Ol i Toktok Wantaim Ol Spirit

NAMEL long wanpela taun long Wes Afrika, wanpela naispela bikpela haus i sanap, kala bilong en i waitpela na grinpela. Taim yu kam insait tupela meri kuskus i wok long paitim taipraita. Sampela man i sindaun long sia na wet long lukim babaláwo, olsem glasman.

Long wanpela ofis, babaláwo i sindaun long tebol, na klostu long tebol i gat wanpela masin feks. Em i gat bikpela skin, na gras bilong em i waitpela. Em i pasim longpela waitpela klos i gat bilas, em klos i gat bikpela pe. Em i tok: “Papa bilong mi i bin mekim wok olsem glasman. Mi kamap insait long dispela pasin, na mi go bikpela long en. Taim mi gat 5-pela krismas na papa i go bilong mekim wok glasman, mi bin go wantaim em. Mi bin lukluk long ol samting em i mekim, na mi bihainim pasin bilong em i go inap long wok glasman i kamap wok tru bilong mi.”

Babaláwo i makim wanpela bikpela toksave ol i bin wokim long diwai na pasim long banis, em wanpela toksave i kamapim olkain pasin bilong glasman em lain bilong dispela glasman yet i bin bihainim inap planti handet yia. Insait long dispela pasin ol i save pilai satu long 16 pikinini bilong welpam, na em i wanpela pasin i bin go nabaut long planti hap bilong Wes Afrika, na long sampela hap moa. Em i tok: “Ol man i save kam long mi ol i gat kain kain hevi​—hevi long meri, o ol i no inap kamapim pikinini, o ol i no gat wok, o ol i longlong, o ol i gat sik, na sampela samting moa. Wanem samting i kamap long wok glasman, dispela i mekim na mipela i save toktok wantaim ol tumbuna i dai pinis o wantaim ol spirit long antap (ol god). Tasol maski mipela i mekim wanem, mipela i mas wokim ofa.”

Long dispela hap ol man i strong long bihainim lotu bilong ol tumbuna, na wok glasman tu. Tasol ol misin tu i strong. I gat ol haus lotu i stap klostu long ol ofis bilong babaláwo, nem bilong ol i olsem: King Solomon Namba 2 Sios; Serabim na Serafim; Selestial Sios Bilong Krais; Apostolik Sios Bilong Krais; Ol Biugel Bilong Krais Sios. Olgeta dispela misin wantaim ol i stap, na sampela taim ol i kisim ol bilip na pasin bilong lotu bilong ol tumbuna. Babaláwo i tok: “Nau tasol mi toktok wantaim bisop. Em i kam lukim mi. Bihain long mipela i stori 30 minit samting em i tok, em i laik mipela ol man i strong long bihainim lotu bilong ol tumbuna i bung wantaim ol Kristen na toktok, na narapela i ken kamapim tingting bilong narapela na stretim ol tingting kranki.”

Ol Dua i Go Long Ples Spirit

Sampela man i gat tingting kranki long husat tru i stap long ples spirit. Long ol hap bilong Afrika long hap saut bilong Sahara, planti man i bilip olsem i gat tupela lain i stap long ples spirit. Namba wan lain em ol god, bipo ol i no bin stap long graun olsem man. Namba tu lain em ol tumbuna, o tewel bilong ol man i dai pinis, na ol i gat wok long was oltaim long famili bilong ol i stap yet long graun, na lukautim ol na bai ol i gat planti samting bilong skin. Ol i bilip olsem tupela lain i gat strong long helpim o bagarapim ol man i stap long graun. Olsem na ol man i strong long tingim tupela lain wantaim na mekim ol samting bilong amamasim ol.

I gat wankain bilip long planti hap bilong graun. Ol man i save mekim kain kain samting bilong toktok wantaim ol spirit, na long kisim save long ol samting bai kamap bihain na long kisim helpim bilong stiaim tingting bilong ol long ol hevi bilong olgeta de. Olsem wanem? Yumi ken kisim helpim long ples spirit? Krais Jisas i bin stap long ples spirit na em i tok, yumi inap kisim helpim. Em i tok: “Askim God long givim ol samting long yupela, na em bai i givim long yupela. Yupela i mas wok long painim samting na bai yupela i lukim. Yupela i mas paitim dua, na God bai i opim long yupela.” (Matyu 7:7) Olsem na yumi mas singaut long God, na painim em long pasin i stret​—em i dua tru bilong kisim dispela kain helpim. Sapos yumi kranki na paitim narapela dua, ating narapela man bai opim na bagarapim yumi​—em i no helpim yumi.

Olsem na i bikpela samting long save husat i stap na husat i no stap long ples spirit. Na yumi mas save long husat bai helpim yumi na husat bai bagarapim yumi. Na tu, yumi mas save long yumi mas mekim wanem bilong kisim helpim long sampela i gat strong bilong helpim yumi. Ol stori i kamap bihain long dispela bai skelim dispela ol samting.

[Piksa Kredit Lain long pes 3]

Piksa long pes 3 na 4: The Star, Johannesburg, S.A.