Baibel i Tok Wanem?
God Em i Wanem Kain?
“GOD em i Spirit. Na ol man i lotu long em, ol i mas lotu long strong bilong Holi Spirit na long pasin i tru.” Dispela tok i kamapim klia wanpela bikpela tok tru—God em i spirit! (Jon 4:19-24) Tasol Baibel i tok tu olsem em i wanpela man i gat pasin na tingting. Nem bilong em Jehova.—Song 83:18, NW.
Sampela man bilong ritim Baibel, ol i paul long God em i wanem kain. God em i spirit na em i no gat bodi bilong man, olsem na bilong wanem i gat planti tok long Baibel i stori long God olsem em i gat ai, yau, nus, bel, han, pinga, na lek?a Sampela man i ting God i gat bodi olsem bilong man, long wanem, Baibel i tok God i wokim man i kamap olsem em yet. Sapos yumi skelim gut tok Baibel i mekim, dispela bai helpim yumi long save long God em i wanem kain.—Stat 1:26.
Bilong Wanem Baibel i Tok God i Gat Bodi Olsem Man?
Bilong helpim ol man long kliagut long God em i wanem kain, holi spirit i stiaim ol man i raitim Baibel long yusim ol tok i makim bodi bilong man, olsem ai, yau, han, na lek samting, bilong makim God i Gat Olgeta Strong. Dispela ol tok i kamapim olsem ol man i sot long tok bilong makim stret God tru, em Jehova. As na ol i mekim olsem, em bilong helpim ol man long tingim ol bikpela samting tru bilong God, olsem em i wanem kain na wanem ol pasin bilong em. Tasol dispela i no makim olsem God i gat ai tru o yau tru, nogat, wankain olsem taim Baibel i stori long God olsem em i wanpela “ston” o “lait,” yumi no kisim tingting olsem God em i dispela samting tru tru.—Lo 32:4; Song 84:11.
Olsem tasol, taim Baibel i tok God i wokim man i kamap olsem em yet, dispela i makim olsem ol man i gat pasin olsem bilong Jehova inap long sampela mak tasol. Dispela tok i no makim olsem ol man ol i spirit, o God i gat bodi olsem bilong man, nogat.
God Em i Man o Meri?
Taim Baibel i stori long God i gat ai, han, o lek samting, dispela i no makim olsem em i gat bodi bilong graun olsem bilong man o meri, nogat. Dispela em tok piksa tasol bilong helpim yumi long save gut long God, na yumi mekim wok long dispela tok, long wanem, yumi sot long tok bilong makim stret God i Gat Olgeta Strong, Jehova, em i wanem kain.
Taim Baibel i tok long God olsem “Papa,” em bilong helpim yumi long kliagut olsem Man Bilong Wokim yumi em i olsem wanpela gutpela papa husat i gat pasin laikim na em i save lukautim na mekim gut long famili bilong em. (Matyu 6:9) Dispela i no makim olsem yumi mas tingim God o ol ensel long heven olsem ol i man o meri, nogat. Wanpela samting yumi ken tingim i olsem, Baibel i soim olsem dispela lain husat bai i stap king wantaim Krais long Kingdom bilong em long heven, ol bai i no stap moa olsem man o meri taim ol i kamap pikinini spirit bilong God long heven. Aposel Pol i kirapim ol long tingim olsem “i no gat ol man na ol meri” long lain bilong ol taim ol i kamap pikinini spirit bilong God long heven. Na tu, Baibel i tok piksa na i kolim ol olsem ‘meri i laik marit’ long Pikinini Sipsip, em Jisas Krais. Dispela ol samting i kamapim klia olsem taim Baibel i stori long God, na Pikinini bilong em Jisas, na ol ensel tu, olsem ol i gat han, lek, na ai samting, dispela i no makim olsem tru tru ol i man, nogat, em tok piksa tasol.—Galesia 3:26, 28; KTH 21:9; 1 Jon 3:1, 2.
Ol man bilong raitim Baibel i save gut long wok samting em ol man i save mekim, olsem na ol i yusim dispela tok man bilong makim God. Ol i lukim olsem man husat i save bihainim ol stiatok bilong God long mekim wok papa, em i olsem piksa long pasin bilong Jehova long laikim na tingim tru ol pikinini bilong em long graun.—Malakai 3:17; Matyu 5:45; Luk 11:11-13.
Nambawan Pasin Bilong God
Maski God i spirit, em i no i stap longwe, o i stap hait, o haitim tingting bilong em, nogat. Em i spirit, tasol dispela i no pasim ol manmeri i gat gutpela bel long kisim save long pasin laikim, bikpela strong, savetingting, na stretpela pasin bilong em, em ol pasin i stap ples klia long ol samting em i bin wokim.—Rom 1:19-21.
Taim yumi tingim God em i wanem kain, yumi ken tingim nambawan bikpela pasin bilong em, em pasin laikim. Bikpela pasin laikim bilong God i makim stret God em i wanem kain. (1 Jon 4:8) Insait long dispela pasin i gat ol narapela pasin bilong em olsem pasin marimari, pasin bilong lusim rong, na pasin bilong i no les kwik. (Kisim Bek 34:6; Song 103:8-14; Aisaia 55:7; Rom 5:8) Tru tumas, Jehova, em i God bilong pasin laikim na em i singautim yumi ol man long i go klostu long em.—Jon 4:23.
[Futnot]
a Lukim sampela bilong ol dispela tok long Stat 8:21; Jop 12:10; Song 18:8, 9; 34:15; Hagai 2:23; Sekaraia 6:8; Rom 10:21; Hibru 4:13.
YU LAIK SAVE?
◼ Wanem nem bilong God?—Song 83:18, NW.
◼ Wanem ol samting i kamapim klia ol pasin bilong God?—Rom 1:19-21.
◼ Wanem nambawan bikpela pasin bilong God?—1 Jon 4:8.