Pris i Tok Ol Witnes i Gat Gutpela Pasin

Wanpela man long Ostrelia i raitim dispela stori bilong Kirap!

LONG 1991 Haus Kingdom bilong ol Witnes Bilong Jehova long Kondobolin, Nu Saut Wels, Ostrelia, i paia. Sampela wik bihain long pas bilong misin wanpela pris Angliken i tok sori, ‘long wanem, wanpela haus lotu i bagarap.’ Pas i tok moa olsem:

‘Lotu bilong yumi na lotu bilong ol i narapela narapela kain, tasol inap planti yia mi amamas long sampela pasin bilong ol long kamapim bilip bilong ol, na mi ting em ol gutpela pasin.’ Wanem ol dispela gutpela pasin em i tingting long en?

Namba wan: ‘Ol i tingting planti long skulim ol man long bilip bilong ol, olsem na ol i save bung tupela o 3-pela taim long olgeta wik bilong mekim olsem.’ Em i stret​—ol Witnes Bilong Jehova i save kaunim buk, skulim man, na autim tok long lotu bilong ol. Long olgeta wik ol i save bung 3-pela taim.

Namba tu samting pris i tingim i olsem: ‘Olgeta taim ol i save go long haus bilong ol man long autim tok bilong lotu. Ol i laik yumi save, namba 3 bikpela lain long Ostrelia, em dispela lain i save tok​—Nogat Lotu (em 3,841,000 manmeri). Ol Witnes i no tingim ol yet tasol, nogat; ol i laik helpim ol narapela man long save long bilip bilong ol.’ Ol Witnes i save ol i mas bihainim tok bilong Matyu 24:14 na Mak 13:10 na autim gutnius.

Namba tri samting: ‘Ol i no singaut mani long ol man na sanapim ol liklik stua arere bilong rot bilong kisim mani, nogat. Ol i kisim mani insait long lain bilong ol yet.’ Baibel i tok: “Samting yupela i bin kisim, em yupela i kisim nating, na i no gat pe bilong en. Olsem na yupela i mas givim nating long ol manmeri,” na “amamas bilong man i givim samting long ol arapela man, dispela i winim amamas bilong man i kisim samting bilong em yet.” Olsem na ol i no singaut long mani. Bokis bilong putim mani long en i no stap ples klia long ples bung bilong ol.​—Matyu 10:8; Aposel 20:35.

Na laspela tok pris i kamapim bilong litimapim nem bilong ol Witnes i olsem: ‘Kwiktaim ol i save sanapim haus lotu bilong ol na ol i no tromoi bikpela mani long en. I gutpela sapos yu wokabaut i go long Gum Ben Lek Rot na lukim wok bilong ol Witnes long sanapim nupela Haus Kingdom bilong ol. Ol i tok ol bai pinisim dispela wok insait long 3-pela de.’ Bihain em i givim wanem tok bilong helpim ol wanlotu bilong em?

‘Ating i gutpela yupela kaunim dispela 4-pela samting mi kamapim antap na askim skin bilong yupela yet, olsem wanem ol dispela samting i ken helpim yupela long mekim wok Kristen bilong yupela. Taim mi tingim dispela 4-pela samting, na skelim wantaim ol Angliken na ol narapela lain Kristen, pasin bilong ol Witnes i win tru.’

Sapos yu laik go long wanpela Haus Kingdom na lukim pasin bilong ol Witnes Bilong Jehova long lotu na save long ol samting ol i bilip long en, gutpela yu go long wanpela Haus Kingdom klostu long yu, o salim pas long mipela na mipela bai toksave long atres bilong Haus Kingdom i stap klostu long yu.

[Piksa long pes 31]

Haus Kingdom long Kondobolin, Nu Saut Wels