Ol Yangpela i Laik Save . . .
Bilong Wanem Gutpela Pren i Go Long Nupela Ples?
‘YU LUK olsem gutpela pren bilong yu i lusim yu.’ Ol man bai tok olsem taim man i no amamas tumas o em i bel hevi. Tasol taim gutpela pren i lusim yu, nau dispela tok i bikpela samting.
Na tru tumas, pasin bilong pren gut wantaim em i narapela kain na em i wanpela gutpela samting tru. Baibel i tok: “Ol gutpela pren i save laikim yumi long olgeta taim. [“Na ol i olsem,” NW] brata i save sambai long helpim yumi long taim bilong hevi.” (Sindaun 17:17) Ol gutpela pren i stap olsem poroman bilong yumi na narapela i helpim narapela. Ol i save helpim yumi long kamap strong long bel na long spirit. Maski yumi gat planti poroman, ol pren yumi inap bilip tru long ol na ol i no ken kamapim ol samting bilong yumi long ol narapela, ol i wan wan tasol.
Olsem na sapos gutpela pren bilong yu i bin go long nupela ples, ating i gat as na bel bilong yu i bagarap stret. Yangpela Bryan i stori long tingting bilong em taim gutpela pren bilong em i bin go long nupela ples. Em i tok: “Mi pret, na mi pilim olsem mi wanpis, na mi bel hevi.” Olsem wanem? Yu gat wankain tingting?
No Ken Larim Bel i Giamanim Yu
Sapos yu tingim ol as na nau pren bilong yu i sindaun long nupela ples, ating dispela bai helpim yu. I no olsem em i no laik stap moa olsem pren bilong yu, nogat. Long nau, planti man i no save sindaun longtaim long wanpela hap. Long olgeta yia long Yunaitet Stets, winim 36 milion manmeri i save senisim ples sindaun bilong ol! Wanpela lain (U.S. Bureau of Census) i skelim olsem planti man bilong Amerika i save senisim ples sindaun bilong ol inap 12-pela taim.
Bilong wanem ol man i senisim senisim ples sindaun bilong ol? I gat kain kain as. Planti famili i senisim ples sindaun bilong ol na ol i ken kisim wanpela wok mani o haus i gutpela moa. Long ol kantri i stap rabis liklik, pait na pasin rabis i mekim na planti milion famili i mas lusim ples na i go sindaun long ol narapela ples. Na taim ol yangpela i go bikpela, planti bilong ol i laik lusim papamama na ol yet i ken sindaun long wanpela hap, o sampela i laik marit. (Stat 2:24) Na ating sampela bai go long narapela hap bilong ol i ken mekim sampela samting moa bilong spirit. (Matyu 19:29) Long lain Witnes Bilong Jehova, planti i lusim ples ol i save gut long en bilong ol i ken wok long ol narapela hap—ol narapela kantri tu—em ol hap i sot long ol wokman Kristen. Sampela i no lusim kantri bilong ol, tasol ol i lusim ples na ol i ken go na wok long Betel, em nem bilong ol ofis bilong lukautim wok bilong ol Witnes Bilong Jehova. Tru tumas, maski yumi laikim tru ol pren bilong yumi—yumi mas save—bihain ating ol bai kirap na go long nupela ples.
Maski i gat wanem as na pren bilong yu i go long nupela ples, ating yu bai tingting, yu inap daunim bel hevi bilong yu olsem wanem. Tru, long kain taim olsem em pasin bilong yumi long pilim olsem yumi stap wanpis, na yumi bel hevi, tasol ating yu save, i no gutpela long i stap tasol long haus na bel hevi—dispela i no ken helpim yu. (Sindaun 18:1) Olsem na yumi ken tingim sampela samting em inap helpim yu.
