Planti i Dai Long Pot Ata—Bilong Wanem Dispela Samting i Kamap?
WANPELA MAN LONG OSTRELIA I RAITIM DISPELA STORI BILONG KIRAP!
EM SANDE long belo bek, Epril 28, 1996. No gat win o ren; em gutpela taim long Port Arthur Historical Site, em wanpela hap long Tasmenia, Ostrelia, planti turis i save go long en. Insait long wanpela haus kaikai (Broad Arrow Café) planti man i sindaun na kaikai. Wanpela yangpela man i gat 28 krismas i sindaun long veranda bilong haus kaikai na kaikai. Long 1:30 long belo bek, em i kaikai pinis na nau em i kam insait long haus kaikai. Em i holim gan na i sut nabaut long ol man.
Skin bilong ol man i dai i slek i go daun long sia—kaikai i stap yet long maus bilong ol. Polis i tok “i olsem pait i bin kamap long wanpela ples pait.” Taim dispela man i ting em i bin kilim i dai olgeta—em i bin kilim i dai 20 man—em i wokabaut isi tasol i go ausait. Insait long sampela sekon em i bin kilim i dai planti man, winim olgeta man i bin i dai long Tasmenia long han bilong ol kilman insait long 4-pela yia paslain long dispela taim!
Tasol dispela man i wok yet long kilim i dai ol man. Olsem: Taim em i wokabaut i go long get bilong lusim dispela hap, em i lukim Nanett Mikac wantaim ol liklik pikinini meri bilong em. Em i kilim i dai Nanett na pikinini bilong em i gat 3-pela krismas. Narapela pikinini bilong Nanett i gat 6-pela krismas, em i bin ranawe na hait baksait long wanpela diwai, tasol dispela man i raunim em na sutim em i dai.
Bihain, klostu long get bilong baim tiket long kam insait long dispela hap bilong Pot Ata, em i kilim i dai 3-pela man insait long wanpela ka BMW na kisim dispela ka. Em i no go longwe tumas na nau em i bungim wanpela man na meri insait long narapela ka. Em i opim baksait bilong dispela ka BMW na pasim man insait long en, na em i kilim i dai meri. Bihain em i draiv i go liklik na em i kamap long wanpela haus pasindia (Seascape Cottage). Em i kamap long 2 klok samting. Long dispela ples em i kukim ka BMW na holim kalabus man em i bin pasim insait long baksait bilong ka, na tupela lapun marit i papa bilong haus pasindia. Kirap long taim em i bin lusim haus kaikai em i bin kilim i dai 12-pela man, olsem na nau 32 man i dai pinis. Planti man moa i bin kisim bagarap.
Autim Tok Long Sande Long Belo Bek
Long dispela taim, Jenny Ziegler na famili bilong em, em ol i Witnes Bilong Jehova long Kongrigesen Pot Ata, ol i bung long 1:30 long belo bek bilong i go autim tok. Bihain ol i draiv i go long dispela hap long Pot Ata em bikpela bagarap i bin kamap long en. Jenny i laik i go lukim David Martin, em gutpela papa bilong dispela haus pasindia (Seascape Cottage). Bipo, Jenny na narapela sista Kristen, ol i bin toktok gut wantaim em long Baibel.
Bihain liklik long 2 klok, Jenny, man bilong em, na ol pikinini, ol i wokabaut i go long haus pasindia. Insait long banis bilong en, ol i lukim smok i kamap long wanpela ka i paia. Polis i pasim ol na tokim ol long go bek long wankain rot ol i bin kam long en. Jenny i tok: “Mipela i pilim olsem bikpela hevi i bin kamap, na i no gat man i wokabaut long ol rot.”
Tasol ol i no save yet olsem bikpela hevi tru i bin kamap, olsem na famili i lusim bikrot na draiv i go long wanpela liklik nambis bilong mekim yet wok autim tok bilong ol. Long dispela hap ol samting i makim olsem i no gat hevi—ol pikinini i waswas, sampela man i wokabaut long longwe hap bilong nambis, na tupela lapun marit i sindaun long ka na kaunim buk. Jenny i tok: “Man bilong mi i go long tupela lapun na ol i toktok gut wantaim. Em i tokim tupela i olsem hevi i bin kamap long bikrot, na taim ol i lusim nambis i gutpela sapos ol i bihainim narapela rot. Mi bin toktok liklik wantaim wanpela yangpela man, na bihain mipela lusim dispela hap.”
Nau famili Ziegler i draiv i go long dispela hap bilong Pot Ata em bikpela bagarap i bin kamap long en. Jenny i tok: “Long get bilong dispela hap sampela ka i pasim rot. Bihain mipela kisim save olsem ol ka i bin haitim skin bilong ol man i dai pinis. Wanpela man i tokim mipela olsem: ‘Wanpela man i holim gan na i sut nabaut olsem em i longlong pinis; ating 15 man i dai pinis!’ Em i tokim mipela long lusim ples hariap.”
Samting Nogut Tru i Kamap
Hevi i no pinis yet olsem Jenny i tok: “Mipela pret nogut tru taim mipela draiv i go bek long haus, long wanem, mipela i no save dispela kilman i stap we. Olsem na olgeta taim mipela i bungim wanpela ka long rot, mipela i tingting planti—dispela man nogut i stap long dispela ka o nogat. Maski mipela i kamap gut long haus, mipela i pilim olsem hevi inap painim mipela, long wanem, haus bilong mipela i stap insait tru long bus, na man i gat save long dispela hap, em inap hait gut. Ol brata sista Kristen bilong mipela i save mipela i bin i go we, olsem na ol i telefon, nogut bagarap i bin painim mipela.
