Tupela i Narapela Narapela Kain
Ol saientis bilong solwara i glas long nait long biksolwara bilong bikpela rip bilong Australia (Great Barrier Reef) na em i namba wan taim, ol i lukim wanpela blanket urita man i stap laip yet. Ol i kirap nogut long wanem samting?
I gat as na ol i tok “sais bilong blanket urita man na sais bilong blanket urita meri i narapela narapela, winim ol arapela animal.” Longpela bilong meri em inap olsem 2 mita na hevi bilong em inap olsem 10 kilogram. Tasol longpela bilong man em inap olsem 3 sentimita na hevi bilong em inap olsem 300 miligram tasol! Sais bilong man i wankain olsem blakpela samting insait long ai bilong urita meri. Dispela i makim olsem hevi bilong meri i winim hevi bilong man inap 40,000 taim, na i no gat narapela animal man na meri em sais bilong ol i narapela kain olsem. Dispela kain urita i save stap long biksolwara longwe long nambis. I kam inap long nau ol man i save lukim ol urita meri tasol wantaim ol urita man i dai pinis em ol i pas long umben.
Olsem wanem dispela tupela narakain sais urita i kamapim ol pikinini? Wanpela bilong etpela han bilong urita man i gat hul insait long en. Taim urita man i painim wanpela urita meri, dispela han i save pulap long melek. Dispela han i save bruk na i go insait long skin bilong urita meri long bikpela hul long bodi bilong em. Ol melek i stap long dispela hap inap urita meri i bungim ol kiau bilong em na kapsaitim dispela melek long ol kiau.
Bilong lukautim em, man i save kisim ol longpela han bilong jeli pis i gat marasin nogut long en, na holim long han bilong em na yusim ol long pait. Tasol ol longpela han bilong jeli pis i no inap lukautim em long dispela taim, nogat, taim em i givim melek pinis long urita meri, orait em i save dai. Long dispela as ol saientis i bin kirap nogut taim ol i painim ol dispela kain urita!
Maski wanem as na sais bilong tupela i narakain tru, tok bilong Baibel i kamap tru: “Solwara i bikpela tru, na planti bikpela pis na liklik pis na ol arapela samting i stap long en. Mipela i no inap kaunim.”—Song 104:25.
[Ol Piksa long pes 25]
Meri: longpela bilong em 2 mita; hevi bilong em 10 kilogram
Man: longpela bilong em 3 sentimita; hevi bilong em 300 miligram
Sais bilong man taim yu skelim wantaim sais bilong meri
[Ol Kredit Lain]
Female: Photo P. Wirtz; male: Photo: D. Paul