Ol Samting i Gutpela Moa Winim Mani

JON i stap long Amerika na em i bin holim wanpela gutpela wok. Taim em i yangpela yet, em i raun long planti hap bilong graun na em i kisim bikpela mani tru. Em na meri bilong em i stap long naispela haus na ol i gat gutpela sindaun. Long ai bilong planti man, i stap bilong ol i gutpela tru.

Skelim narapela stori. Winim 5,000 manmeri i putim aplikesen bilong kisim wok long wanpela bikpela beng bilong Yurop, na ol i makim 80 manmeri tasol na Kostasa em i wanpela bilong ol. Insait long sampela yia tasol, wok bilong em i senis senis na em i kisim ol wok i gat bikpela namba moa, na i no longtaim em i kamap bosman bilong wanpela dipatmen bilong narapela beng. Paslain long em i lusim dispela wok na i go kirapim kampani bilong em yet, mani em i kisim long wanpela yia i winim mani planti man i save bungim long laip olgeta bilong ol. Em i pilim olsem i stap bilong em i gutpela tru.

Tasol dispela tupela man wantaim i bilip olsem i gat ol samting i gutpela moa winim mani. Long nau Jon i mekim wok volantia long skulim ol man long Baibel na helpim ol long i go klostu long God. Jon i tok: “Mi yet mi lukim na save olsem mani kago i no rot bilong kisim amamas. Taim man i taitim bun long kisim na bungim ol dispela samting, em i no gat taim bilong mekim ol narapela samting. Tasol taim man i bihainim ol stiatok bilong Baibel, dispela i save kamapim planti gutpela samting, olsem marit i stap gut, tingting i stap isi, na bel i no gat tok.”

Kostas i tok: “God i no laik bai yumi bungim planti tumas mani kago long i stap bilong yumi. Mi gat strongpela tingting olsem, sapos em i givim yumi planti samting i winim skel bilong yumi, orait yumi gat wok long yusim ol dispela samting long rot i stret wantaim laik bilong em.” I no longtaim i go pinis, Kostas na famili bilong em i kirap lainim narapela tok ples bambai ol i ken skulim planti man moa long ol stiatok bilong Baibel. Em i tok: “Mipela i kisim save olsem pasin bilong givim samting long ol arapela, dispela i save givim bikpela amamas moa long mipela, winim amamas bilong kisim ol samting.”​—⁠Aposel 20:⁠35.

Jon na Kostas, tupela wantaim i kisim save olsem ol gutpela samting ol i kisim taim ol i pas gut wantaim God, dispela i gutpela moa na i winim mani. Daniel Gilbert, profesa long Harvard, em i tok ol saveman bilong skelim tingting “i bin lusim planti yia long stadi long olsem wanem mani i save kamapim amamas, na ol i painimaut olsem mani i save mekim amamas i kamap bikpela moa taim mani i helpim man na em i no stap rabis moa na em inap kisim ol samting em i mas i gat.” Tasol em i tok moa olsem: “Taim man i kisim pinis ol dispela samting, mani i no mekim bikpela wok moa long kamapim amamas.”

Wanpela Skul Ol Man i Bin Kisim

Wanpela saveman i tok: “Taim man i no stap rabis moa, orait ekstra mani em i kisim bihain i no mekim bikpela wok tumas long mekim em i stap amamas.” Bihain long yia 1900, wanpela ripota i pilim tru dispela samting taim em i mekim inteviu long Andrew Carnegie, em wanpela man i bin go pas long wok bilong wokim ain, na em i gat planti mani tru. Carnegie i tokim em: “Ol man i no ken mangalim sindaun bilong mi. Mani bilong mi bai helpim mi olsem wanem? Mi gat 60 krismas, na bel i no inap brukbrukim kaikai. Mi bai givim olgeta mani bilong mi sapos mi inap baim rot bilong kamap yangpela gen na kisim gutpela helt.”

Ripota i tok moa olsem: “Mista Carnegie i tanim, na krai bilong nek i soim olsem bel bilong em i bagarap stret, na em i tok isi tasol olsem, ‘Mi bai amamas long salim wanem wanem samting mi inap salim bambai mi inap kisim bek laip bilong mi.’ ” Narapela man tu husat i kisim planti milion mani long wok bilong painim oil, em J. Paul Getty, em i gat wankain tingting na em i tok: “Mani em i no as bilong amamas. Em inap mekim man i stap bel hevi.”

Ating yu bai wanbel wantaim man bilong raitim Baibel, em i tok: “Yu no ken larim mi i kamap maniman o rabisman. Nogat. Yu ken givim mi kaikai inap long skel bilong mi. Nogut mi gat planti samting tumas na mi givim baksait long yu, na mi tok, ‘Bikpela em husat?’ Na nogut mi kamap rabisman na mi stilim ol samting na mi daunim nem bilong yu, God bilong mi.”​—⁠Sindaun 30:​8, 9.

King Solomon bilong Israel bilong bipo i tok: “Mi kisim ol dispela samting na mi kamap bikman tru. Ol man i bin i stap long Jerusalem bipo i no gat planti samting olsem mi.” Tasol em i tok moa: “Olgeta dispela samting i olsem samting nating tasol na i no inap long helpim mi liklik. I olsem man i ran i go bilong holimpas win.” Solomon i tok tu olsem: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”​—⁠Saveman 2:​9-11; 5:​12, 13; Sindaun 10:⁠22.

Rot Bilong Kisim Ol Blesing Bilong i Stap Oltaim Oltaim

Dispela i kamapim klia olsem sapos yumi pas gut wantaim God, dispela tasol em rot bilong kisim amamas tru. Sapos yumi putim God i stap namba wan, olgeta samting long i stap bilong yumi bai kamap gutpela moa na yumi bai amamas moa yet.

Yumi inap tok olsem wanpela taim bai kamap na mani i no ken i stap moa olsem samting ol man i tingting planti long en. Baibel i tokim yumi olsem long dispela taim, olgeta kain wok bisnis i gat pasin mangal ol bai pinis olgeta. (1 Jon 2:​15-17) God bai kamapim wanpela nupela taim long graun na ol man bai bihainim ol stretpela stiatok. Graun bai kamap ples Paradais olsem God i tingting pinis long en taim em i putim namba wan man na meri long graun. Em bai gutpela samting tru taim yumi lukim graun olgeta i pulap long amamas, bel isi, na pasin laikim!​—⁠Aisaia 2:​2-4; 2 Pita 3:13; 1 Jon 4:​8-11.

Long dispela taim, ol man bai amamas tru long sindaun bilong ol. Ol man bai pas gut wantaim God na em bai givim ol samting bilong skin, na long dispela rot em bai kamapim samting em i tingting pinis long mekim long bipo yet, olsem ol man bai i stap oltaim oltaim long Paradais long graun. Baibel i tok olgeta man bai i gat kaikai, haus, na gutpela wok bilong mekim. Hevi bilong i stap rabis bai i pinis olgeta.​—⁠Song 72:16; Aisaia 65:​21-23; Maika 4:⁠4.

Jehova em God i bin kamapim ol tok bilong Baibel, na olgeta man husat i bilip tru long em, em bai mekim gut tru long ol. (Rom 10:​11-13) Olsem na em savetingting long mekim ol wok bilong kisim ol samting i gutpela moa winim mani!​—⁠1 Timoti 6:​6-10.

[Futnot]

[Rait long pes 8]

Sapos yumi putim God i stap namba wan, yumi bai amamas moa yet long i stap bilong yumi

[Piksa long pes 8]

Sapos man i bosim gut mani, em inap amamas moa yet long laip bilong em