, inap 18 yia em i skelim wanpela lain meri, na em i kisim save olsem: Dai i painim ol meri i save pasim belhat bilong ol na i stap longpela taim tru, na dispela namba i winim moa yet namba bilong ol narapela i no save mekim olsem. Em i tok, ‘Planti meri i pasim kros long bel i go i go, ol i save dai hariap taim ol i stap yangpela yet, winim ol narapela i save smok samting.’
Inap planti tausen yia bipo, taim ol man i no kisim save yet long ol samting bilong saiens, Baibel i bin tok olsem: “Nogut yupela i belhat yet i stap na san i go daun.” (Efesus 4:26) Narapela hap bilong Baibel i tok tu olsem: “Yu no ken kros, na yu mas lusim pasin bilong belhat.” (Buk Song 37:8) Tu, Baibel i stori long tingting na skin bilong yumi na em i tok olsem: “Sapos man i stap bel isi, orait bodi bilong en bai i stap gut.”—Sindaun 14:30.
[Piksa long pes 30]
Man i gat bisnis bilong planim man em i save, taim em i lukim wanpela man bilong belhat, i no longtaim na em bai kisim wok bilong planim dispela man tu