“No Ken Mekim Wanpela Samting, Nogut Mi Kilim Yu”

Mi sindaun insait long ka na nus bilong gan i pas long het bilong mi long windo na wanpela nek i tok:

“Meri, yu no ken lukluk long mi. Opim dua bilong ka na surik i go long sia bilong pasindia.” Nau mi mekim olsem dispela man i tok na em i kalap long sia bilong draiva, tasol em i poinim gan yet long mi.

Em i askim mi: “Yu gat ki bilong haus beng?”

Mi tok: “Mi no gat ki. Tasol narapela i holim ki, klostu em bai kamap bilong opim dua.”

Em i mekim tok lukaut olsem: “No ken mekim wanpela samting, nogut mi kilim yu i dai.” Em i kirapim ka bilong mi na i draiv i go.

Bipo tu dispela kain samting i painim mi. Mi bin wok olsem tela long wanpela haus beng (Trust Company Bank). Long mun Epril i go pinis wanpela meri i subim paus long ai bilong mi na em i tok: “I gat gan insait long paus. Givim mani long mi.” Nau mi mekim olsem em i tok.

Na sampela wik bihain wanpela man i kam long windo bilong tela mi stap long en na gan bilong em i stap ples klia tru. Em i tok: “Givim mani long mi.” Nau mi givim ol mani pepa long em.

Dispela kain samting i mekim na mi les pinis. Mi askim bos long mi laik i go long narapela haus beng bilong dispela lain beng. Ol i mekim olsem mi bin askim ol. Na long dispela Fonde long moningtaim, long Me 23, mi sindaun insait long ka long ples bilong putim ol ka bilong ol lain bilong beng, long Peachtree Mall, Kolambas, Jojia. Mi wet long beng i op. Em olsem 8:25 long moningtaim. Mi save kam hariap liklik na kaunim sampela tok bilong Baibel long olgeta de. Hap bilong Baibel long kaunim long dispela moningtaim em long Matyu 6:​13, em i tok: “Na yu no ken larim ol traim i kamap long mipela.” Mi no save olsem dispela tok bai strongim mi i go inap 2-pela de bihain.

Mi kam wok long dispela haus beng inap 2-pela wik tasol na ol i no givim yet wanpela ki long mi. Mi putim windo bilong ka i go daun liklik na mi wok long tingim tok bilong Baibel nau mi kaunim taim nus bilong gan i kamap long windo bilong ka. Inap tupela taim pinis ol stilman i kam kisim mani bilong haus beng. Na nau ol i kisim mi i go.

Taim dispela man i draiv i go, mi kirap na beten strong: “O Jehova, plis helpim mi!”

Man i karim mi i go em i askim mi: “Jehova em i husat?”

Mi tok: “Em God mi save lotu long em.”

Em i tok: “Yu no ken lukluk long mi! Lukluk long windo bilong yu! Jehova . . . em ol lain bilong Wastaua​—ol Witnes Bilong Jehova, a?”

Mi tok: “Em i stret.”

Man ya i tok: “Mi bin save long ol taim mi stap long Nu Yok. Mi bilong lotu Katolik. Tasol yu beten isi isi, no ken toktok strong. Mi no laik harim beten bilong yu.” Em i tok moa: “Harim, mi no laik bagarapim yu. Mi laikim mani tasol​—yu nogat. Sapos yu no mekim wanpela samting bilong pasim mi, bai mi no ken bagarapim yu.”

Taim mipela draiv i go em i askim mi long ol samting bilong haus beng. Olsem: Husat bai opim dua. Wanem taim bai ol i opim haus beng na bai ol manmeri i ken i go insait. Na i gat hamas mani olgeta i stap long beng. Em i mekim planti narapela askim moa. Mi bekim tasol ol samting mi save long en, na tu, mi wok long beten. Mi singaut long Jehova i ken helpim mi na mi inap winim dispela hevi i kamap.

Inap 10-pela minit bihain em i draiv i go insait long wanpela rot long bus. Ating em i wet long bungim narapela man, long wanem em i toktok isi isi long em yet: “Em i stap we? Em i stap we?” Man ya i pasim ka na i kalap i go ausait, na em i tokim mi long mi mas go long hapsait em draiva i sindaun long en na i go ausait. Em i kisim mi i go insait tru long bikbus. Mi lukluk tasol long graun na bai mi no ken lukim pes bilong em na em i holim gan long sait bilong mi. Klos na su bilong mi i mekim na mi hatwok long wokabaut insait long bus. Mipela kamap long wanpela diwai na em i tanim pes bilong mi i go long diwai na em i pasim wanpela kain plasta long ai na maus bilong mi. Nau em i pasim han bilong mi long baksait bilong mi na bihain em i pasim mi long dispela diwai.

