Askim Sampela Long Helpim Yu
“Sapos birua i pait long wanpela man, ating birua inap winim em. Tasol sapos birua i pait long tupela man, ating em i no inap.”—Saveman 4:12.
TAIM yumi gat sampela bilong helpim yumi, yumi gat rot moa long winim birua—maski dispela birua em i husat o em i wanem samting. Olsem na sapos yu laik lusim smok, i gutpela sapos yu askim famili na ol pren long helpim yu—o wanpela man husat bai sambai tru long helpim yu na em i no save les kwik.
Kisim helpim long sampela em ol yet i bin lusim smok, long wanem, ol inap pilim gut hatwok bilong yu na ol inap helpim yu. Torben, wanpela Kristen long Denmak, em i tok: “Helpim mi bin kisim long ol narapela em i bikpela samting long mi.” Abraham, em i sindaun long India, i tok: “Pasin laikim tru em famili bilong mi na ol narapela Kristen i mekim i helpim mi long lusim smok.” Tasol sampela taim helpim yumi kisim long famili na ol pren em i no inap.
Wanpela man nem bilong en Bhagwandas, em i tok: “Mi bin smok inap 27 yia, tasol mi kisim save long tok bilong Baibel long ol pasin i no klin, olsem na mi wokim disisen long lusim smok. Mi traim long smok liklik tasol. Mi no bung moa wantaim ol poroman bilong mi. Na mi go lukim ol lain i save givim tok long ol man i laik lusim smok. Tasol ol dispela samting i no helpim mi. Orait, long wanpela nait mi beten long God Jehova na mi kamapim bel bilong mi long em na mi askim em long helpim mi long lusim smok. Em nau, mi lusim smok!”
Narapela bikpela samting, em yu mas redi long ol bikpela hatwok bai painim yu. Em wanem ol samting? Stori i kamap bihain long dispela bai tokaut long dispela samting.
[Blok long pes 5]
YU TING I GUTPELA LONG KISIM MARASIN?
Ol marasin bilong helpim man long lusim smok, olsem plasta i gat nikotin long en, i kamap wanpela bikpela bisnis tru we ol i kisim planti milion dola long en. Tasol paslain long kisim ol kain marasin olsem, tingim ol askim daunbilo:
Ol bai helpim yu olsem wanem? I gat planti marasin samting ol i tok em i save daunim strongpela laik bilong kisim smok. Tasol ol i no klia tumas olsem ol dispela samting bai wok gut inap longpela taim o nogat.
Ol inap mekim wanem long man? Sampela marasin i save nogutim man, olsem em i laik traut, bel hevi, na tingting long kilim i dai em yet. Na tingim tu olsem, ol samting ol i save givim olsem senis bilong nikotin, ol tu i olsem drak, na ol inap kamapim olkain sik. Olsem na man i kisim ol dispela kain samting, em i kalabus yet.
I gat wanem ol narapela helpim i stap? Wanpela lain i bin kisim save olsem, inap 88 pesen bilong ol man i bin lusim tru smok, ol i tok ol i lusim smok wantu tasol na ol i no kisim sampela marasin olsem drak bilong helpim ol.