Baibel i Tok Wanem?

Meri i Mas Daun Olsem Wanem Long Man Bilong Em?

LONG Efesus 5:​22, Baibel i tok: “Yupela meri, yupela i mas aninit long ol man bilong yupela, olsem yupela i save aninit long Bikpela.” Wanem insait bilong dispela tok? Meri i mas daun long man bilong em long olgeta samting maski sampela samting i no stret? Olsem wanem? Meri i no inap mekim wanpela liklik samting long tingting bilong em yet, o kamapim tingting i narapela kain long tingting bilong man?

Tingim stori bilong Abigel long Baibel. Em i bihainim gutpela tingting, tasol i no wankain long tingting bilong man bilong em, Nabal. God i bin makim Devit bilong kamap king bilong Israel, na maski Devit wantaim lain bilong em i bin mekim gutpela pasin long Nabal, Nabal “i givim tok nogut long ol.” Devit i kros nogut tru, long wanem, Nabal i no tingim gutpela pasin Devit i bin mekim long em, olsem na Devit i laik kilim i dai Nabal. Em nau, Abigel i save olgeta lain bilong Nabal inap kisim bagarap long dispela. Tasol Abigel i mekim sampela samting na Devit i no bekim nogut long Nabal. Abigel i mekim wanem?​—1 Samuel 25:​2-35.

Abigel i tokim Devit olsem Nabal em i man nogut, na em i givim long Devit ol kaikai samting Nabal i no laik givim long em. Tru, i no stret ol marit i kamapim pasin kranki bilong poroman long ai bilong ol man. Tasol olsem wanem long Abigel? Toktok na pasin bilong em i makim olsem Abigel i bikhet long man bilong em? Nogat. Em i laik lukautim Nabal na lain bilong em, nogut ol i kisim bagarap. I no gat liklik tok i makim olsem Abigel i no stap daun long man bilong em o em i meri bilong bihainim laik bilong em yet tasol, nogat. Na i no gat wanpela tok i makim olsem Nabal i no amamas long pasin bilong Abigel long lukautim bikpela hap graun bilong em. Tasol long taim bilong dispela bikpela hevi, gutpela tingting bilong Abigel i mekim na em i kirap na bihainim tingting bilong em yet. Na Baibel i tok amamas long samting Abigel i bin mekim.​—1 Samuel 25:​3, 25, 32, 33.

Planti handet yia paslain long Abigel i kamap, sampela taim ol meri bilong ol tumbuna bilong lain Israel, ol i bin kamapim tingting bilong ol yet na mekim sampela samting i narapela kain long laik bilong man bilong ol. Tasol Baibel i tok, ol dispela meri i “givim laip bilong ol yet long God,” pasin bilong ol long daun long man bilong ol i olsem gutpela piksa ol meri Kristen i ken bihainim. (1 Pita 3:​1-6) Olsem: Taim Sara i pilim olsem dispela pikinini Abraham i kamapim, em Ismael, em i wok long kisim ples bilong pikinini bilong em na Abraham, em Aisak, orait em i kamapim tingting bilong em olsem Abraham i mas rausim Ismael. “Abraham i bel hevi” long tok bilong Sara, tasol God i tokim Abraham: “Yu no ken bel hevi . . . bihainim tok bilong Sara.”​—Stat 21:​11, 12.

Bihainim Gutpela Tingting

Olsem na i no gutpela sapos meri i pilim olsem em i mas mekim wanpela samting em i save i no stret em i mekim o i brukim lo bilong God, long wanem, em i mas daun long man bilong em. Na sapos meri i kirap na mekim wanpela bikpela samting em i ting em i mas mekim olsem Abigel na Sara i bin mekim bipo, i no stret man i kirap na sutim tok long meri na nau bel bilong meri i gat tok.

Meri i stap daun long man bilong em i no olsem em i mas bihainim laik bilong man long olgeta samting. Wanem ol samting i mekim na meri i no ken daun long man bilong em? Em i no ken wanbel wantaim man bilong em sapos man i tokim em long mekim wanpela samting lo bilong God i tambuim. Tasol em i no ken bikhet, em i mas mekim pasin daun yet olsem God i laikim.

Tasol meri i mas was gut, nogut em i sakim tok bilong man bilong em long wanem em i laik sakim, o em i laik bekim nogut long em, o em i gat tingting nogut. Olsem Abigel i bin mekim, em i mas bihainim “gutpela tingting na save.”​—1 Samuel 25:3.

