Tambili—Nambawan Bilong Ol Kokonas
WANPELA MAN LONG SRI LANKA I RAITIM DISPELA STORI BILONG KIRAP!
TAMBILI, em planti taim long tok Inglis ol i kolim olsem nambawan kokonas, em nem bilong kulau bilong diwai kokonas aurantiaca long tok Sinhala. Aurantiaca em i wanpela naispela diwai kokonas, 6-pela o 8-pela yia bihain long ol i planim, long olgeta taim em i save karim ol traipela traipela rop kulau kala bilong en i orens. Kulau tambili em i longpela inap olsem 30 sentimita na hevi bilong en em olsem 1.5 kilo. Dispela kokonas i pulap long olgeta hap bilong ailan Sri Lanka. Long tok Sinhala, dispela tok tambili i no makim tasol kulau, nogat, em i makim tu naispela orens kala bilong en.
Tasol olsem wanem ol man inap kisim wara bilong tambili? Ol i kisim tambili taim em yangpela kulau yet. Ol i katim skin long ai bilong en na wokim hul long kulau. Ol inap kisim olsem 1 lita klinpela wara long tambili. Em wara i naispela, i swit, na i gutpela bilong strongim skin. Em pasin bilong ol Sri Lanka long givim tu wara bilong tambili long ol man i go kamap long ol bilong mekim kol nek drai bilong ol.
Taim yu raun long ailan Sri Lanka, bai yu lukim long olgeta hap i gat ol liklik haus maket arere long rot bilong salim tambili, em liklik pe tasol. Ol lain i maket bai katim ai bilong kulau na putim stro i go insait na dring. Man! Bai yu dringim gutpela klinpela wara i no gat samting nogut long en. Sapos yu man bilong traim kain kain samting, orait traim dring tambili long stail bilong ol man bilong ples yet, olsem daunim het i go long baksait na apim kulau na wara bilong en i kapsait i go stret long maus. Tasol sapos yu no save gut, bikpela hap wara bai kapsait na yu dring liklik tasol!
Ol Sri Lanka i save long ol gutpela samting wara bilong tambili i save mekim long bodi. Sampela i tok wara bilong tambili bai rausim hat bilong skin na stretim sik long bel. Wara bilong tambili i gat sampela samting olsem, kabohaidret, kalsiam, vaitamin C, fosforas, ain, na liklik protin long en. Ol dispela samting i mekim na wara bilong kulau i gutpela bilong helpim ol man i save tuhat klostu klostu, win i pulap long bel na mekim man i traut planti, o sik kolora. Ol wara i no stap klin long olgeta taim, tasol wara bilong tambili i stap klin olsem tasol, skin i karamapim na i no gat doti long en, olsem na em i gutpela long yu tu.
Sapos yu kam raun long nambis bilong dispela ples i gat bikpela san, Sri Lanka, mipela i save bai yu amamas long lukim ol naispela kala bilong tambili i bilasim ol gaden o naispela nambis, na tu, bai yu amamas long gutpela wara bilong en i givim nupela strong long yu.