Nius i Kam Long Olgeta Hap
“Ol man i ting, long 2009 planti man moa i hangre, winim olgeta taim bipo. Inap 1,020 milion manmeri i hangre long olgeta de.”—LAIN FOOD AND AGRICULTURE ORGANIZATION OF THE UNITED NATIONS, ITALI.
“Long Janueri 2009, inap 8-pela kantri i gat winim 23 300 bom nuklia.”—LAIN STOCKHOLM INTERNATIONAL PEACE RESEARCH INSTITUTE, SWIDEN.
“Ol man i salim inap 210 bilion E-meil long olgeta de long 2008.”—NIUS NEW SCIENTIST, BRITEN.
Rit Long Taim Bilong Slip
Taim papamama i ritim buk long ol pikinini bilong ol long taim bilong slip, ol i no mekim ol pikinini i slip tasol, nogat, ol i mekim sampela samting moa. Ol saveman i tok dispela i helpim ol pikinini long pasin bilong toktok, na i helpim ol long mekim gut wok long han taim ol i lainim ol long holim na tanim ol pes bilong buk, na i helpim ol long tingim gut ol samting. Nius The Guardian i tok: “Tasol bikpela samting . . . em olsem pasin bilong ritim strong em taim bilong papa o mama na pikinini long tingim gut narapela narapela na pas gut wantaim. Dispela i mekim na taim bilong rit em taim bilong amamas.” Na Profesa Barry Zuckerman husat i go pas long skelim dispela samting, em i tok: “Ol pikinini bai lain long laikim tru ol buk, long wanem, ol i ritim ol buk wantaim wanpela husat ol i laikim tru.”
Isi Long Divos
Nius El Universal i tok, nau em isi moa long divos long Mexico City. Long 2008, ol i rausim long ol lo buk bilong ol, 21 as bilong kisim divos—olsem pasin pamuk, pait na bagarapim poroman, na ol kain samting olsem. Nau man i mas putim tasol 400 dola long beng bilong ofis bilong lo, na salim long kot wanpela aplikesen em i kisim long rot bilong Intenet na i sainim pinis, na em i raitim tasol olsem em i no laikim moa poroman marit. Man i no gat wok long sanap long ai bilong jas. Man inap kisim divos insait long 2-pela i go inap 4-pela mun tasol, em bipo man i mas wet inap sampela yia. Ol inap stretim bihain ol samting olsem pikinini bai stap wantaim husat, meintenens bilong pikinini samting, tilim kago, na ol kain samting olsem.
Masin Bilong Stopim Ka
Nius The Wall Street Journal i tok: “I no gat planti man i save lusim tingting long baim fon bil bilong ol, long wanem, ol i save fon bai i no wok sapos ol i no baim bil.” Nau ol i mekim wankain samting long ol ka. Dispela nius i tok: “Ol bisnis i salim ol sekenhen ka, ol i putim masin insait long ka bilong stopim ka long stat sapos man i no bekim hariap dinau bilong em long ka.” Ol i putim dispela masin long ol waia samting bilong statim ka, na dispela masin i hap bilong kontrak ol i wokim wantaim kastama husat i baim ka long dinau na ol i ting em bai no bekim dinau hariap, na ol inap rausim dispela masin taim kastama i pinisim dinau. Tasol nius Journal i tok, wan wan taim tasol ol i gat wok long yusim masin bilong stopim ka. Lait na belo bilong givim toksave i stap long ka i mekim gutpela wok long “kirapim ol kastama long baim dinau long taim stret.”