Nau mi guria nogut tru. Em i tokim mi, mi no ken guria, tasol mi tok mi no inap long pasim. Em i tok strong: “Orait, stap isi. Wanpela man i was long yu, na sapos yu strong long lusim na ranawe, bai em i kilim yu.” Bihain em i lusim mi. Mi tingim tok bilong Baibel bilong dispela de i tok: “Yu no ken larim ol traim i kamap long mipela,” na mi save dispela tok em i stret long dispela taim nau, em hevi i painim mi.

Liklik taim bihain em i kam bek, tasol mi save em i kisim narapela ka, long wanem mi inap harim save krai bilong ka bilong mi. Ating em i kisim ka bilong em yet. Em i rausim plasta i bin pasim mi long diwai, tasol plasta i pasim ai na maus bilong mi, em i larim i stap, na han bilong mi i kalabus yet. Bihain mipela lusim bus na go bek long ka. Nau em i opim baksait bilong ka na em i pasim mi insait long en na draiv i go.

Mi kirap gen long beten. Inap planti taim mi beten askim Jehova long strongim mi bambai mi inap sanap strong na winim wanem ol traim moa bai kamap bihain. Inap 15 o 20 minit bihain em i pasim ka na i opim baksait bilong en, na em i rausim plasta long maus bilong mi. Em i askim mi long namba bilong telefon long haus beng na long nem bilong bos bilong mi. Mi tokim em pinis na em i pasim bek plasta long maus bilong mi. Bihain mi harim olsem em i bin ring long haus beng na i singaut long mani inap olsem 150,000 kina.

Em i ring long wanpela bos bilong beng, em Jos, long kam long wanpela haus telefon long hap saut bilong Atlanta wantaim mani long 2 klok long apinun. Dispela man i toksave long mi long ol dispela samting na em i tok, klostu nau bai em i larim mi i go. Tasol 2 klok i olsem longpela taim tru na mi stap kalabus insait long baksait bilong ka na mi tuhat nogut tru. Isi isi taim i wok long lus. Wanpela o 2-pela taim em i kam lukluk long mi, mi stap olsem wanem. Na em i tok: “God bilong yu Jehova em i wok yet long lukautim yu.” Em i tingim beten bilong mi long moningtaim.

Mi tingting long famili bilong mi. Ol i save olsem mi no bin kamap long ples wok? Na sapos ol i harim pinis, ol i ting olsem wanem? Mi tingting planti long ol na mi no tingim hevi bilong mi, em mi stap kalabus yet. Mi tingim wanpela tok bilong Baibel i tok, nem bilong Jehova ‘i olsem wanpela strongpela haus. Ol stretpela man i ken ran i go long en na i stap gut.’ Narapela i tok, ‘Olgeta manmeri i askim Jehova long helpim ol, em bai i kisim bek ol.’ Mi bihainim tok bilong aposel Pol, em i tok long “beten oltaim.” (Sindaun 18:10; Rom 10:13; 1 Tesalonaika 5:17) Mi tingim ol tok bilong Baibel na mi tingim sampela toktok na musik bilong Kingdom long buk singsing olsem: ‘Jehova Em i Strong Bilong Yumi,’ na ‘Jehova i Ples Hait Bilong Yumi.’

Mi tingim bek ol stori mi bin kaunim long Wastaua na mi save Jehova i bin helpim ol narapela long taim hevi i painim ol. Wanpela stori long Kirap! i pas tru long tingting bilong mi, em wanpela raskolman i laik stilim mani long haus beng na em i holimpas wanpela Witnes i stap long dispela haus beng.a Raskolman i holimpas Witnes long nek, na em i holim wanpela hanbom bilong pretim em. Dispela hevi i stap inap planti aua; em wantaim man i holimpas em i stap insait long haus beng na ol polis i raunim ausait bilong haus. Witnes ya i bin beten long Jehova, na em i tingim tu ol tok bilong Baibel, na dispela i bin strongim bel bilong em na em i winim dispela hevi. Bihain em i go bek long famili bilong em.

Bihain draiva i pasim ka na em i kalap i go daun. Mi no inap lukim hanwas bilong mi​—han bilong mi i kalabus yet long baksait. Tasol mi ting em olsem 2 klok na man ya i go bilong telefon long Jos long haus beng. Mi tingting, liklik taim na bai em i larim mi i go. Tasol ol samting i no kamap olsem em i bin laikim, olsem na em i kalap gen long ka na draiv i go.

