Rot Bilong Famili i Ken Stap Amamas

Skulim Ol Pikinini Long Mekim Gut Wok Bilong Ol

George:a “Long olgeta apinun, wankain samting i save kamap. Michael, pikinini man bilong mi i gat 4-pela krismas, em i save larim ol toi bilong em i stap nabaut long haus. Paslain long mi slipim em long bet, mi save kirapim em long putim ol toi i go bek long ples bilong en. Tasol Michael i save krai na singaut bikmaus. Sampela taim mi bikmaus long em, tasol dispela i mekim mitupela wantaim i pilim nogut. Mi laik bai taim bilong slip i ken stap olsem gutpela taim bilong Michael. Olsem na mi givap na mi yet mi stretim ol samting.”

Emily: “Wanpela taim, Jenny, pikinini meri bilong mi i gat 13 krismas, i hatwok long save long wanpela skul asainmen tisa i laik em i mekim. Taim Jenny i kamap long haus bihain long skul, em i krai inap wan aua olgeta. Mi kirapim em long go askim tisa long helpim em, tasol Jenny i tok tisa i save mekim hatpela pasin long em, olsem na em i pret long askim em. Mi laik sut i go stret long ofis na tokim tisa long tingting bilong mi. I no gat wanpela man i gat rait long bagarapim bel bilong pikinini bilong mi!”

OLSEM WANEM? Sampela taim yu tu i pilim wankain olsem George na Emily? Olsem dispela papa na mama, planti papamama i no laik lukim pikinini bilong ol i bel hevi o i hatwok long stretim wanpela hevi. Ol i laik helpim pikinini. Tasol long dispela tupela samting i bin kamap, rot i bin op long dispela papa na mama i ken skulim pikinini bilong ol long pasin bilong stretim hevi bilong em yet. Tru, samting pikinini i gat 4-pela krismas na pikinini i gat 13 krismas i lainim i no wankain.

Yu mas save olsem, bai yu no stap olgeta taim bilong banisim pikinini long ol hevi. Bihain, ol pikinini bai lusim papa na mama na i mas “karim hevi bilong pasin ol yet i mekim.” (Galesia 6:5; Stat 2:​24) Bilong helpim ol pikinini long lukautim ol yet, papamama i mas lainim ol long kisim pasin bilong mekim gut wok bilong ol yet, na tingim gut ol narapela na i no tingim ol yet tasol. Dispela samting i no isi long mekim!

Tasol gutpela tru, pasin em Jisas i mekim bilong skulim ol disaipel bilong em, dispela i stap gutpela piksa ol papamama i ken bihainim. Tru, Jisas i no gat ol pikinini bilong em yet, tasol taim em i makim husat bai kamap disaipel bilong em na em i skulim ol, em i laik inapim ol long mekim dispela wok em i bin givim ol long mekim, na mekim tu bihain long em i dai. (Matyu 28:​19, 20) Samting Jisas i mekim i kain olsem samting olgeta papamama i laik mekim, ol i laik bai ol pikinini bilong ol i mas i gat pasin bilong mekim gut wok bilong ol yet. Tingim 3-pela samting Jisas i mekim na i olsem piksa ol papamama i ken bihainim.

“Soim Pasin” Long Pikinini Bilong Yu Klostu long pinis bilong laip bilong Jisas, em i tokim ol disaipel: “Mi soim pasin long yupela, na yupela tu i mas mekim wankain pasin olsem nau mi mekim long yupela.” (Jon 13:15) Na olsem tasol, ol papamama i mas tokim ol pikinini na soim ol tu long pasin bilong mekim gut wok bilong ol.

Askim yu yet: ‘Mi save amamas taim mi stori long ol wok em mi yet i save lukautim? Mi stori long ol amamas mi save kisim long mekim wok bilong helpim ol arapela? O planti taim mi save komplein na skelim mi yet wantaim ol narapela em sindaun bilong ol i luk olsem i no gat hatwok long en?’

