Lamu—Wanpela Ailan i Stap Wankain Olsem Long Bipo Yet

WANPELA MAN LONG KENYA I RAITIM DISPELA STORI BILONG KIRAP!

LIKLIK sip i wok long ran i go taim win bilong solwara i holim sel. San i wok long sutim ai bilong wanpela man taim em i stap antap tru na holim strong mas bilong sip na bai em i ken lukluk long ol hap bilong solwara India bilong painim sampela graun. Dispela i kamap long yia 1500 samting, na ol dispela man i laik painim ailan Lamu.

Gol, tit bilong elefan, olkain kari samting bilong wokim kaikai i swit, na ol wokboi nating​—⁠Ol dispela samting i stap long Afrika. Ol dispela kago wantaim bikpela laik long skelim ol narapela hap i kirapim ol strongpela man long sampela kantri i stap longwe long kam long hap bilong Is Afrika. Ol man i save raun long sip ol i karim hevi bilong biksi na strongpela win bilong painim ol gutpela samting. Ol boskru i save pas tru insait long ol liklik sip ol i wokim long diwai na go long ol longwe hap.

Namel long nambis bilong Is Afrika i gat ol liklik ailan i stap, ol i kolim ol ailan Lamu, na i gat ol rip i raunim hap klostu long nambis, na solwara i daun. Olsem na i gutpela hap bilong ol sip i no strong tumas wantaim ol boskru i ken i go sua. Long dispela hap ol i ken kisim ol samting ol i bin pinisim long raun bilong ol olsem wara bilong dring na kaikai.

Long yia 1500 samting ailan Lamu i kamap olsem wanpela hap i gat ol gutpela stua bilong baim na salim ol samting. Taim sampela lain bilong Potugal i kamap long dispela hap long yia 1600 samting, ol i lukim ol bisnisman i gat bikpela mani ol i pasim ol longpela laplap samting na long het ol i pasim laplap ol i bin wokim long slika. Ol meri i save putim sanda long skin bilong ol na pasim ol bilas gol long han na lek taim ol i wokabaut long rot. Long olgeta hap bilong bris yu inap lukim ol sip ol i bin pasim ol sel bilong ol. Ol sip i go daun tru long wara, long wanem, ol i pulimapim ol kago inap long mak bilong ol bilong redi long go long ol kantri i stap longwe. Ol i pasim ol wokboi nating wantaim long baklain na ol i wet i stap inap long ol i putim ol i go insait long sip.

Ol lain bilong Yurop i save raun bilong painim ol narapela kantri ol i kirap nogut taim ol i kam long Lamu na lukim stail bilong ol haus na ol samting ol lain i stap long dispela hap i mekim bilong rausim ol pipia. Bilong wokim ol haus i stap arere long solwara ol i bin kisim ol karanas i stap long dispela hap na katim ol blok long han. I gat ol strongpela dua ol i bin sapim ol gutpela makmak long en na ol dispela dua i save pasim rot bilong go insait long haus. San i no save hatim ol tumas, long wanem, ol i lainim gut ol haus bilong kisim gutpela win i kam long solwara.

Ol haus bilong ol maniman i bikpela na i gat planti spes long en. Ol i mekim wok long paip bilong pulim wara i go long rum bilong waswas. Pasin bilong ol long rausim pipia bilong toilet i gutpela na i winim planti kantri long Yurop long dispela taim. Ol longpela baret ol i bin katim long ston i save rausim ol pipia i go daun long wanpela hul i stap klostu long solwara na longwe long ol wara bilong dring. Wara bilong haus i stap long wanpela dram samting ol i wokim long ston, na bilong daunim ol natnat ol i putim ol liklik pis long dram bilong kaikai ol liklik snek bilong natnat.

Long yia 1900 samting, ol sip i raun long solwara i save kisim planti samting long Lamu, olsem tit bilong elefan na hipo, wel, ol samting bilong planim long gaden, skin bilong animal, skin bilong trausel, na planti ol lain bilong i stap wokboi nating. Tasol isi isi ol gutpela bisnis bilong Lamu i wok long go slek. Ol bikpela sik nogut, ol lain birua i kam pait long ol, na sampela lo bilong bosim wok bilong baim ol wokboi nating, ol dispela samting i bin daunim wok bisnis bilong Lamu.

