Kirap Long Olimpia i Kam Long Sidni

PLANTI man i ting ol Olimpik-Gems ol i nambawan bikpela pilai bilong spot. Wanpela buk (The World Book Encyclopedia) i tok: “I no gat narapela pilai em planti man i laik lukim olsem ol Olimpik-Gems. Planti milion manmeri i save go lukim ol dispela pilai, na planti handet milion manmeri long olgeta hap ol i save lukim ol long televisen.”

Sotpela Stori Bilong Ol Olimpik-Gems

Ol Olimpik-Gems i bin kirap inap planti tausen yia i go pinis. Ol Grik bilong bipo ol i bilip olsem ol man bilong pilai spot ol i amamasim tewel bilong ol man i dai pinis, olsem na ol i mekim ol bikpela bung em pasin bilong lotu na ol pilai bilong spot i bung wantaim. Sampela bilong ol dispela bung em ol pilai bilong Ismian, Nimian, Olimpik, na Pitian. Ol man i ting ol Olimpik i winim olgeta narapela pilai, long wanem, ol i litimapim nem bilong Sus, em ol Grik i ting em i king bilong olgeta god.

Pastaim i gat wanpela kain pilai tasol long ol Olimpik-Gems, em resis bilong ran. Tasol bihain ol i mekim ol narapela pilai tu, olsem resis bilong ol karis em ol hos i save pulim, na ol pilai bilong traim strong bilong man. Planti man bilong ol longwe longwe hap ol i kam lukim ol dispela pilai. Bilong hevi i no ken painim ol dispela pilai, ol i tambuim ol kantri long ol i no ken pait paslain na bihain long pilai.

Taim gavman Rom i kirap bosim bikpela hap bilong graun, ol man i no ting ol Olimpik-Gems i bikpela samting tumas. Tru tumas, planti man bilong Rom ol i ting ol spot i samting nating tasol. Wanpela man i no gat dispela kain tingting em King Niro. Em i insait long ol Olimpik-Gems long yia 67 C.E. na em i winim olgeta pilai em i insait long en. Ol narapela man i insait long pilai, ol i bihainim savepasin na larim King i winim ol! Tasol long yia 394 C.E., ol Olimpik-Gems i pinis.

Kirapim Gen Ol Olimpik-Gems

Inap 15 handet yia bihain, ol samting sampela saveman bilong Jemani i painim insait long graun long ples daun bilong Olimpia bilong bipo, dispela i kirapim ol man long tingim gen dispela pilai. Bihain, Pierre de Coubertin, em wanpela bikman bilong Frans i gat 29 krismas, em i laik bai dispela pilai i kirap gen. Olsem na long yia 1896, namba wan Olimpik-Gems bilong nau i kamap long Atens. Kirap long dispela taim, ol i bin mekim ol Olimpik-Gems long olgeta 4-pela 4-pela yia, wan wan taim tasol ol i no bin mekim.

Long nau planti man ol i givim bel tru long wetim dispela pilai. Long dispela yia, ol Olimpik-Gems bai kamap long Sidni, Ostrelia, kirap long Septemba 15 i go inap Oktoba 1. Insait long dispela pilai bai i gat 28 narapela narapela spot, na 292 pilai, na 635 hap taim bilong mekim ol pilai, na winim 10,300 man bilong pilai spot ol bai insait long en.

Tasol nau long dispela taim, ol man i toktok planti long ol samting bilong ol Olimpik-Gems. Planti ol i tok ol gutpela samting ol Olimpik-Gems i laik kamapim i laik bagarap. Taim yumi skelim ol samting bilong ol Olimpik-Gems, planti samting bai kamap long ples klia na bai yumi kirap nogut long en.

[Piksa Kredit Lain long pes 3]

Scala/Art Resource, NY