Naispela Kapul

Wanpela man long Papua Niugini i raitim dispela stori bilong Kirap!

DISPELA naispela kapul, gras bilong en i waitpela liklik na em i gat raunpela pes na traipela nus na bikpela ai. Yau bilong en i hait long gras, na longpela tel bilong en i no gat gras. Ating taim mipela olgeta i lukluk long en, em i kirap nogut.

Taim mipela i laik i go klostu moa long en, em i kalap i go antap moa yet long diwai, na holim ol han bilong diwai long 4-pela han lek na sampela taim long tel bilong en.

Lain Bilong Koala

Kapul em i narapela kain animal na em i stap long ol ailan bilong Papua Niugini, na long ol hap not bilong Ostrelia, na long sampela ailan i stap klostu. I no planti man i save gut long kapul, olsem ol i save long koala, tasol planti samting bilong kapul i wankain olsem long koala.

Olsem koala, kapul em i wanpela masupil​—olsem em i gat bilum​—na taim em i karim pikinini em i save givim susu long en na karim raun. Kapul i save stap hait antap long ol diwai na long san em i save slip. Taim em i sindaun antap tru long wanpela diwai em i larim longpela tel bilong en i pundaun na raunim diwai na em i no save tingim ol samting i kamap daunbilo. Kapul i save slip long san, olsem na long nait em i save kirap na raun.

Taim kapul i stap long bus em i save kaikai ol lip samting bilong diwai, na ol liklik pisin na binatang. Ol saveman i kolim dispela animal olsem Phalanger, na insait bilong dispela nem i olsem ‘wanpela samting i gat samting kain olsem pinga.’ Mipela i lukim wanpela kapul i sindaun na i rausim skin bilong banana na em i amamas long rapim long tang olsem yumi save mekim long aiskrim.

Gutpela Samting Bilong Lukautim

Planti man i save amamas long lukautim kapul, long wanem, em i save stap isi tru​—em i no man bilong pait. Ol kapul i gat kain kain kala. Gras bilong ol inap waitpela, braunpela, waitpela liklik o blakpela liklik. Sampela i gat ol makmak na sampela i gat wanpela longpela mak long baksait bilong ol. Em i gat planti gras, na ai bilong en i bikpela na i raunpela na i olsem em i lukluk strong, na em i save wokabaut isi isi​—dispela ol samting i mekim na ol man i save amamas long lukautim kapul.

Sapos yu was gut long longpela kapa bilong pinga bilong han lek bilong en yu ken holim kapul olsem wanpela pusi. Longpela bilong bodi bilong kapul inap olsem 60 sentimita, na longpela bilong tel bilong en i olsem 30 sentimita. Long arere bilong tel i no gat gras, tasol i gat samting olsem grile bilong pis long en. Taim yu lukim na holim tel i olsem sanpepa​—dispela samting i helpim kapul long taim em i laik holimpas ol samting long tel bilong en.

Mipela i amamas tru long lukim pasin bilong wanpela kapul i kaikai kon. Em i holim kon long tupela han bilong en na em i kaikai wanpela lain kon pastaim. Taim em i pinisim dispela lain kon em i kirap long kaikai nupela lain kon. Taim em i pinisim kon olgeta em i rapim han long tang bilong en na sindaun amamas i stap long wanpela han bilong diwai.

Man yet i olsem namba wan birua bilong kapul. Ol i kilim ol kapul long kaikai abus bilong en na long kisim gras bilong en long wokim ol hat samting. Bikbus em i ples bilong kapul, tasol ol man i wok long katim na pinisim bikbus bilong wokim ol haus, na kamautim ol gol samting long graun, na wokim ol samting bilong ol turis, na klostu nau bai i no gat bus moa bilong ol kapul i ken stap long en. Em nau, ol man i wok long bagarapim ol samting God i bin putim long han bilong ol long lukautim.​—Stat 1:26; KTH 11:18.