Tru, i no gat wanpela man i gutpela olgeta. Sampela taim, yumi olgeta i pilim olsem yumi gat bikpela hevi bilong karim. Tasol pasin yu yet i bihainim em i nambawan bikpela samting tru bilong helpim ol pikinini long save olsem, pasin bilong mekim gut wok bilong ol, dispela em i bikpela samting tru na inap helpim tru ol.

TRAIM MEKIM OLSEM: Sampela taim, sapos yu inap, kisim pikinini bilong yu i go long ples wok na soim em ol samting yu save mekim bilong lukautim famili long sait bilong mani. Kisim pikinini bilong yu i go wantaim yu taim yu helpim wanpela husat i nidim helpim. Bihain, stori wantaim em long bikpela amamas yu kisim long mekim gut dispela wok.​​—Aposel 20:35.

Holim Stretpela Tingting Long Ol Samting Pikinini Inap Mekim Jisas i luksave olsem sampela haptaim i mas lus pastaim na bai ol disaipel inap mekim ol wok em i laik bai ol i mas mekim. Wanpela taim em i tokim ol: “Mi gat planti tok moa mi laik givim yupela, tasol yupela i no inap kisim nau.” (Jon 16:12) Pastaim Jisas i no tokim ol disaipel long mekim sampela wok long taim em i no stap wantaim ol, nogat. Em i lusim bikpela hap taim long lainim ol long planti samting. Taim em i ting ol i redi, long dispela taim tasol Jisas i salim ol i go na em i no go wantaim ol.

Na olsem tasol, i no stret long papamama i askim ol pikinini long mekim ol samting ol man i bikpela pinis i save mekim, taim ol i no redi yet long mekim. Tasol maski i olsem, taim ol pikinini i wok long kamap bikpela, papamama i mas makim ol wok i stret long ol pikinini i ken mekim. Olsem: Papamama i mas skulim ol pikinini long ol yet i mas lukautim gut skin bilong ol long sait bilong i stap klin, klinim rum bilong ol, na bihainim stret taim, na lukautim gut mani bilong ol. Taim pikinini i stat long go long skul, papamama i mas helpim pikinini long save olsem homwok em wanpela bikpela samting em pikinini i gat wok long mekim.

Papamama i no ken givim wok long pikinini na em tasol, nogat. Ol i mas helpim pikinini long mekim gut dispela wok. George, em dispela papa yumi stori pinis long en, i luksave olsem as na Michael i no amamas long putim ol toi i go bek long ples bilong en, em dispela wok i luk olsem bikpela samting tumas. George i tok: “Mi lusim pasin bilong singaut bikmaus long Michael i mas putim gut ol toi. Mi wok long lainim em long wanpela rot bilong mekim dispela wok.”

Em i mekim olsem wanem? George i tok: “Pastaim mi makim wanpela taim stret long olgeta nait bilong putim gut ol toi. Orait nau mi wok wantaim Michael na stretim wanpela hap bilong rum pastaim, na bihain narapela hap. Mi mekim olsem wanpela pilai em i ken amamas long mekim, olsem wanpela resis long husat inap wok hariap moa. I no longtaim, na mipela i mekim olsem long olgeta nait, paslain long em i laik slip. Mi tok promis long Michael olsem sapos em i hariap long mekim, bai mi ritim wanpela stori moa long em. Tasol sapos em i wok isi isi tumas, bai mi sotim taim bilong ritim stori long em.”