Yupela i Ken Stap Pren Yet
Yangpela Bryan i tok: “Yu mas save, pasin pren bilong yu i no pinis.” Tru, taim gutpela pren bilong yu i go long nupela ples pasin pren bilong yupela bai senis, tasol i no olsem pasin pren bilong yupela i mas pinis. Dokta Rosemarie White, em i wanpela dokta bilong givim gutpela tingting long ol yangpela, em i tok: “Maski yumi gat hamas krismas, taim yumi lusim wanpela gutpela pren yumi bel hevi, tasol rot bilong karim dispela hevi, em long tingim dispela samting i olsem senis tasol, i no olsem dua i pas pinis.”
Yu ken mekim wanem na yupela inap stap pren yet? Tingim stori bilong Devit na Jonatan long Baibel. Jonatan i gat bikpela krismas winim Devit, tasol tupela i pas gut wantaim. Taim hevi i kamap na Devit i mas ranawe, tupela i bin bung wantaim na toktok. Tupela i kamapim klia olsem ol i pren tru na ol i bin mekim strongpela tok promis long narapela bai laikim narapela oltaim.—1 Samuel 20:42.
Yu ken mekim wankain samting taim pren i no lusim yu yet. Yupela i ken toktok wantaim. Tokim em olsem yu amamas long stap pren bilong em na yu gat bikpela laik long stap yet olsem pren bilong em. Patty na Melina i bin mekim olsem. Tupela i pren gut wantaim, tasol nau narapela i stap longwe long narapela inap 8,000 kilomita. Patty i tok: “Mipela i stretim rot bambai mipela i ken stap pren yet.” Tasol sapos yupela i no pasim gut tok wantaim, ol samting yu laik mekim em inap popaia.—Skelim wantaim Amos 3:3.
Baibel i tok, taim aposel Jon i no inap lukim pren bilong em Gaius, em i bin raitim ‘pas.’ (3 Jon 13) Ating yutupela bai pasim tok long salim pas o kat, olsem long olgeta wik o mun samting. Na sapos papamama i orait long yu telefon long wanpela longwe hap maski i gat bikpela pe, orait ating sampela taim narapela i ken telefon long narapela, na yupela i ken stori gut long ol samting yupela i save mekim. O ating yupela i ken pasim tok long toktok long kaset o video samting. Na bihain, ating yupela inap stretim rot na long Sarere Sande, narapela inap go lukim narapela o yupela i ken kisim malolo wantaim. Em nau, pasin pren bilong yupela bai stap strong yet.
Painim Ol Narapela Pren
Tasol taim gutpela pren i lusim yu, ating yu bai pilim olsem nau yu stap nating. Olsem na ating yu gat bikpela hap taim moa long mekim ol samting. Orait, yu no ken larim dispela taim i lus nating. (Efesus 5:16) Mekim gutpela wok long dispela hap taim. Olsem: Ating yu ken lain long paitim gita samting, o lain long wanpela nupela tok ples, o mekim wanpela liklik wok amamas samting. Na narapela samting yu ken mekim na taim bilong yu i no ken lus nating, em long mekim sampela samting long helpim ol narapela, olsem go long stua samting. Sapos yu wanpela Witnes Bilong Jehova, yu ken mekim bikpela wok moa long autim tok. (Matyu 24:14) O yu ken kirap na stadi gut long wanpela samting bilong Baibel.
Na aposel Pol i givim tok long ol Kristen i sindaun long Korin, olsem ol i mas “givim bel bilong [ol] olgeta” long ol brata Kristen na no ken pasim bel bilong ol—ol i mas wok long kamap pren bilong ol narapela. (2 Korin 6:13) Ating yu bin stap planti taim wantaim wanpela pren tasol, olsem na yu no tingim ol narapela, em ol tu inap kamap pren bilong yu. Ol yangpela long lain Witnes Bilong Jehova, ol i save ol inap painim planti gutpela pren long kongrigesen bilong ol yet. Olsem na i gutpela long go hariap long ol miting na stap longtaim liklik bihain long ol miting i pinis. Dispela bai givim bikpela hap taim moa long yu bilong save gut long ol brata sista. Ol kibung Kristen na ol liklik bung amamas samting, ol tu i opim rot bilong yu ken painim sampela nupela pren.