“Taim mipela i tingim samting i bin kamap, mipela i save, sapos mipela i bin kamap sampela minit paslain bilong lukim papa bilong haus pasindia, ating mipela tu i bagarap. Taim mipela i tingim dispela samting skin bilong mipela i guria, long wanem, nogut kilman i bin makim mipela tu long gan taim mipela i bin toktok wantaim polis klostu long haus pasindia!”
Winim 200 polis i banisim haus pasindia long Sande long nait. Ol i no stap ples klia, long wanem, wan wan taim man i sut long gan. Man i singaut long polis i mas givim helikopta bilong helpim em long ranawe, tasol long dispela nait yet, ol i no inap pasim tok long wanpela samting. Long 8 klok samting long Mande, polis i lukim smok i kamap long haus pasindia—haus i paia. Kilman i no dai—skin tasol i bagarap. Bihain polis i painim skin bilong tripela man em i bin holim ol insait long haus pasindia—wanpela bilong ol, em papa bilong haus em famili Ziegler i laik go lukim. Haus i paia na ol i dai, olsem na namba bilong ol man i dai pinis i go antap long 35.
Bilong Wanem Hevi i Kamap?
Long Mas 13, sevenpela wik paslain long dispela hevi long Pot Ata, wanpela kilman long Danblen, Skotlan, em i bin go insait long wanpela skul na sutim long gan 16 liklik pikinini na tisa bilong ol. Olsem wanpela toksave bilong televisen i tok: ‘Sapos blut i kapsait, nius bai stori long en,’ na tru tumas, ol nius long olgeta hap i kamapim stori long dispela bagarap. Sampela saveman i ting, dispela kilman bilong Ostrelia i laik kilim i dai planti man moa, winim namba bilong ol pikinini i bin i dai long Danblen. Long Yunaitet Stets, wanpela kilman em ol i givim nem Sodiak long em, inap sampela yia em i bin pretim nogut tru ol man long Nu Yok Siti. Em i bin tok, em i traim long kilim i dai planti man moa, winim ol narapela kilman em i bin kaunim stori long ol.
Na planti man i tok, narapela samting i mekim na dispela hevi long kilim i dai man i go bikpela moa, em ol piksa wokabaut na video nogut long ol samting bilong maritpasin na pait. Wanpela nius bilong Ostrelia (Herald Sun) i tok: “Polis i kisim 2,000 video nogut long haus bilong Martin Bryant, em man bilong kilim i dai planti man long Pot Ata; em ol video bilong pait na pasin sem. . . . Ol i painim ol video taim ol i kirap tingim wok bilong ol piksa wokabaut nogut long kamapim dispela bikpela bagarap long Pot Ata.” Na wanpela nius bilong Nu Yok (Daily News) i tok: Long bet bilong kilman Sodiak, ol i bin painim “tupela katon em ol video nogut bilong pasin sem i pulap long en.”
Taim ol man i kisim save long bikpela bagarap i bin kamap long Pot Ata, wantu tasol sampela televisen-stesin i bin senisim ol program bilong ol. Bihain, wanpela niusmeri, em Penelope Layland, em i raitim wanpela stori i gat het-tok olsem: “Televisen i Gat Tupela Maus Long Pait na Krai Sori.” Em i tok: ‘Ating yumi ken tok, taim ol i no kamapim ol dispela program long pait na bagarapim man, i olsem ol i sori long hevi i bin kamap. Tasol tumora, o wik antap, o long narapela mun, televisen bai kamapim gen ol program nogut.’
Tasol bilong save gut long as na pasin bilong pait na bagarapim man i kamap bikpela moa long nau, yumi mas lukim Baibel. Bipo bipo Baibel i tok profet olsem, “long taim bilong las de planti hevi nogut tru bai i kamap. Ol man bai i no bosim . . . laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin.” (2 Timoti 3:1-5) Olsem na pasin bilong pait na bagarapim man i go bikpela moa long nau i kamapim klia olsem yumi stap long taim bilong las de, na pinis bilong dispela pasin nogut i klostu.—Matyu 24:3-14.
Olsem planti man i ting, ol spirit nogut i insait long ol dispela pasin nogut tru. (Efesus 6:12) Baibel i stori olsem Satan na ol ensel nogut bilong em ol i raus long heven, na bihain Baibel i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (KTH 12:7-9, 12) Yumi stap pinis long dispela taim bilong bikpela hevi, na Satan na ol ensel nogut bilong em, ol i mekim wok long kain kain samting bilong kirapim ol man long mekim moa yet pasin bilong pait na bagarapim man.
Tasol Satan na ol ensel nogut bilong em, na ol manmeri nogut bilong dispela graun ol i bosim, klostu nau bai ol i pinis, na Kingdom bilong God bai bosim graun na kamapim nupela taim i gat stretpela pasin tasol i stap long en. (Daniel 2:44; Matyu 6:9, 10; 2 Pita 3:13; 1 Jon 2:17; KTH 21:3, 4) Jenny i tok: “Long nau, ‘mipela i krai wantaim ol man i krai,’ tasol mipela i gat bikpela laik long autim tok bilong Kingdom long ol man bilong ples em ol i bin kirap nogut tru long dispela samting nogut i bin kamap.”—Rom 12:15.
[Piksa long pes 15]
Em “Broad Arrow Café,” ples dispela kilman i kirap long en na sutim planti man
[Mep Kredit Lain long pes 14]
Mountain High Maps® Copyright © 1995 Digital Wisdom, Inc.