Wanpela Hap i Stap Wankain Olsem Long Bipo Yet

Long nau taim ol sip i kam sua long Lamu i olsem ol i kamap long wanpela hap i stap wankain olsem long bipo yet. Olgeta taim win i save kam long traipela solwara India na ol liklik si i wok long kam bruk long waitpela nambis. Ol sip ol i wokim long diwai na i kain olsem ol sip bilong bipo. Taim sip i wok long ran i go bihainim nambis, sel bilong ol i luk olsem ol wing bilong bataflai. Ol sip i kam long Lamu i gat ol pis, frut, kokonas, bulmakau, kakaruk, na pasindia i pulap long en.

Long bris bilong Lamu, win i wok long meknaisim ol kokonas i stap olsem ples kol liklik bilong ol man i wok long rausim ol kago bilong ol sip. I gat planti pairap long maket taim ol manmeri i stap na wok long toktok i go i kam bilong baim na salim ol samting. Ol dispela lain i no kam bilong kisim gol, o tit bilong elefan, o ol wokboi, nogat, ol i kam long kisim ol banana, kokonas, pis, na ol basket.

Bikpela diwai mango i stap olsem ples kol bilong sampela man i wokim ol rop long sampela strongpela gras na ol i wok long stretim sel bilong ol liklik sip diwai bilong ol. Ol rot bilong taun i liklik na planti ol manmeri i wok long go i kam. Ol bisnisman i pasim ol longpela waitpela klos na ol i stap long stua bilong ol na singaut long ol man long kam na lukim ol samting ol i salim. Wanpela donki i stap namel long ol manmeri long rot na wok strong long pulim wanpela wilka i gat ol traipela bek ol i bin pulapim rais samting long en. Ol lain bilong Lamu i save wokabaut long lek tasol bilong go long ol narapela hap bilong ailan, long wanem, i no gat ol ka i stap long dispela hap. Yu inap kam long dispela ailan long bot tasol, i no gat narapela rot.

Taim san i kamap hat olgeta long belo, i olsem olgeta samting i slip i stap. Tuhat i mekim na i no gat planti man i wokabaut; ol donki tu i sanap i stap na pasim ai strong na wetim san i kol liklik.

Ol lain i kirap taim san i wok long go daun na ples i wok long go kol liklik. Ol bisnisman i opim ol strongpela dua bilong stua na wok long salim ol samting i go inap biknait. Ol meri i save wasim ol pikinini na bihain putim wel bilong kokonas i go long skin bilong ol na skin i lait. Na tu, ol meri i sindaun long mat ol i wokim long lip kokonas na ol i kirap na redim ol kaikai. Ol i save bihainim yet pasin bilong kukim kaikai long paia, na ol i kukim ol kaikai i swit tru, olsem ol i save kukim rais wantaim gris bilong kokonas na ol gutpela kaikai olsem pis wantaim lombo o kari samting. Ol lain manmeri i save stap isi na bihainim pasin bilong i stap pren wantaim ol narapela na mekim gut long ol narapela.

Lamu i no stap gutpela tru olsem long bipo, tasol pasin na tingting bilong ol Afrika paslain long yia 1900 samting i stap yet. Aninit long hatpela san, i stap bilong ol man i wankain olsem long planti handet yia i go pinis. Long dispela hap yu inap lukim ol pasin bilong nau na ol pasin bilong bipo. Tru tumas, Lamu i stap yet olsem narapela kain ples bilong bipo. Em wanpela ailan i no bin senis.

[Blok/Ol Piksa long pes 16, 17]

Taim Mipela i Go Lukim LAMU

I no longtaim i go pinis na sampela bilong mipela i go lukim Lamu, tasol i no bilong baim o salim ol samting. Mipela ol Witnes bilong Jehova na mipela i go bilong lukim ol brata sista Kristen bilong mipela. Liklik balus bilong mipela i flai i go not, antap long nambis bilong Kenya. Daunbilo tru liklik si i wok long bruk i kam long nambis i gat waitpela wesan na planti ol grinpela diwai i stap. Bihain, mipela kirap nogut long lukim ol ailan bilong Lamu, ol i lait olsem ol ston i dia tumas long grinpela solwara. Olsem wanpela traipela tarangau bilong Afrika, mipela i stap antap na raunim ol dispela ailan na bihain mipela i lusim skai na kam daun long liklik ples balus bilong bikples. Mipela lusim balus na wokabaut i go arere long solwara na kalap long wanpela liklik sip i go long Lamu.

