Ol Yangpela i Laik Save . . .

Olsem Wanem Long Mekim Samting Yumi Save Laikim?

SAMPELA samting ol man i mekim i save kamapim amamas. Sampela yangpela ol i amamas long subim wara long taim bilong malolo bilong ol, o pilai kikbal, o ran i go long sampela hap. Ol narapela em ol i no laik pilai samting ating ol i laik harim ol musik, o go wokabaut long bus samting, o stap tasol long haus na kaunim ol buk. Na sampela ol i laik kisim save long mekim o wokim wanpela samting, o bungim sampela samting ol i laikim tru. Yangpela meri Natale em i save amamas long pilaim musik ol i kolim flut. Na liklik susa bilong em Niki, em i save bungim ol doli.

Taim yu mekim sampela samting yu save laik long mekim, yu no ken les long stap nating long taim yu gat malolo. Na tu, dispela bai helpim yu long stap isi, na i helpim tingting bilong yu tu. Wanpela dokta bilong Kanada i tok: ‘Sapos man i no mekim sampela samting em i save laikim, em i no inap i stap amamas. Maski em wanem kain wok, bai em i helpim yu tru.’ Tasol yu mas bosim gut dispela samting yu save laik long mekim, nogut em i pulim bikpela hap taim bilong yu. Olsem wanem yu inap bosim gut dispela samting?

Pastaim, yu mas skelim wanem ol samting i bikpela samting long yu, olsem: Oltaim go long ol miting Kristen, na mekim gut ol wok long haus, na mekim ol homwok. (Filipai 1:10) Na nau yu ken skelim yu gat hamas hap taim i stap bilong mekim ol samting yu save amamas long mekim.

Ol Gutpela Samting Bilong Mekim

Yumi ken lain long wokim samting long tret o rop, olsem wokim bilum samting, na samapim laplap, na wokim piksa bilong kain kain samting. Ol yangpela meri i save amamas long mekim ol dispela samting. Olsem wanem? Kukim kaikai em wok bilong ol meri tasol? Nogat. Ol man tu i ken lain long kukim kaikai. (Skelim Jon 21:​9-12.) Taim yu lain long kukim kaikai, dispela bai helpim yu long bihain sapos yu wanpela yu stap, olsem yu inap lukautim yu yet. Na ol yangpela meri tu inap lain long mekim ol wok em ol man i save mekim, olsem mekenik long ka o stretim ol samting long haus i bagarap.

Narapela samting long mekim em olsem: Lainim wanpela tok ples. Yangpela man Jems, nau em i wok long lainim tok ples Rasia. Ating bihain yu inap mekim wok long narapela tok ples long autim tok long ol man bilong narapela kantri! Olsem na ol samting yu amamas long mekim inap long helpim ol narapela tu.

Yu save amamas long wokim gaden? Sapos yu wokim liklik gaden bilong bubu bilong yu o bilong sampela lapun em ol i no inap lukautim, em gutpela tru. Yu save amamas long mekim ol wok olsem? Sapos olsem, yu inap helpim ol narapela lapun o meri wanpis long mekim sampela wok bilong ol. O yu ken kukim wanpela kain kaikai yu save laik tru long wokim, na givim long narapela olsem presen. Jisas i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”​—Aposel 20:35.

Ol dispela samting yu save laik long mekim inap helpim yu long ol samting bilong spirit tu. Sapos yu save amamas long wokim piksa, orait wokim piksa bilong bot bilong Noa, na ating dispela bai helpim yu long save Noa i gat strongpela bilip tru. (Lukim bokis daunbilo.) Sapos yu wokim piksa bilong haus lotu sel bilong ol Israel, bai yu save gut long ol samting lain bilong God long bipo i bin mekim bilong lotuim Jehova. Baibel i stori long Devit em i pilaim wanpela kain musik olsem gita taim em i malolo. Bihain em i raitim ol singsing bilong litimapim nem bilong Jehova. Yu inap lain long sampela musik? Sapos olsem, yu ken lain long mekim ol nupela singsing long buk singsing Mekim Singsing Long Jehova.a Taim yu pilaim musik bilong ol dispela singsing, tingim gut ol toktok bilong singsing. Na sapos yu save laik long bungim ol samting, orait, bungim ol samting em Baibel i stori long en. Katim sampela piksa bilong ol kantri em Baibel i stori long en na putim long wanpela buk.

Tingim Gut Ol Samting Pastaim

Maski i gat planti ol gutpela samting bilong amamas em yu inap mekim, i gutpela sapos yu skelim pastaim olsem: I gat sampela samting yu mas lusim bilong mekim ol dispela samting? (Luk 14:28) Yu mas tromoi bikpela mani long mekim olsem?

Ol wok yu mekim inap helpim yu long kisim laip oltaim o yu inap lus long dispela gutpela samting. Jisas i tok: “Long mani nogut bilong dispela graun yupela i mas mekim ol manmeri i kamap pren bilong yupela. Na bihain, taim dispela taim bilong holim mani em i pinis, orait [Jehova na Krais Jisas] i ken kisim yupela i go long ol haus i stap gut oltaim oltaim.” (Luk 16:9) Nogut yu tromoi bikpela mani long dispela samting yu laik mekim na yu no gat hap mani bilong “givim long Bikpela olsem ofa.” (Sindaun 3:9) Olsem wanem? Yu mas kisim wanpela wok mani bilong baim ol samting bilong mekim dispela wok yu save amamas long mekim? Sapos olsem, ating bai yu lusim ol wok bilong spirit.

