Pas Bilong Ol Man

Kros Pait Bilong Famili  Mi laik tok tenkyu long yupela long ol stori “Kros Pait Bilong Famili Bai Pinis? o Olsem Wanem?” (Oktoba 8, 1993) Mi marit 22 yia na laspela 10-pela yia bilong dispela 22 yia, man bilong mi i bin bagarapim mi. Tasol pasin bilong bagarapim bel i moa nogut winim pasin bilong paitim skin bilong narapela. Yumi no inap lukim bagarap long bel na dispela inap senisim tru tingting na pasin bilong yumi, olsem na yumi no inap askim wanpela long helpim yumi. Mi bin kisim dispela kain tingting, olsem na mi laik kilim i dai skin bilong mi yet. Bihain mi lusim man bilong mi na nau mi stap wanpis. Tasol ol stori yupela i kamapim long nius bilong yupela i bin strongim na helpim mi.

B. S., long Jemani

Papa i save paitim mama bilong mi. Mipela tripela pikinini i save bel hevi long pasin bilong papa. Taim em i paitim mama, i olsem em i paitim mipela yet. Wan wan tasol i pilim hevi bilong ol narapela em ol i stap long famili i gat kros pait na pasin birua na i no tingim gut narapela na i no gat pasin sori. Tasol yupela i strongim mipela, long wanem, yupela i save long hevi bilong mipela.

T. G. D. A., long Itali

Mi amamas long yupela i save tokaut long dispela hevi. Inap 14 yia poroman marit bilong mi i bin mekim nogut long mi, na em i tok em i wanpela Kristen. Planti taim ol i tokim mi, mi no ken mekim wanpela samting bilong kirapim kros bilong man bilong mi. Tasol maski mi mekim wanem, man i kros! Bihain mi mas lusim em. Tenkyu tru long ol stori bilong yupela; ol i bin strongim mi. Na ol stori inap helpim sampela i no gat dispela hevi, olsem poroman i no kikim ol o paitim ol o spet long ol. Na ol i ken pilim hevi bilong mipela, em poroman i bin mekim olsem long mipela na nau bel bilong mipela i bagarap.

L. T., long Amerika

Ol stori bilong yupela i sutim tru planti meri, em ol meri i ting ol i stap wanpis na i no gat narapela bilong helpim ol. Mipela i pret na sem, olsem na mipela i no bin tokaut long hevi bilong mipela. Yupela i helpim mipela long save, i no stret long man i paitim mipela, maski ol man i giaman na tok, asua bilong meri na dispela hevi i stap. Nau mipela i save, em i no asua bilong mipela.

B. A., long Amerika

Mi bin kisim Kirap! na nau sampela wik i go pinis. Mi bin beten planti taim bilong kisim strong long kamautim nius long karamap bilong en. Na sampela de i lus pastaim na mi inap subim skin bilong mi long kaunim dispela nius. Tenkyu tru long kamapim ol stori bilong dispela hevi! Man bilong mi i bin paitim mi. Wanpela taim mi slip na man i paitim mi nogut tru. Em i bagarapim bun long pes bilong mi, olsem na ol dokta i mas stretim. Ol polis na wanpela gutpela famili Kristen i stap klostu, i bin helpim mi long ranawe long dispela man. Em i kot na kalabus sampela mun. Nau mi marit gen long wanpela gutpela man Kristen.

P. H., long Amerika