Narapela Hevi i Bagarapim Graun

OL MAN i tok, wankain hevi i no ken kamap tupela taim long wankain ples. Tasol yumi no ken tok olsem long ol sip i karim bikpela wel. Tupela taim insait long 20 yia, dispela hevi i bin kamap long taun La Korunya long nambis long not-wes Spen.

Long Disemba 3, 1992, sip Aegean Sea bilong Grik i bin bruk long rip bilong nambis, em taun La Korunya i stap long en. Sampela aua tasol na sip i bruk long tupela hap, na 7-pela bilong ol 9-pela tang bilong en i paia. Traipela smok i go antap na makim hap dispela hevi i bin kamap long en. Presiden bilong Spen (Felipe González) em i tok, dispela i makim bikpela hevi i bagarapim graun.

I gat inap 72,000 ton wel long dispela sip, em ol i bin kisim long Not Si. Long de bihain long dispela hevi, wel i bin go nabaut inap 50 skwea kilomita na em i wok long go insait long maus bilong 4-pela wara klostu. Long 1977 narapela sip (Urquiola) i bin go daun long maus bilong dispela pasis yet na 90,000 ton wel i lus na bagarapim nambis.

Dispela i bagarapim planti pis. Na sampela tausen man i wok mani long painim pis, wok bilong ol i bagarap. Nau tasol sampela bilong ol dispela man bilong painim pis i bin kisim kompensesen long hevi i bin kamap long 1977, tasol sori, wankain hevi i kamap gen. Bilong wanem planti sip bilong karim wel i save bagarap? Tru, i gat biksi long dispela nait sip Aegean Sea i bagarap, tasol ol i ting asua bilong ol man na em i bagarap.

Ating yumi kirap nogut, long wanem, sip i bruk long rip 90 mita klostu long haus lait bilong ol sip. Long olgeta hap graun i no gat narapela haus lait bilong ol sip i olpela olsem dispela na i wok yet. Ol Rom i bin sanapim klostu 2,000 yia i go pinis. Inap long nau lait bilong dispela haus lait i tanim tanim yet na sutim lait i go bilong toksave long ol man. Tasol sori tru, long Disemba 3, 1992, ol man long sip Aegean Sea i no bihainim dispela toksave bilong en.

[Piksa Kredit Lain long pes 31]

Foto Blanco