Sampela Tok i Kam Long Olgeta Hap
Planti Manmeri i No Givim Mani Long Lotu Long Spen
Gavman i wok yet long helpim Misin Katolik long mani samting. Wanpela nius bilong Madrit (El Pais) em i tok, long yia 1990 dispela misin i bin kisim 140,000,000 kina long gavman. Sampela hap bilong dispela mani em bilong ol man i tromoi takis long gavman. Taim ol dispela man i raitim pepa bilong takis, ol i makim wanpela hap long pepa bilong toksave olsem ol i laik bai hap mani bilong takis bilong ol i go long Misin Katolik olsem kontribusen. Tasol dispela nius i tok, namba bilong ol man i bin laik long mekim olsem i go daun tru. Long 1989 insait long wan handet wan handet man i save tromoi takis long gavman, 38 man tasol i tok ol i laik bai hap mani bilong ol i ken i go long misin. Dispela samting i kamap long wanpela kantri ol man i tok, klostu olgeta man i bilong lotu Katolik.
Ol i Mekim Nogut Tru Long Ol Pikinini
Long sampela hap bilong Saut Afrika pasin bilong bagarapim pikinini i go bikpela. Planti bilong ol dispela pikinini i liklik tru na ol i no gat rot bilong kisim helpim. Wanpela nius bilong Keip Taun (Cape Times) i tok, wanpela lain i bin skelim dispela samting na ol i tok, long olgeta 350 pikinini em ol i bin bagarapim em na em i stap long haus sik, inap 60 pesen i tok wanpela i bin mekim pasin sem long ol. Narapela 40 pesen i tok, ol i kisim nogut taim wanpela i bin paitim ol. Dispela nius i tok moa olsem 90 pesen bilong ol pikinini em sampela i bin mekim pasin sem long ol, ol i pikinini meri i gat 6-pela krismas tasol. Na 60 pesen bilong ol pikinini em sampela i bin paitim ol samting, ol i gat 5-pela krismas samting. Long wanpela haus sik (Red Cross Children’s Hospital), long olgeta wan handet wan handet pikinini i kisim nogut long wanem wanpela i paitim em samting, inap olsem 25 i bilong ol dispela pikinini i no winim yet wanpela krismas (maski em i bilong wanem lain).
Pipia Long Ples Antap
Ol saveman bilong saiens i tingting planti long planti pipia bilong ol roket na satelait samting ol man i wokim na i stap antap raunim raunim graun bilong yumi. Sapos dispela kain pipia na wanpela roket i bam, ating ol man i sindaun insait long roket inap kisim bagarap. Ol man i skelim dispela samting i ting inap olsem 7,000 kain pipia olsem, bikpela bilong ol i winim bikpela bilong tenis-bal, na 3 milion 500 tausen narapela liklik samting ol i raun raun long ples antap. Wanpela nius (The German Tribune) i tok, ‘Maski liklik hap pipia bilong pen i raun raun, em inap bagarapim ol roket samting ol saveman i salim i go antap, long wanem, ol dispela pipia i save spit i go olsem 60,000 kilomita insait long wanpela aua.’ Sapos pipia bilong ol samting ol man i bin wokim ol i kamap planti moa na raunim raunim graun bilong yumi na narapela i bamim narapela, em nau, samting nogut inap kamap olsem: Ol bai bruk bruk na kamap olsem das, na dispela das bai raunim graun olsem ol mak i raunim bikpela sta Saten.
Gavman Bilong Itali i Putim Nupela Lo Bilong Blut
Gavman bilong Itali i putim wanpela lo olsem, sapos wanpela man i sik, orait, i no stret long narapela man i mas subim em long mekim sampela samting em sikman yet i no laikim. Dipatmen bilong Helt i putim dispela nupela lo na i tok, pasin bilong kisim blut tu i insait long dispela lo ol i putim bilong ol sikman. Kirap long Janueri 15, 1991 dispela lo i kirap long mekim wok, na dispela lo i tok olsem: Ol dokta bai i givim blut na ol narapela marasin i gat liklik hap blut long en, tasol i gat sampela hevi inap kamap long bihain. Olsem na ol i mas save long laik bilong sikman pastaim, em i laik kisim blut o nogat. Na ol sikman i mas save, wanem ol samting inap painim ol taim ol i kisim blut, na sapos ol i no laik kisim blut ol i ken sakim. Na ol i raitim wanpela toksave long pepa bilong dispela lo, em i tok, sapos sikman i kisim blut, em inap kisim “ol sik nogut olsem hepataitas na AIDS,” na “i hatwok long ol dokta long save kwik husat ol man i bin kisim dispela kain sik.”
