Rot 7: Samting Bilong Strongim Famili
Mining bilong dispela. Ol strongpela famili i no save stap strong nating, wankain olsem wanpela haus i no save sanap strong nating inap planti yia. Bilong sanap strong, haus i mas i gat strongpela as, na i wankain tu long ol strongpela famili. Ol famili i stap gut wantaim, ol i gat gutpela samting tru bilong soim rot long ol.
As na em i bikpela samting. I gat planti buk, nius, na TV program i save givim skultok long ol famili. Sampela saveman i gat wok long givim skultok long ol marit, ol i strong long kirapim ol marit i gat hevi long ol i mas i stap wantaim, tasol sampela i strong long kirapim ol long brukim marit. Na sampela taim ol saveman i save senisim tingting bilong ol long dispela samting. Olsem: Long 1994, wanpela kain dokta bilong helpim ol yangpela i gat hevi, em i tok taim em i nupela yet long dispela wok, em i ting “ol pikinini bai i stap gutpela sapos ol i sindaun wantaim papa o mama i stap wanpis tasol em i stap amamas, winim pasin bilong sindaun wantaim papamama i no stap amamas. Mi bin ting katim marit i winim pasin bilong i stap wantaim long marit i gat planti hevi.” Tasol taim em i mekim dispela wok inap 20 yia pinis, em i senisim tingting. Em i tok: “Pasin bilong katim marit i save bagarapim tru bel bilong planti pikinini.”
Tingting bilong ol man i save senis, tasol ol nambawan gutpela tok bilong strongim marit i kamapim oltaim ol stiatok bilong Baibel. Taim yu ritim ol dispela stori i gat 7-pela hap, ating yu bin lukim olsem ol i putim wanpela stiatok bilong Baibel antap long pes 3 i go 8. Ol kain stiatok olsem i bin helpim planti famili long kamap strong na stap amamas wantaim. Olsem ol narapela famili, sampela taim i gat hevi i painim ol. Tasol ol stiatok bilong Baibel i stap olsem strongpela as bilong marit na famili bilong ol. Na i stret Baibel i mekim olsem, long wanem, As bilong ol tok bilong Baibel, em God Jehova, em Man Bilong Kamapim famili.—2 Timoti 3:16, 17.
Traim mekim olsem. Wokim lista bilong ol ves bilong Baibel ol i kamapim antap long pes 3 i go 8. Raitim ol narapela ves bilong Baibel i bin helpim yu. Putim lista long ples yu inap painim kwik, na lukim ol dispela tok planti taim.
Pasim tok long bel. Tingting strong long bihainim ol tok bilong Baibel long famili bilong yu yet.
[Piksa long pes 8, 9]
Taim famili bilong yu i bihainim ol stiatok bilong Baibel, famili inap i stap strong maski taim nogut na hevi i kamap