Sampela Tok i Kam Long Olgeta Hap
Sik Inap Kisim Ol Man Bilong Penim Haus
Wanpela dipatmen bilong Wol Helt Oganaisesen long Laions long Frans, i tok, ol man i mekim wok bilong penim haus samting, sik kensa inap painim ol, winim ol narapela man long Frans. Wanpela nius (Naturwissenschaftliche Rundschau) i tok, ‘ol man i mekim dispela kain wok ol inap kisim kensa long waitlewa, winim tru (olsem 40 pesen) ol narapela man i kisim wankain sik. Na tu, ol dispela kain man inap kisim sik long ol rop insait long skin bilong ol, winim ol narapela man.’ Dispela nius i tok, pikinini bilong sampela man bilong penim haus samting ol tu inap kisim sik kensa long kru o sik kensa long blut. Dispela Wol Helt Oganaisesen i tok, ol marasin insait long pen i givim dispela sik long ol—i no dispela kain wok bilong penim haus samting.
Ol Man i Bin Dai Long Bukenwelt
Taim sampela man i harim dispela nem Bukenwelt (Buchenwald), ol i tingting bek long taim nogut long taim Hitler i bosim Jemani. Wanpela banis kalabus bilong bipo, em Bukenwelt, em i stap klostu long ples Wemar long hap bipo ol i kolim Is Jemani. Bipo Bukenwelt em wanpela banis kalabus nogut tru. Long dispela kalabus nogut ol soldia i mekim nogut tru long 250,000 kalabusman, na givim bikpela pen long ol. Long nau dispela banis kalabus Bukenwelt i slap olsem wanpela mak na i kamap wanpela haus bilong tingim ol man i bin dai long dispela banis. I gat 65,000 man i bin dai long dispela banis kalabus nogut. Wanpela man (Ulrick Schneider), nau em nupela dairekta bilong lukautim dispela banis Bukenwelt i stap olsem mak bilong ol man i ken tingim samting i bin kamap bipo long en, na em i tok: ‘Em i stret yumi tingim ol soldia bilong Rasia ol i bin dai long dispela ples hia, tasol yumi mas tingim tu ol man bilong Frans na Beljam na Holan, planti bilong ol tu i bin dai long dispela banis kalabus Bukenwelt, tasol yumi no tingim ol tumas.’ Em i tok tu, ol man i mas tingim sampela lain moa ol i bin dai long dispela banis, olsem ol Witnes Bilong Jehova.
San i Helpim Wanpela Resis Long Ostrelia
Long Darwin long hap bilong not long Ostrelia wanpela resis i kamap, na i gat 39 kain kain samting i gat wil, ol i olsem ka, em ol man i bin kisim i kam long ol narapela narapela kantri bilong mekim dispela resis. Ol dispela ka i lusim Darwin long Novemba 11, 1990 na ran i go long Adelet long Saut Ostrelia. Namba wan ka i kamap long Adelet 6-pela de bihain long em i bin lusim Darwin. Ol dispela ka i bin ran 3,000 kilomita na ol i ran long strong bilong san—ol i no ran long bensin samting. Dispela resis em i namba 2 resis bilong ol dispela kain ka (World Solar Challenge) na wanpela man bilong Swiselan i winim dispela resis. Dispela ka bilong em i bin spit olsem 69 kilomita insait long wanpela aua na sampela taim dispela ka, em i bin ran olsem 100 kilomita insait long wanpela aua. Wanpela nius (Asiaweek) i tok, ka i kam bihain long ka i winim dispela resis, pe bilong wokim dispela ka i olsem 15,000,000 dola, tasol ka i bin winim dispela resis, pe bilong wokim i olsem 600,000 dola tasol.
Sik AIDS i Go Bikpela Tru Long Olgeta Hap
Wanpela oganaisesen (World Health Organization) i tok, kirap long mun Janueri i go inap Mas bilong dispela yia, namba bilong ol man i gat sik AIDS i kamap bikpela inap 345,533 long 162 kantri. Ol i skelim dispela namba wantaim namba bilong yia bipo, na em i go antap inap 9 pesen samting. Long sampela kantri ol i no save kolim stret namba bilong ol man i gat sik AIDS—ol i daunim dispela namba. Tasol dispela lain (WHO) i ting olsem long mun Janueri i go inap Mas bilong dispela yia, inap olsem 1.3 milion manmeri i gat sik AIDS.
Lotu Long Ples Kanaka Long Saina
Wanpela nius long tok Saina (World Daily) long Amerika i kamapim tok bilong wanpela nius bilong Saina (South China Morning Post), na em i tok, namba tu bilong gavman long Saina (Wang Zhen), em i tok, long ol ples kanaka planti lotu bilong Wes i kamap. Inap 70 pesen bilong ol manmeri long Saina i save sindaun long ol liklik ples kanaka na dispela man bilong gavman i tok, ‘planti manmeri bilong ol dispela ples ol i laik insait long ol lotu ol i kolim Kristen.’
