Tok Bilong God i Gat Laip
Samting Ol i Mekim Bilong i Stap Laip
OL ISREL i stap kalabus long Isip na Fero i no laik larim ol i go, olsem na Jehova i tokim ol Isrel long kilim pikinini sipsip na penim blut bilong en long arere bilong dua bilong ol, olsem yu lukim long piksa hia. Ol i mekim olsem, na long dispela nait stret ensel bilong Jehova i raun long ol haus na kilim i dai ol namba wan pikinini man bilong ol Isip. Tasol ensel i kalapim ol haus i gat blut long dua, em haus bilong ol Isrel. Olsem na Fero i larim ol Isrel i go.
Tru, ol namba wan pikinini bilong ol Isrel i stap laip; na ol Isrel i no stap kalabus moa. Ol i go long wanpela “graun i gutpela tru na i gat planti gris.” (Eksodas 13:5, Baibel Pisin) Tasol sik i painim yet ol, na ol i go lapun na ol i dai. Sin na i dai i stap long ol.
Bihain Krais Jisas i kam long graun. Jon i givim baptais long em na Jon i tok “Lukim, em i Pikinmi Sipsip Bilong God. Em i tekewe sin bilong olgeta manmeri long graun.” (Jon 1:29, Nupela Testamen) Blut bilong sipsip i bin helpim ol pikinini bilong lain Isrel na ol i no bagarap. Na olsem tasol blut bilong Krais i ken helpim yumi long i stap laip. Em i winim blut bilong sipsip. Sapos yumi bilip long sakrifais bilong Krais, dispela bai tekewe sin bilong yumi. (Jon 3:16, 36) Yumi inap i stap oltaim, no ken i go lapun o sik o i dai.—Revelesen 21:4.
Jisas i kirapim wanpela kaikai bilong tingim sakrifais em i mas mekim klostu long taim em i laik i dai em i givim wanpela bret long ol aposel bilong em na i tok: “Yupela kisim na kaikai. Dispela em i makim bodi bilong mi.” Ol i kaikai pinis na nau em i kisim kap i gat wain long en na em i givim long ol na i tok: “Yupela olgeta dring long dispela. Dispela em i [makim] blut bilong mi bilong wokim kontrak. Mi kapsaitim bilong tekewe sin bilong planti manmeri.” Na Jisas i tok: “Yupela mekim olsem bilong tingim mi gen.”—Matyu 26:26-28, NT; Luk 22:19, 20, NT.
Olsem na yumi mas mekim dispela bung long olgeta yia, bilong tingim dai bilong Jisas na toktok long olsem wanem dai bilong em bai helpim lain bilong Kingdom ol bai go long heven, na ol manmeri bilong i stap long graun tu. Long Mas 29 long dispela yia Ol Witnes Bilong Jehova bai mekim dispela bung long Haus Kingdom, na ol i laik bai yu kam bung wantaim ol long dispela Memorial. Askim ol, wanem klok stret bai ol i mekim.