Pinat Bata—Long Pasin Bilong Ol Afrika

WANPELA MAN LONG RIPABLIK SENTRAL AFRIKA I RAITIM DISPELA STORI BILONG KIRAP!

LONG ol kantri long hap bilong Wes, ol i ting pinat bata em samting bilong putim tasol long bret. Tasol long sampela kantri long Afrika, pinat bata em i bikpela samting moa long i stap bilong ol man. Em bikpela samting olsem wanem?

Long sentral Afrika, ol i save putim pinat bata long kain kain kaikai em planti man i save laikim. Long dispela hap, olsem long ol narapela hap i stap rabis liklik, ol i hatwok long kisim plaua bilong putim long sup samting bambai sup i ken kamap strong liklik. Olsem na planti ol i save mekim wok long pinat bata olsem senis bilong plaua.

Tasol ol i no inap baim wanpela botol pinat bata long stua. Long stua ol man inap baim pinat bata long mak bilong liklik spun, na pe bilong en i antap. Olsem na planti meri Afrika, ol i laik wokim pinat bata bilong ol yet. Wok bilong mekim pinat bata i bikpela na i narapela kain. Save mipela i kamapim nau, mipela i kisim taim mipela i toktok wantaim sampela meri Afrika.

Planim na Kamapim Pinat

I no hatwok long lukautim gaden pinat. Wok bilong redim graun bambai ol i ken planim pinat, em bikpela wok. Ol i save mekim dispela wok long kirap bilong taim bilong ren, taim graun i drai na i strong yet. Long Epril ol i planim pikinini kaikai long han, na sapos ren i kam hariap, ol pinat bai redi bilong ol man i ken kisim long pinis bilong Ogas o long kirap bilong Septemba.

Pinat i no bilong famili galip samting, nogat, pinat em wanpela kain bin. Ol pinat i no save kamap long ol bikpela diwai olsem yu inap ting, nogat. Ol i save kamap long ol liklik rop, na pasin bilong en long kamapim kaikai i narapela kain; ol pinat i save kamap insait long graun. Olsem na planti man i save kolim pinat olsem graun pinat.

Long sentral Afrika, longpela bilong planti gaden pinat em 90 mita samting na braitpela bilong en i olsem 50 mita. Sampela man i bin planim pinat long liklik hap graun klostu long haus bilong ol. Bilong mekim wok gaden, planti ol i save mekim wok long busnaip na long baira i gat sotpela han. Dispela wok inap mekim na baksait bai pen! Pastaim i gat planti wok bilong lukautim gaden pinat. Man i mas was long gaden bambai ol rat samting i no ken digim graun na kisim ol pikinini bilong pinat na kaikai. Na i gat wok bilong brukbrukim graun bambai graun i no ken kamap strong, na wok bilong rausim gras nogut.

Em bikpela samting long was long gaden pinat long taim bilong kisim kaikai. Taim dispela taim i kam klostu, ol inap makim ol pikinini long was long gaden. Wanpela meri i tok, meri i sindaun klostu long em, em i lukim ol pinat bilong em i stap antap tru long ol diwai i stap klostu. Ol monki i bin kisim ol pinat i go antap long ol diwai na ol i amamas long kaikai pinat bilong em!

Planti taim wok bilong bungim pinat em samting bilong famili olgeta. Olgeta i go long gaden bilong helpim dispela wok. Ol i kamautim ol liklik rop pinat long han na larim ol i go drai, na bihain ol i rausim ol pinat na putim long ol bikpela dis em ol i save karim antap long het bilong ol, na karim i go long ples.

Bihain ol i mekim wanem long ol pinat? Taim ol i wasim ol pinat pinis, ol i boilim ol pinat long wara i gat sol. Famili bai kaikai sampela, tasol planti pinat i bilong tanim wantaim kaikai long bihain. Ol i putim ol pinat long graun klostu long haus na larim ol i go drai olgeta. Tasol i mas i gat man i was long ol pinat bambai ol meme i save raun ol i no ken kaikai.

Taim ol pinat i drai pinis, ol i putim ol pinat insait long wanpela liklik haus ol i bin wokim long ol mat kunai na graun malumalum, na i sanap antap long ol pos. Dispela i mekim na ol pinat i no save sting, na ol rat samting, na ol pikinini em ol i wok long painim samting bilong kaikai taim mama i wok yet long gaden, ol i no ken kaikai.

Pinat i Kamap Pinat Bata

Pastaim ol i mas brukim strongpela skin bilong ol pinat bilong kisim ol pinat. Bihain ol i kukim ol pinat long bikpela praipan i stap long paia bilong wokim pinat bata long en. Dispela i mekim na ol pinat i swit na i no hatwok long rausim skin bilong ol. Ol i larim ol pinat i go kol, na bihain ol i rapim bilong rausim skin bilong ol. Bihain ol i mekim wok long masin bilong brukbrukim ol pinat na ol i kamap olsem bata. Sapos ol i no gat masin, mama bilong haus bai putim ol pinat antap long bikpela ston i olsem tebol, na brukbrukim ol long botol o long raunpela ston.

I no longtaim na ol bai putim pinat bata long sup bilong mekim sup i kamap strong liklik. Planti ol i save tanim pinat bata wantaim kaikai ol i save kukim long wanpela sospen, na ol i kaikai wantaim tapiok, banana, o rais. Sapos yu laik save kaikai i gat pinat bata long en i swit olsem wanem, tanim pinat bata wantaim kaikai yu kukim na traim!

Yu ken wokim sup i gat abus, anian, galik, na tomato long en. Larim sup i boil i go inap long abus i tan, na sapos yu laik yu ken tanim kumu yu katim pinis wantaim sup. Taim sup i boil i stap, putim liklik wara long pinat bata bambai em i kamap malumalum liklik na tanim wantaim sup. Sapos yu mekim sup long wanpela kilo abus, orait putim wanpela kap pinat bata long en. Larim sup i boil strong inap 10-pela minit samting bambai swit bilong pinat bata i no strong tumas. Sapos sup i no strong olsem yu save laikim, putim sampela pinat bata moa long en. Putim liklik sol. Sapos yu laik kaikai i gat kik, orait putim sampela lombo long en.

Planti man i ting kain kaikai olsem i swit tru wantaim rais! Tru, ating kaikai yu kukim i no wankain stret olsem ol i save wokim long Afrika, tasol bai yu kisim save long samting ol man inap mekim long pinat bata​—⁠long pasin bilong ol Afrika!

[Ol Piksa long pes 22]

Ol i kisim ol pinat long gaden, na bihain ol i karim i go long haus na rausim skin bilong ol na brukbrukim