Ol i Kisim Biknem Tru
Wanpela skul bilong Misin Yunaitet Metodis long Amerika i tok, Misin Yunaitet Metodis i mas painim narapela rot bilong givim biknem long ol bisop bilong ol, maski givim bikpela mani kago samting long ol. Ripot bilong dispela skul i tokaut olsem, planti taim ol kongrigesen bilong misin bilong ol i givim mani olsem presen i go long ol bisop i pinis long wok, olsem ritaia samting, o long ol bisop i go long narapela hap. Sampela taim ol i givim mani inap olsem K40,000 na ka i gat pe olsem K20,000 samting. Wanpela nius (Christianity Today) i tok, ‘Bipo ol man i givim bikpela mani kago olsem long ol, long wanem, pe bilong bisop samting i no bikpela tumas. Tasol long yia 1992 ol bisop bilong Misin Yunaitet Metodis bai kisim pe i winim K66,000 samting. Na tu, ol bisop bai i kisim haus i no gat pe na ol bai kisim mani olsem K41,000 long olgeta yia.’
Man i Smok i Nogutim Man i No Smok
Ol man i no save smok, sampela taim ol i mas pulim win bilong man i smok. Dispela pasin i kilim i dai planti tausen man bilong Ostrelia. Wanpela nius (The Australian) i tok, long olgeta yia long Ostrelia, winim 1,000 manmeri i no save smok em ol i save dai long sik bilong klok, na dispela sik i kamap long wanem ol i stap klostu long man i smok na ol i pulim win bilong smok. Dispela nius i tok moa olsem, dispela win ol i pulim long smok bilong narapela man i gat tupela marasin long en, em kabon monoksait na nikotin, na dispela i go insait long skin bilong ol na dispela marasin inap mekim nogut long klok bilong ol na klok i no wok gut. Na tu, blut i no gat strong long kisim oksijen i go long klok bilong ol na long ol narapela hap bilong skin. Sampela saveman ol i tok, long olgeta 8-pela 8-pela man bilong smok em ol i save dai long sik ol i kisim long smok, i gat wanpela i no save smok tasol em i dai long sik em i bin kisim long smok billong ol narapela man, taim em i bin i stap klostu long ol na em i pulim win bilong smok.
Ol Man Bilong Stilim Buk
Ol man i wok long haus buk na ol man i wok mani long ol buk i tingting planti, long wanem pasin bilong stilim ol buk i go bikpela. Wanpela nius (The New York Times Book Review) i kamapim tok bilong wanpela meri (Mary Ellen Quinn), em dairekta bilong Haus Buk Bilong Sikago, na em i tok, ‘ating ol haus buk i mas baim planti buk long olgeta yia, long wanem ol man i stilim planti buk.’ Ol man i save stilim ol buk long haus buk em sampela dokta, na man bilong raitim nius, na loya, na man i skul long lotu, na tisa. Sampela man i gat wok long skelim dispela pasin bilong stilim ol buk ol i tok, ‘namba wan buk ol man i stilim em Baibel—em i winim ol narapela buk ol i stilim. Ol man i laik tru long stilim buk Baibel.’
Gavman i Orait Long Ol Witnes Long Mosambik
Long kantri Mosambik long saut-is Afrika gavman i rausim tambu na nau ol Witnes Bilong Jehova inap autim tok bilong Baibel long ples klia. Ol Witnes i kisim pas long Dipatmen Bilong Bosim Lo na Kot, em ol i bin raitim long Februeri 11, 1991, na dispela pas i tok: ‘Nau ol Witnes Bilong Jehova i olsem ol narapela lotu, ol inap mekim ol samting em Konstityusen bilong Mosambik i orait long lotu i mekim.’ Dairekta bilong wanpela dipatmen bilong gavman (Religious Affairs) i sainim dispela pas. Taim dispela pas i kam long 5,235 Witnes i bin autim tok bilong Baibel long mun Janueri 1991, ol i amamas tru. Na tu, i gat 13,971 manmeri i bin go long 3-pela kibung long “Gutpela Tok Ples“ Kibung Distrik long Mosambik na ol i amamas, long wanem, nau gavman i orait long ol, no gat tambu moa. I gat 357 manmeri ol i bin kisim baptais long dispela 3-pela kibung.
Ol Lain Bilong Kisim Planti Marasin
Wanpela nius bilong Paris (L ˈExpress) i tok, ol man bilong Frans i winim ol narapela kantri long kisim pepa long dokta bilong kisim ol strongpela marasin i gat drak long en. Long yia 1989 ol i tromoi olsem 18 tausen milion kina long baim marasin long ol haus marasin—i olsem olgeta wan wan man meri pikinini long Frans i bin tromoi 320 kina long baim marasin. Narapela nius long Frans (La Croix) i tok, ol Frans i winim tru ol Amerika long kisim marasin bilong helpim ol long slip. Dispela pasin i go bikpela long olgeta hap bilong Frans na i kisim ol yangpela na ol manmeri i bikpela pinis na ol lapun. Long olgeta 5-pela 5-pela yangpela i save go long dokta, wanpela bilong ol i save kisim pepa bilong tok orait long em i ken baim marasin long haus marasin bilong helpim em long slip. Long ol pikinini i no winim yet wanpela krismas, 15 pesen i kisim marasin bilong helpim ol bambai bel bilong ol i ken i stap isi na bilong helpim ol long kaikai gut. Wanpela nius (Le Figaro) i tok, long Frans sampela man i save kisim sampela kain marasin long olgeta taim; dispela marasin i bilong helpim ol long stap bel isi.