Sapos Man i No Mekim Wok Bilong Em

Namba wan laik na tingting bilong meri na em i daun long man bilong em, em long amamasim Jehova, na em inap mekim olsem sapos em i wok wantaim man na wanbel wantaim em long samting em i tingting pinis long mekim. Meri i no ken hatwok long mekim olsem sapos man bilong em i wanpela strongpela Kristen; sapos nogat, meri inap hatwok tru.

Sapos man i no strongpela Kristen, olsem wanem meri i ken karim hevi? Em i ken toktok gut wantaim em o kamapim sampela tingting long wanem samting bai helpim famili. Sapos meri i larim man i ‘stiaim sip,’ olsem larim em i go pas long mekim ol samting, bihain ating em bai mekim gut dispela wok. Tasol meri i toktok planti long olgeta taim, em i no stap daun tru long man bilong em. (Sindaun 21:19) Tasol sapos famili inap kisim hevi long wanpela samting man i pasim tok pinis long en, ating meri bai mekim olsem Sara i bin mekim bipo na tokaut olsem mobeta ol i mekim narapela samting.

Sapos man i no stap long tok i tru, hatwok bilong meri i bikpela moa. Tasol em i mas daun long man sapos man i no askim em long brukim ol lo bilong Baibel. Sapos em i askim meri long mekim olsem, meri Kristen i mas bihainim pasin bilong ol disaipel taim kot i askim ol long brukim lo bilong God, na ol i tok: “Mipela i mas bihainim tok bilong God tasol. Mipela i no ken bihainim tok bilong ol man.”​—Aposel 5:29.

Sampela man na meri marit i sot long save, olsem na maski ol i laik mekim ol samting i stret, ol i no bihainim wok tru bilong ol. Ating man i no tingim gut meri, na meri i strong long man i mas bihainim ol laik bilong em. Wanem samting bai helpim tupela? Bikpela samting, em man na meri i mas kisim stretpela tingting long em yet, long wanem, “planti taim yumi save . . . popaia.”​—Jems 3:2.

Planti man i amamas sapos long stretpela pasin meri yet i kirap na mekim wanpela samting em i bin skelim na tingting gut long en pastaim. Na pasin bilong tupela marit long wok gut wantaim bai strong moa sapos man na meri i tok sori long poroman taim em i popaia. Long olgeta de Jehova i save lusim ol pasin kranki bilong yumi, olsem na yumi mas lusim pasin kranki bilong ol narapela. “Sapos yu [Jehova] kaunim olgeta sin bilong mipela bai husat inap long winim kot bilong yu? Tasol yu save rausim ol sin bilong mipela.”​—Song 130:​3, 4.

Narapela i Daun Long Narapela

Olsem na bilong helpim yumi olgeta, Baibel i tok: “Yupela wan wan i mas i stap aninit long ol arapela.” Long pasin sori narapela i mas tingim gut narapela; no ken daunim poroman o resis long winim em. Baibel i tok moa: “Yupela meri, yupela i mas aninit long ol man bilong yupela, olsem yupela i save aninit long Bikpela. Long wanem, man em i het bilong meri bilong en, olsem Krais em i het bilong sios.”​—Efesus 5:​21-23.

Long Efesus 5:​21, 22 Pol i mekim wok long wanpela tok Grik i makim olsem meri yet i daun long man bilong em, man i no subim em long mekim olsem. Na meri i no tingim marit bilong em tasol na em i daun long man; em i tingting long Bikpela na em i mekim. Lain bilong Krais em God i makim long spirit holi, ol yet i amamas long daun long Krais. Taim meri i mekim olsem long man bilong em, marit bilong tupela bai strong na tupela bai amamas.

Na Baibel i tok: “Yupela [man] i mas laikim tru meri bilong yupela, olsem yupela i save laikim yupela yet.” Yes, man i mas laikim tumas meri bilong em. (Efesus 5:33; 1 Pita 3:7) Na man i mas tingim, em tu i mas daun long man i bosim em, long wanem, Baibel i tok: “Het bilong olgeta man em Krais.” Tru tumas, man i mas daun long ol tok bilong Krais. Na Krais tu i daun long man i bosim em: “Het bilong Krais em God.” Olsem na olgeta i gat man i bosim ol​—Jehova tasol i no gat bos. Tasol em i no save kalapim ol lo bilong em yet.​—1 Korin 11:3; Taitus 1:2; Hibru 6:18.

Taim meri Kristen i daun long man bilong em na man Kristen i daun long Krais, dispela i stret na i helpim tupela wantaim. Em i helpim ol long stap amamas tru na long pas gut wantaim, em tupela samting God tasol inap kamapim.​—Filipai 4:7.

[Piksa Kredit Lain long pes 26]

Leslie’s