Tasol was gut. Nogut yu hariap hariap long painim ol nupela pren na yu pas tru wantaim ol yangpela i no wanbel long tingting na pasin bilong yu long ol samting bilong spirit. Ol dispela kain yangpela i no ken helpim yu, bai ol i bagarapim yu. (Sindaun 13:20; 1 Korin 15:33) Pas gut wantaim ol yangpela i save tingim ol samting bilong spirit na ol i gat nem long bihainim gutpela pasin.
Taim yu painim kain gutpela pren olsem, stretim rot long mekim sampela samting wantaim. Olsem: Kaikai wantaim. Go lukim wanpela haus tumbuna. Wokabaut ausait. Pasim tok long wok wantaim long wok autim tok, na go long haus bilong ol man na tokim ol long gutnius bilong Kingdom bilong God. Sapos yu lusim bikpela hap taim na wok strong, nupela pasin pren bilong yu wantaim narapela bai kamap strong moa. Pasin sori bilong ol Kristen i save go bikpela, olsem na taim yu kisim ol nupela pren i no olsem yu no stap gut moa long pren i bin go long nupela ples, nogat; yu wok long ‘givim bel bilong yu olgeta’ long ol narapela tu.
Na tu, yu gat rot long pas gut moa long ol man i laikim yu tru—em papamama bilong yu. Ating pastaim yu hatwok long go klostu long papamama, tasol ol i ken helpim yu tru. Yangpela Josh i tok: “Bipo mi mas subim mi yet long lusim hap taim wantaim ol, long wanem, bipo mi no pas gut wantaim papa o mama. Tasol nau ol i pren tru bilong mi!”
Na tingim, yu gat wanpela pren long heven. Olsem Dan i gat 13 krismas i tok: “Yumi no stap wanpis, long wanem, Jehova i stap.” Olgeta taim yumi inap toktok wantaim Papa bilong yumi long heven long rot bilong beten. Em bai helpim yu long karim hevi bilong yu sapos yu bilip long em.—Song 55:22.
Yu Mas Ting Olsem Gutpela Samting Inap Kamap
Saveman King Solomon i givim dispela toksave: “Yu no ken tok, ‘Olsem wanem na taim bipo i winim dispela taim nau?’ ” (Saveman 7:10) Olsem na nogut yu tingting tasol long ol samting i bin kamap bipo; tingim ol gutpela samting yu inap mekim long nau. Bill, nau em i gat 22 krismas samting, em i bin mekim olsem taim gutpela pren i lusim em. Em i tok: “Bihain liklik mi kirap na painim ol nupela pren na mi no tingting tumas long sindaun bilong mi long bipo. Mi bin wok long tingim ol samting bilong bihain na long tingim ol samting bilong nau.”
Ating sampela tok mipela i kamapim inap helpim yu, tasol taim wanpela gutpela pren i go long nupela ples, yu inap bel hevi yet. Ating bikpela hap taim i mas lus pastaim na yu no ken bel hevi moa long ol gutpela amamas yu bin kisim long bipo wantaim pren bilong yu. Yu mas save, sampela taim senis i save kamap long i stap bilong yumi, na taim senis i kamap, dua i op bilong helpim yu long kamap olsem man i bikpela pinis. Tru, yu inap ting bai i hatwok long painim wanpela pren olsem senis bilong wanpela gutpela pren tru, tasol yu inap wok long kamapim ol gutpela pasin na bai “Bikpela wantaim ol man” i ken laikim yu. (1 Samuel 2:26) Taim yu mekim olsem, olgeta taim bai yu gat wanpela yu inap kolim em pren bilong yu!
[Piksa long pes 13]
Em bikpela hevi taim yu mas tok gutbai long gutpela pren bilong yu