Nau wantu ka i ran spit nogut tru! Na tu, ka i ran kranki nabaut, i olsem bilong abrusim ol narapela ka. Mi stap long baksait bilong ka na mi bam bam nabaut na bamim het bilong mi long banis bilong ka. Han i kalabus yet, olsem na mi no inap long mekim wanpela samting bilong pasim. Dispela samting i kamap inap 10-pela minit samting, tasol i olsem longpela taim tru.

Bihain em i pasim ka na i kam opim baksait bilong ka long lukim mi i stap olsem wanem. Mi guria na skin bilong mi i pen nogut tru. Klok bilong mi i wok hariap hariap, na tu, mi hatwok long pulim win. Tuhat i kapsait na mi hatwok long rausim tuhat. Ai na maus i pas yet na mi hatwok long pulim win long nus tasol. Man i rausim plasta long maus bilong mi na bai mi ken pulim win gut na toktok liklik sapos mi laik.

Em i tok ol polis i luksave long ka bilong em na ol i kirap ranim em. Olsem na em i spit nogut tru bilong abrusim ol narapela ka na bai em i no ken bamim ol. Na tu, em i no kisim mani yet, tasol em i tok em bai traim narapela rot bilong kisim mani na dispela bai kisim bikpela hap taim moa, tasol mi no ken tingting planti long dispela samting. Em i tok em i no ken bagarapim skin bilong mi​—em i no bin tingting long mekim olsem. Em i laikim mani tasol na mi olsem gutpela rot bilong em long kisim mani. Taim em i tok olsem, nau bel bilong mi i stap isi liklik, long wanem mi bin beten askim Jehova long helpim mi long wanem samting mi mas mekim sapos dispela man i laik bagarapim mi.

Isi isi taim i wok long lus, na em i pasim ka inap 2-pela taim, ating bilong ring long telefon o bilong painim sampela rot moa bilong kisim mani. Wanpela taim em i pasim ka na mi harim em i pulimapim bensin long ka. I no gat bikpela hap long baksait bilong ka na mi laik tanim na mi mekim pairap. Wantu em i opim baksait bilong ka na i tokim mi, mi no ken mekim pairap. Mi no save em wanem taim nau. Pastaim em i bin kolim taim olsem 2 klok. Nau em i no mekim olsem, tasol mi save mipela i stap yet long hap bilong Atlanta, long wanem, mi harim ensin bilong ol balus, em sampela balus i kirap bilong i go na sampela i kam daun long ples balus.

Bihain em i kam opim baksait bilong ka na i tokim mi, ‘Wanpela aua moa na bai yu fri.’ Em i bin tok olsem inap planti taim na mi no bilipim tok bilong em moa. Mi tingting tasol olsem liklik taim bai em i larim mi i go. Maski san i no hat tumas, tasol insait long baksait bilong ka mi tuhat nogut tru. Tuhat bilong mi i kapsait na mi hatwok long pulim win gut. Mi no save bai mi stap laip longpela taim o nogat, olsem na mi beten long Jehova long kirapim bek mi sapos mi dai.

Mi beten olsem sapos mi dai, Jehova i ken strongim famili bilong mi. Mi tingting long ol na long mi yet. Mi save sapos mi dai, Jehova bai kirapim mi bek na bai mi bung gen wantaim famili bilong mi long nupela taim em God i tok promis long en, na i gat stretpela pasin tasol bai i stap long en. (Jon 5:​28, 29; 2 Pita 3:13) Tingting bilong mi long Jehova na long ol tok promis bilong em i strongim mi long sanap strong.

Draiva i opim gen baksait bilong ka na long dispela taim nau ples i tudak​—inap sampela aua pinis tudak i bin i stap. Em i wok strong long kisim mani olsem bilong ol i ken baim mi bek, tasol em i no kisim dispela mani. Em i tok em i les pinis long painim rot bilong kisim mani, olsem na bai em i bringim mi i go bek long Kolambas na larim mi i go. Taim mipela i kam bek, skin bilong mi i les nogut tru. Mi stap yet long baksait bilong ka na mi tingting olsem dispela samting i mas pinis liklik taim. Na mi tingting, ‘mi no ken slip nau, mi mas stap strong. Klostu dispela hevi bai pinis. Em i les pinis na em bai kisim mi i go bek long ples bilong mi.’

