Pikinini Tagua—Em Inap Helpim Ol Elefan?

WANPELA MAN LONG EKWADO I RAITIM DISPELA STORI BILONG KIRAP!

PLANTI man bai i no ting tupela i olsem pren. Hevi bilong skin bilong narapela i sampela gram tasol, na bilong narapela em planti tausen kilo. Wanpela em i pikinini bilong diwai, na narapela em i wanpela animal. Narapela i stap longwe long narapela. Tasol liklik pikinini tagua inap helpim ol elefan bilong Afrika na ol man i no ken kilim nabaut ol elefan. Pikinini tagua em i wanem samting, na olsem wanem em i bin kamap pren bilong elefan?

Narapela Kain Diwai Pam

Pikinini tagua em pikinini bilong wanpela kain diwai pam i save kamap long noten Saut Amerika. Dispela diwai i go bikpela isi isi, na gutpela lip bilong en i save kamap klostu long graun. As bilong diwai i no kamap long ples klia long planti yia. Wanpela diwai tagua em longpela bilong en i olsem tupela mita, em i bin stap inap 35 i go inap 40 yia pinis. Ol bikpela rop i gat prut long en i save kamap aninit long lip bilong en. Hevi bilong wanpela rop prut i olsem 10-pela kilo, na ol prut i pas pas. Insait long olgeta wan wan prut i gat 4-pela i go inap 9-pela pikinini, na bikpela bilong ol i olsem kiau bilong kakaruk. Taim prut i nupela yet, insait long en i gat gutpela wara bilong dring i kain olsem kulau. Bihain dispela wara i swit i kamap strong liklik na man i ken kaikai. Na bihain long dispela, em i kamap waitpela na strong olgeta, na em i olsem tit bilong elefan.

Olsem Wanem Em i Pren Bilong Elefan

Pikinini tagua em senis bilong tit bilong elefan, olsem na yumi ken tok em pren tru bilong en. Long pasin hait ol man i save kisim tit bilong ol elefan, na dispela i mekim na ol elefan bilong Afrika i laik pinis. Tasol pikinini tagua i kamap gutpela senis bilong tit bilong ol elefan, long wanem, dispela pikinini bilong diwai i wankain olsem tit bilong elefan; em i strong tru, na man inap polisim na em bai lait tru, na ol kala man i putim i pas gut long en. Pikinini tagua na tit bilong elefan i wankain tru, olsem na sampela man bilong wokim ol samting long pikinini tagua, ol i save lusim liklik hap skin bilong en long samting ol i wokim bambai ol man i ken save, ol i no bin mekim wok long tit bilong elefan. Long olgeta hap, ol gavman i bin tambuim ol man long mekim wok long tit bilong elefan.

Inap longpela taim ol man i save pinis long wok bilong pikinini bilong diwai tagua. Long yia 1750, wanpela man bilong Saut Amerika, em Huan de Santa Getrudis, em i tok long pikinini tagua long ol stori bilong em, na em i tok ol i olsem “ol bal mabel” em ol i bin mekim wok long en bilong sapim ol imis. Long 1910 samting, planti pikinini tagua i bin kamap long Ekwado, winim ol narapela kantri, na long olgeta yia ol i bin salim planti tausen ton pikinini tagua i go long ol narapela kantri, bilong ol i ken wokim ol baten long en. Bihain long Namba Tu Pait, ol i kirap wokim ol samting long plastik i no gat bikpela pe, olsem na ol man i no baim moa pikinini tagua. Tasol nau ol i mekim gen wok long en, na insait long 18 mun i go pinis, ol i kisim 1,650 ton pikinini tagua long Ekwado i go long Jemani, Itali, Japan, Yunaitet Stets, na long 18 narapela kantri.a Long nau ol i save mekim wanem ol samting long pikinini tagua?

I Gat Planti Wok Bilong En

Ol i putim ol pikinini tagua long san bambai ol i go drai. Mak bilong wara i stap insait long en i makim hamas mun bai ol i stap long san, em wanpela i go inap 3-pela mun. Bihain wanpela masin i rausim skin bilong ol, na makim ol bikpela i go long wanpela lain na ol liklik i go long narapela lain, na ol i katim ol i go liklik bambai ol i ken wokim baten long ol. Ol dispela baten ol i wokim long pikinini tagua ol i save bilasim ol klos i gutpela tru. Tasol ol i no wokim ol baten tasol long pikinini tagua, nogat. Ol i wokim tu ol bilas, na ol liklik samting bilong pilai wanpela kain pilai (chess) long en, na samting bilong maus bilong biugel samting, na baten bilong piano em man i save paitim, na han bilong ambrela na planti samting moa.

Tasol ol i ken mekim sampela samting moa long diwai tagua! Ol i putim paura bilong pikinini tagua​—⁠em ol i kisim taim ol i wokim ol samting long en​—⁠long kaikai bilong ol animal bilong mekim kaikai i kamap gutpela. Ol i putim dispela paura tu long ston ol i kolim kol bambai dispela ston inap paia gut. Ol i wokim rup long lip bilong dispela diwai pam, em dispela rup inap pasim ren long kam insait. Na tu, wok bilong kisim pikinini tagua, na wok bilong klinim na katim, na wok bilong salim pikinini tagua i go long ol narapela kantri i givim wok mani long planti man.

Na bikpela samting tru, em pikinini tagua inap helpim tru ol elefan bilong Afrika na ol i no pinis olgeta. Olsem na sapos yu laik kisim samting ol i wokim long tit bilong elefan, yu inap kisim dispela samting long narapela rot. Tingim bikbus bilong Saut Amerika, long dispela hap ol samting i olsem tit bilong elefan i save kamap long ol diwai na i planti tru! Em nau, tingim pikinini tagua, em pren bilong elefan.

[Futnot]

[Ol Piksa long pes 14, 15]

1. Diwai tagua

2. Prut bilong tagua

3. Ol i katim prut bilong tagua na ol pikinini i stap ples klia

4. Pikinini tagua i go drai na i kamap strong

5. Ol baten ol i wokim long pikinini tagua

6. Bilas ol i wokim long pikinini tagua

7. Ol liklik imis ol i wokim long pikinini tagua