TRAIM MEKIM OLSEM: Skelim ol samting em olgeta wan wan pikinini bilong yu inap mekim bilong helpim sindaun bilong famili. Askim yu yet, ‘I gat sampela samting mi wok yet long mekim bilong helpim ol pikinini bilong mi, em ol samting ol yet inap long mekim?’ Sapos olsem, wok wantaim ol pikinini bilong yu i go inap long taim yu luksave olsem ol yet inap mekim dispela wok. Tokim ol klia olsem pasin ol i mekim long lukautim wok bilong ol, dispela inap mekim sampela samting long ol​—sapos ol i lukautim gut wok bilong ol, orait yu bai praisim ol, tasol sapos nogat, i gat pe nogut bilong en. Orait nau truim tok bilong yu.

Kolim Stret Ol Samting Yu Laik Bai Ol i Mas Mekim Jisas em i gutpela tisa na em i save olsem, nambawan gutpela rot long lain em long pasin bilong mekim ol samting. Olsem: Taim Jisas i ting nau em taim stret, orait em i salim ol disaipel bilong em “i go tupela tupela, na ol i go paslain long em. Em i salim ol i go long olgeta taun na ples em yet i laik i go long en.” (Luk 10:1) Tasol em i no larim ol i mekim ol samting long laik bilong ol yet, nogat. Paslain long em i salim ol i go, em i kolim stret ol samting em i laik bai ol i mas mekim. (Luk 10:​2-​12) Taim ol disaipel i kam bek na tokim Jisas long ol gutpela samting i bin kamap, Jisas i mekim gutpela tok amamas long ol na strongim bel bilong ol. (Luk 10:​17-​24) Tok bilong em i makim olsem em i bilip tru long ol inap mekim dispela wok, na tu, em i amamas long ol.

Taim pikinini bilong yu i gat wanpela hatwok em i mas mekim, yu save mekim wanem? Yu laik banisim pikinini bilong yu long ol samting em i pret long en na bai em i no ken bel hevi sapos em i no mekim gut dispela wok? Ating namba wan samting yu laik mekim em long helpim pikinini bilong yu, o yu yet i laik mekim dispela wok bilong em.

Tasol tingim: Olgeta taim yu hariap na banisim pikinini bilong yu, dispela i givim wanem tingting long em? Yu kamapim olsem yu bilip long em na long ol save na strong bilong em long mekim wok? O yu kamapim olsem yu tingim em olsem wanpela bebi yet, em yu mas helpim em long olgeta samting?

Olsem: Emily, em pastaim yumi stori long em, em i mekim wanem taim pikinini meri bilong em i gat hevi? Em i no go na stretim dispela hevi, nogat, em i larim Jenny yet i go toktok wantaim tisa. Emily tupela Jenny i raitim lista bilong ol askim em Jenny i ken givim long tisa. Orait nau tupela i stori long wanem taim i gutpela long Jenny i go toktok wantaim tisa. Ol i prektis long ol tok Jenny bai mekim. Emily i tok: “Jenny i kisim strong long go lukim tisa. Tisa i tok amamas long Jenny i kam lukim em. Jenny i amamas long em yet​—na mi tu mi amamas long em.”

TRAIM MEKIM OLSEM: Raitim long pepa wanpela hevi em pikinini i bungim. Klostu long dispela hevi, raitim samting yu inap mekim bilong helpim pikinini yet long stretim dispela hevi. Prektis wantaim pikinini long ol wan wan samting em i ken mekim bilong winim dispela hevi. Tokim pikinini olsem yu bilip em inap mekim.

Sapos olgeta taim yu banisim pikinini bilong yu long ol hevi, dispela inap pasim em long kisim pasin bilong karim hevi. Olsem na mobeta yu strongim pikinini long rot bilong helpim em long mekim ol wok bilong em yet. Taim em i mekim olsem, em wanpela gutpela presen tru yu inap givim long em.

[Futnot]

ASKIM YU YET . . .

▪ Mi holim stretpela tingting long ol samting ol pikinini bilong mi inap mekim?

▪ Mi tokim ol na soim ol tu long samting ol i mas mekim na bai wok bilong ol i ken kamap gut?

▪ Wanem laspela taim mi strongim pikinini o mekim sampela tok amamas long em?