Em i laik lusim mi long ka bilong mi yet, tasol ka i no stap long ples em i bin putim. Olsem na em i kisim mi i go long wanpela Haus Kingdom bilong ol Witnes Bilong Jehova. Lait i stap yet long haus em wanpela wasman bilong raun i stap long en. Man ya i tok, ‘Mi no ken lusim yu long hap i gat ol man i stap long en!’ Tasol em i larim mi i lusim baksait bilong ka long namba wan taim nau. Plasta i pasim yet ai na han bilong mi, tasol em i rausim plasta long maus bilong mi. Ai bilong mi i raun na mi no inap wokabaut gut, long wanem lek bilong mi i dai. Em i putim mi i go bek long baksait bilong ka na i kisim mi i go na lusim mi baksait long haus lotu bilong ol Baptis na em i draiv i go. Nau taim em olsem 1:30 moningtaim long Fraide.

Ai bilong mi i raun liklik, olsem na mi sindaun na mi hap i dai. Laspela samting mi harim em ka bilong dispela man i draiv i go. Bihain tingting bilong mi i klia na mi kirap​—inap 3-pela aua pinis mi bin slip long gras i gat graun malumalum long en. Mi lukim hanwas bilong mi na klostu em 5 klok. Inap 17 aua olgeta mi bin i stap insait long baksait bilong ka, na 3-pela aua samting mi bin hap i dai. Lek bilong mi i guria na mi wokabaut i go. Wanpela man i laik draiv i go na mi tokim em olsem: Wanpela man i bin holim mi na karim mi i go, na mi laik ring long famili bilong mi na toksave long ol na long ol polis tu. Inap 10-pela minit bihain ol polis i kamap. Nau hevi i pinis.

Ol i kisim mi i go long wanpela haus sik na ol dokta i lukim mi. Mi no bin kaikai o dring o pispis samting inap 20 aua i go pinis, na mi no gat ol samting bilong stretim skin bilong mi, na tu, mi slip inap 3-pela aua tasol. Olsem na skin bilong mi i solap nabaut na dres bilong mi i gat graun malumalum long en, na gras bilong mi i no sindaun gut, na pes bilong mi i gat ol mak mak bilong plasta long en. Mi no tingim dispela samting taim mi bungim man bilong mi Brad, na mama bilong mi Glenda, wantaim planti ol narapela pren na wanblut bilong mi em ol i kam bilong tok amamas long mi. Ol tu i bin tingting planti long mi.

Taim mi pinis long haus sik, mi go long polis stesen na bekim ol askim bilong ol na wokim wanpela ripot long dispela samting i painim mi. Bihain, long wanpela nius (Colombus Ledger-Enquirer, bilong Me 25, 1991), ol polis i tok ol i holim pinis dispela man na em bai kot long ol narapela pasin nogut tu em i bin mekim pastaim; long wik i go pinis em i bin bagarapim wanpela meri, na em i bin mekim pasin sodom. Em i mekim ol dispela rong, olsem na bihain liklik em i kam karim mi i go. Bikman bilong ol polis, nem bilong em Wetherington, em i tok moa long dispela nius olsem: “Mipela tingting planti long laip bilong Lisa.” Dispela tok bilong em i strongim mi long save, mi bin larim mi yet long han bilong Jehova na em i helpim mi long i stap laip.

Taim mi go bek long haus bilong mi, mi waswas gut na kisim gutpela slip bilong strongim skin bilong mi. Paslain long mi laik slip, mi tingim dispela tok bilong Baibel long Matyu 6:​13, na dispela i mekim gut bel bilong mi, na mi pilim tru tok bilong Buk Song 146:​7, em i tok: “Bikpela i save pinisim kalabus bilong ol man i stap long kalabus.”​—Lisa Davenport i mekim dispela stori.

[Ol Futnot]

[Rait long pes 17]

‘Yu beten isi isi. Mi no laik harim beten bilong yu’

[Rait long pes 17]

Em i opim baksait bilong ka na em i pasim mi insait long en, na em i draiv i go

[Rait long pes 18]

Mi stap long baksait bilong ka na mi bam nabaut na bamim het bilong mi long banis bilong ka

[Rait long pes 19]

Mi stap yet long baksait bilong ka na mi tingting olsem dispela samting i mas pinis liklik taim

[Rait long pes 20]

Inap 3-pela aua pinis mi bin slip long gras i gat graun malumalum long en

[Piksa bilong Lisa Davenport long pes 20]