Pop i Litimapim Nem Bilong Maria
Taim Pop John Namba 2 i go raun long Potyugal em i go lukim liklik haus lotu bilong Vergio Fatima bilong tingim samting i bin kamap inap 10-pela yia i go pinis, em taim wanpela man i sutim em long gan na i laik kilim em i dai. Dispela samting i kamap long de bilong wanpela bikpela bung bilong lotu (Day of Our Lady of Fatima), na ol i bin makim tu dispela de bilong tingim samting i bin kamap long 1917, taim 3-pela pikinini i bin tok ol i lukim Vergio Fatima. Olsem na pop i litimapim nem bilong Maria, long wanem, pop i tok Maria i bin lukautim pop taim birua i laik painim em. Na ol i kisim wanpela katres em dispela man i sutim pop long en na ol i putim long hat bilong imis bilong Fatima i gat ol ston daimon long en. Na tu, pop i tenkyu long “Vergio long sampela bikpela senis i bin kamap” taim strong bilong gavman komyunis i pinis long hap bilong Is Yurop.
Sampela i Mekim Pasin Nogut na Ol i No Kisim Strafe
Wanpela dipatmen long gavman bilong Inglan (British Home Office and Statistic Department) i kamapim dispela ripot na ol i tok, pasin nogut i kamap bikpela tru long dispela kantri. Long olgeta wan handet wan handet bikpela rong ol man i mekim, inap 59 bilong ol dispela rong em ol man i no save tokim polis long en, na inap olsem 41 samting bilong ol rong em ol i bin tokim polis long en, ol polis i traim long stretim inap 26 tasol. Na long dispela 26, ol polis i stretim inap 7-pela tasol. Na long dispela namba, inap 4-pela tasol i go long kot samting. Tasol dispela namba i karamapim olgeta kain pasin raskol ol man i mekim, em sampela i olsem, bagarapim samting bilong narapela man, na pasin stil. Dispela i soim olsem ol polis long Inglan i stretim inap 70 pesen bilong ol pasin nogut olsem paitim man o bikpela stil samting, na ol i stretim inap 90 pesen bilong ol pasin nogut olsem man i kilim man i dai.
Kisim Bagarap Long Wilwil Bilong Putim Kaikai
Wanpela lain (Consumer Product Safety Commission) long Amerika, long yia 1990, ol i tok, 32,866 manmeri i kisim bagarap long ol wilwil i holim basket bilong karim ol kaikai insait long ol bikpela stua. Winim 58 pesen em ol i kisim bagarap em ol pikinini. Wanpela nius (The New York Times) i tok, ‘winim 19,000 pikinini em ol i no winim yet 5-pela krismas, ol i save go long haus sik, long wanem, ol i kisim bagarap.’ Ol man i skelim dispela samting i tok, dispela samting i save kamap taim papamama i lusim pikinini i stap wanpis, na em i stap insait o klostu long wilwil bilong putim kaikai long en.
Lukautim Ol Animal Long Bus Bilong Esia
Dispela em i wanpela bikpela hevi i wok long painim kantri Tailan long Esia. Wanpela nius (Asiaweek) i tok, Tailan em i kamap olsem “bikpela supamaket bilong baim ol animal bilong bus long en na salim i go long olgeta hap bilong graun,” long wanem, ol man bilong Tailan i salim ol animal i go long ol narapela kantri long pasin hait na ol i no kisim wanpela kain pas long gavman bilong tok orait long mekim dispela wok. I olsem gavman bilong Tailan i no bin putim lo bilong lukautim ol animal bilong bus em ol i no save bagarapim ol man. Nau ol man bilong dispela kantri i salim ol animal i go long ol narapela kantri i stap klostu long ol, olsem wok bisnis long en. Ol i salim ol kain kain pisin na sampela kain pisin i no gat long ol dispela hap. Na tu, long sampela haus kaikai ol i kukim ol kain kaikai ol i kolim ‘kaikai bilong bus,’ i gat ol abus long en olsem pukpuk na wanpela kain dia na pik bilong bus na sampela ol narapela kain animal bilong bus i no gat planti ol i stap.
Wanpela Kain Lotu i Go Bikpela
Wanpela lain long gavman bilong Ostrelia (Bureau of Statistics) i tok, nau planti man i bihainim wanpela kain pasin bilong lotu, tasol i no long ol lotu i bin i stap longpela taim bipo o long sampela ol liklik lotu nabaut. Long 1986 wanpela lain bilong gavman long lain bilong kaunim ol man ol i kisim save olsem: Ol man i tok ol i no gat lotu na ol man i no laik tokaut olsem ol i gat lotu o nogat, dispela ol lain i kamap bikpela moa. Dispela lain bilong gavman i tok, klostu olsem 25 pesen bilong ol manmeri long Ostrelia i gat narapela kain tingting long lotu, na dispela namba i winim tru namba bilong ol manmeri i bin i gat dispela kain tingting long 20 yia bipo. Wanpela profesa bilong lotu long wanpela yunivesiti, em G. Bailey, em i bin tokim lain bilong wanpela nius (The Weekend) long Sidni olsem dispela lain manmeri ol i gat ‘wanpela samting em i olsem lotu bilong ol.’ Em i makim ol samting olsem mani kago samting i kirapim ol man bilong graun na ol ‘i gat pasin mangal long kisim planti samting bilong graun na ol i ting ol dispela samting em i rot bilong kisim bek ol na helpim ol long kisim gutpela sindaun.’