San i lait gut tru, na win bilong solwara i gutpela. Taim mipela i laik kamap long ailan mipela i lukim ol lain manmeri i go i kam long bris ol sip i save sua long en. Ol strongpela lain i wok long rausim ol samting long ol bot, na ol meri i karim ol samting long het em ol bai maket long en. Mipela wokabaut namel long planti manmeri taim mipela karim ol kago bilong mipela i go long ples kol bilong wanpela kokonas. Insait long sampela minit tasol ol brata Kristen i lukim mipela na ol i kam sekanim mipela. Ol i amamas tru long mipela i kam long ailan bilong ol.

Mipela kirap paslain long sankamap long moningtaim bilong bung wantaim ol brata sista long hap bilong solwara. Rot i go long ol miting bilong kongrigesen i longpela na mipela bai wokabaut long en inap sampela aua. Bilong redi long go mipela kisim wara bilong dring, ol hat i bikpela inap long pasim san, na ol gutpela su bilong wokabaut. San bilong moningtaim tru i stap baksait long mipela taim mipela i kalap long bot bilong go long bikples, em dispela hap ol miting i save kamap long en.

Rot i op na ol brata i autim tok long ol lain i sindaun long bot, olsem na taim mipela i no kamap yet long bris bilong bikples mipela bin kamapim sampela stori bilong Baibel na tilim sampela magasin. Rot mipela i mas wokabaut long en i no gat man, na em i hat tumas na das i pulap. No gat ol lain i save stap long bus bilong dispela hap, olsem na ol i tokim mipela long was gut, long wanem, i gat ol wel animal na sampela taim ol elefan long rot. Ol brata i stap amamas taim mipela i wokabaut isi isi long rot.

I no longtaim na mipela kamap long wanpela liklik ples na bungim ol narapela long kongrigesen, ol tu i bin kam long ol longwe hap. Rot bilong go long miting i longpela tru, olsem na ol i save mekim 4-pela miting long wanpela de.

Ol i wokim ol miting long wanpela liklik skul ol man i bin wokim long ston, na hap bilong ol windo na dua i stap op tasol. Mipela 15 manmeri i amamas long sindaun insait long klasrum long ol bang ol i wokim long diwai na kisim ol gutpela tok bilong Baibel bilong strongim mipela na givim gutpela skul long mipela. Mipela i no tingting tumas long san i hatim kapa na mekim hap mipela i sindaun long en i hat tru. Mipela amamas long stap wantaim tasol. Long 4-pela aua bihain ol miting i pinis. Mipela tok gutbai na mipela olgeta i lusim dispela hap na go long narapela narapela hap. Taim mipela kam bek long Lamu, san i wok long go daun.

Long nait taim ples i kol liklik mipela sindaun wantaim ol famili Witnes i stap long Lamu na kisim sampela liklik kaikai. Long ol de bihain mipela wokabaut long ol liklik rot bilong Lamu bilong wok wantaim ol long autim tok na painim ol man i hangre long kisim ol tok i tru bilong Baibel. Maski ol brata na sista i no planti, ol i no save pret na ol i givim bel long mekim dispela wok na dispela i strongim mipela.

Bihain de i kamap bilong mipela i mas lusim dispela hap. Ol brata i kisim mipela i go long hap bilong kalap long bot, na mipela bel hevi taim mipela tok gutbai. Ol i tok olsem ol i kisim strong taim mipela i stap wantaim ol. Tasol mipela tingting, ol i save ol i bin strongim mipela? Bihain mipela kamap long bikples na i no longtaim na mipela i kalap long liklik balus. Taim balus i wok long go antap na bihain i go antap moa, mipela lukluk i go daun long naispela ailan Lamu. Mipela tingting long strongpela bilip bilong ol brata i stap long dispela hap, ol i mas wokabaut longwe long go long ol miting, na ol i save givim bel tru long tok i tru na wok strong long autim tok. Long bipo tru ol i raitim wanpela tok profet long Song 97:1: “Bikpela i stap king. Graun yu mas amamas. Na ol ailan, yupela i mas belgut.” Tru tumas, maski Lamu i stap longwe long ol narapela man, rot i op na ol i ken save long gutpela samting yumi wetim, em paradais bai kamap long graun long rot bilong kingdom bilong God.​—⁠Wanpela man i salim dispela stori i kam.

[Ol Mep/Piksa long pes 15]

(Bilong save ol dispela rait i stap we long pes, lukim buk o magasin)

AFRIKA

KENYA

LAMU

[Piksa Kredit Lain long pes 15]

© Alice Garrard

[Piksa Kredit Lain long pes 16]

© Alice Garrard