Wanpela Pikinini Diwai i Gat Planti Wok Long En Long Graun
I GAT wanpela pikinini bilong diwai i bin raun long olgeta hap bilong graun. Em i givim kaikai na wara wantaim. Na diwai i save karim dispela pikinini kaikai em i mak bilong ol ailan long ol ples hat. Em wanem pikinini bilong diwai yumi toktok long en? Em kokonas—wanpela pikinini bilong diwai i gat planti wok long en long graun.
Long ol man i no bilong ol ples hat, diwai kokonas i kirapim ol long tingim taim bilong malolo long ol ples hat. Tasol long ol man bilong ol ples hat, dispela diwai i bikpela samting long ol. Ol man bilong Indonisia i tok olsem kokonas i gat “planti wok bilong en olsem i gat planti de insait long wanpela yia.” Long Filipin ol i gat dispela savetok: “Man i planim diwai kokonas i olsem em i planim ol plet kap na klos, kaikai na dring, na haus bilong em yet, na gutpela samting bilong givim long ol pikinini bilong em long bihain.”
Dispela savetok i stret. Wanpela buk (Coconut—Tree of Life) i tok diwai kokonas i save “givim kaikai, wara na wel bilong kukim kaikai, na tu, em i save givim lip bilong wokim rup bilong haus, na string bilong wokim rop na mat, na sel bilong en ol inap yusim olsem plet kap na bilas samting, na ol i save kisim wara bilong plaua bilong kokonas na wokim alkohol na suga long en.” Dispela buk i tok moa: “Sapos ol i katim gut diwai kokonas ol inap long mekim wok long diwai bilong en tu.” Ol man bilong ailan Maldive long solwara Indian ol i bin wokim ol bot long ol samting bilong kokonas, na ol i tok olsem ol man bilong dispela ailan i raun long ol dispela bot i go long Arebia na Filipin. Tasol kokonas i winim ol man i save planim kokonas, em i save raun gut tru long solwara na i go long ol longwe ples.
Wanpela Pikinini Diwai i Raun Long Solwara
Kokonas i save go bikpela long ol nambis bilong ol ples hat, sapos i gat inap ren. Tru, ol man bilong ol ples hat i save planim kokonas, tasol kokonas yet i bin raun i go long ol longwe ples long graun na i no ol man i bin kisim i go long ol dispela hap. I gat planti rot bilong ol pikinini diwai i ken go nabaut, tasol kokonas i mekim wok long solwara, olsem na em inap raun i go long planti hap long graun.
Taim kokonas i kamap drai, em i save pundaun long graun na sampela taim em i tanim tanim i go daun long nambis. Na long taim bilong haiwara, solwara i save kisim drai i go. Skin bilong drai i mekim na drai i save trip gut antap long solwara. Sapos drai i bin stap long wanpela liklik ailan bilong Pasifik, ating em bai trip i go long narapela sait bilong ailan. Tasol sapos em i trip i go long biksolwara, em inap long raun i go longwe tru.
Wara i gat sol i save bagarapim ol narapela pikinini diwai, tasol em i no inap go insait hariap long strongpela skin bilong kokonas. Kokonas inap stap gut maski em i stap tripela mun long solwara—sampela taim em inap trip planti tausen kilomita—na taim em i go kamap long wanpela nambis em inap long kru. Ating long dispela rot kokonas i bin go kamap long planti ailan long ples hat.
Samting Bilong Ples Hat i Swit
Ol man i no stap long ples hat inap ting olsem kokonas em bilong givim swit long wanpela soklet o bisket. Tasol sapos yu go long Saut-is Esia bai yu kisim save olsem kokonas i gat planti wok long en. Wanpela buk (Pacific and Southeast Asian Cooking) i tok “kokonas em i wanpela bikpela samting ol man i save yusim taim ol i redim kaikai, em ol man bilong olgeta kantri na ol ailan long hap bilong Hawaii i go long hap bilong Bangkok.” Na buk i tok tu olsem long ol man bilong ol dispela hap, “kokonas em samting ol i mas i gat na i givim strong long ol . . . long kain kain rot, na long planti kaikai ol i redim.”
As na kokonas i stap namba wan samting long haus kuk bilong ol man bilong ol ples hat em olsem: Em i givim wara, gris, na wel bilong kukim kaikai. Switpela wara i stap insait long kulau, ol i save kolim wara bilong kokonas. Dispela wara i swit, na long ol ples hat ol i save salim long ol liklik maket samting long rot. Tasol ol i save kisim gris bilong kokonas long rot bilong tanim kokonas ol i skrapim pinis wantaim wara na bihain ol i bengim bilong kisim gris bilong en. Gris bilong kokonas i save givim swit long sup wantaim bret na bisket samting.
Bilong kisim wel bilong kokonas, man i save brukim drai na draim long san. Taim kokonas i drai, em bai rausim mit bilong kokonas o kopra long sel, na bihain rot i op bilong kisim wel bilong en. Long ol ples hat, bikpela wok ol man i save mekim long wel bilong kokonas em long kukim kaikai, tasol long ol kantri long hap bilong Wes, ol i save mekim wok long wel bilong kokonas long wokim majarin, aiskrim, na ol bisket.
Wok bilong kisim kokonas em i hatwok. Klostu long olgeta taim, man bilong kisim kokonas i mas go antap long diwai na katim kokonas long diwai. Sampela narapela ol i save yusim wanpela longpela stik em ol i pasim naip long en. Long Indonisia, ol i lainim ol monki long kisim kokonas. Wanpela rot bilong kisim kokonas—ol man husat i laik bai kokonas i redi gut paslain long ol i kisim ol i save bihainim dispela pasin—em long wet inap long kokonas i pundaun long graun taim em i redi.
Maski wanem rot ol man i save bihainim bilong kisim kokonas, kokonas i gat planti wok long en, dispela i mekim na em i stap olsem gutpela rot bilong kisim mani, na tu, em i gutpela kaikai tru bilong planti man. Olsem na taim yu lukim diwai kokonas—i stap long piksa o yu lukim tru long ai—tingim olsem em i wanpela diwai i gat planti wok long en na i no bilas tasol bilong nambis long ol ples hat. Yu lukluk long wanpela diwai i save karim wanpela pikinini kaikai i gat planti wok long en long graun.
[Blok/Ol Piksa long pes 20]
OL NARAPELA KAIN SAMTING BILONG KOKONAS
KUKA BILONG KOKONAS I no ol man tasol i save amamas long diwai kokonas i karim planti kaikai. Kuka bilong kokonas i save stap insait long wanpela hul long graun long taim bilong san, tasol long nait em i save kaikai kokonas. Ol man i mas yusim busnaip bilong brukim kokonas, tasol dispela kuka i save paitim kokonas antap long ston i go inap em i bruk. I luk olsem dispela kaikai i stret long dispela kuka—em inap i stap laip winim 30 yia!
KOKONAS NA OL SAMTING BILONG MEKIM NAIS SKIN Wel bilong kokonas i gutpela long skin, olsem na ol kampani i mekim wok long en bilong wokim lipstik na wel bilong pasim san long kukim skin. Na sapos yu yusim sop i gat planti spet bilong en, ating wel bilong kokonas i mas wanpela bikpela samting i stap long en.
[Ol Piksa]
Kokonas inap stap gut, maski em i stap longpela taim long solwara
Kuka bilong kokonas
Kru bilong kokonas
[Kredit Lain]
Godo-Foto
[Piksa Kredit Lain long pes 20]
Top right insert: Godo-Foto