Skelim Gut Ol Samting!

Askim skin bilong yu: ‘I gutpela mi bung wantaim ol narapela i gat wankain laik long ol samting olsem mi yet? Olsem wanem long pasin bilong bilas na kain amamas bilong skin ol i laikim, na toktok bilong ol? Bai dispela i helpim mi o daunim mi? Bai mi laik tumas long poromanim ol na mi no poromanim tumas famili bilong mi na ol brata Kristen? Mi save larim ol laik bilong skin i pulim mi, olsem na mi bung wantaim ol poroman nogut?’ Baibel i tok: “Sapos yu poroman wantaim ol man nogut, bai ol i bagarapim gutpela pasin bilong yu.”​—1 Korin 15:33.

Dispela samting yu amamas long mekim i litimapim wanem kain pasin? Em i litimapim pasin bilong tingim yu yet? Em i inap givim sik long yu? Sapos olsem orait, tingim tok bilong aposel Pol, “Sapos yumi laik mekim bodi bilong yumi i kamap strong, na yumi save trening oltaim, dispela bai i helpim yumi liklik. Tasol sapos yumi trening long mekim pasin bilong God i kamap strong long yumi, dispela bai i helpim yumi moa yet.”​—1 Timoti 4:8; Galesia 5:26.

Solomon i bin tok: “Olgeta samting i kamap long dispela graun, i save kamap long taim bilong em yet.” Na i gat “taim bilong lap.” Olsem na ol samting bilong amamas i gat taim bilong mekim. Na tingim dispela: No ken larim dispela kain amamas i pulim yu tumas na yu lusim tingting long samting i bikpela moa olsem Solomon i tok: “Namba wan samting long laip bilong yumi man i olsem: Yumi mas aninit long God tasol na bihainim ol lo bilong em.”​—Saveman 3:​1, 4; 12:13.

[Ol Futnot]

[Blok long pes 22]

Mi Wokim Sip Bilong Noa!

Mi save amamas long wokim ol samting long han bilong mi. Na wanpela taim mi laik save moa long sip bilong Noa, olsem na mi kirap long wokim piksa bilong en.

Pastaim mi kaunim gut stori i stap long Baibel long Stat 6:​14-16, na ol narapela buk samting em Sosaiti Was Taua i kamapim. Mi kisim save olsem dispela sip i no olsem ol sip ol man i wokim long nau. Em i olsem wanpela traipela bokis em mak bilong en i olsem: longpela bilong en em inap olsem 130 mita, na braitpela bilong en i olsem 22 mita, na antap bilong en i olsem 13 mita. Em i traipela sip tru, tasol i no inap karim wan milion ol kain kain animal samting long en olsem ol saveman bilong saiens i tok nau ol i stap long graun. Sampela man i skelim dispela samting na ol i ting, i gat olsem 43 ‘narapela narapela kain’ animal na 74 ‘kain kain’ pisin, na 10-pela ‘kain kain’ snek samting, na ol inap kamapim planti narapela narapela kain ol animal samting i stap long nau.

Taim mi skelim olgeta dispela samting mi save Noa i mekim bikpela wok tru. I no gat ol so i wok long paua bilong katim ol diwai na wokim ol plang, na i no gat trakta bilong pulim ol diwai i kam long ples em ol bai wokim sip long en, na no gat traipela masin bilong sanapim banis bilong bot. Wok mi mekim em i liklik samting tasol, tasol wok bilong Noa i winim tru wok bilong mi! Mi kisim sampela stik bilong ol gras nabaut olsem ‘diwai’ bilong mekim wok long en. Na mi wokim ol ‘animal’ long graun malumalum. Ol samting i stap insait long sip mi mas makim nating. Olsem: Mi ting Noa na famili bilong em bai i stap long plua antap tru, i gat lait na ol windo long en. Na mi putim ol animal long ol plua daunbilo long sip.

Mi wok strong long wokim dispela sip, na planti aua bihain mi pinisim dispela wok bilong mi. Planti ol i tok em i narapela kain stret, tasol sip Noa i bin wokim em i longpela moa na i bikpela moa na i braitpela moa na i antap moa, winim piksa bilong en mi wokim nau. Dispela wok i mekim na mi laik tru long save moa long sip bilong Noa. Na sapos mi inap i stap long nupela taim God bai kamapim na lukim ol man i dai pinis i kirap bek, bai mi askim Noa long helpim mi long wokim nupela piksa bilong dispela sip​—na olgeta mak bilong en bai i stret olgeta.​—Wanpela yangpela i salim dispela stori.

[Ol Piksa long pes 23]

Ol samting yu save laik long mekim i givim amamas long yu na ol narapela wantaim?

Taim yu bungim piksa bilong ol kantri samting em Baibel i stori long en, dispela bai helpim yu long tingim ol stori bilong Baibel