Yu Save Stap Bel Isi Long Sindaun Bilong Yu?

Wanem Samting Inap Helpim Yumi Long Nau?

YUMI tingim ol dispela kain kain hevi i kamap long graun olsem yumi stori pinis long en. Tasol olsem wanem? Yu inap i stap bel isi namel long ol dispela hevi? King Devit i bin raitim wanpela tok long Baibel bilong helpim yumi long i stap bel isi nau long dispela taim nogut. Em i tok: “Oltaim mi save pilim [Jehova] i stap klostu long mi, na i no gat wanpela samting i ken sakim mi. Olsem na bel bilong mi i gutpela tru, . . . Na mi no save pret liklik long wanpela samting.”—Sam 16:8, 9, Baibel Pisin.

Sapos ‘oltaim yu pilim Jehova i stap klostu long yu,’ olsem wanem dispela inap helpim yu na bai ol hevi na pret i no inap daunim yu? Orait yumi ken skelim gen ol hevi yumi stori pinis long en na yurni ken save, olsem wanem tok bilong Jehova inap helpim yumi.

Sapos long olgeta de yu bihainim lo bilong Jehova long Baibel, dispela bai helpim yu taim yu laik kisim wanpela wok. Taim man i bihainim lo bilong God em i save givim bel long mekim wok bilong bos na em i wok strong, na em i no les o stil long ples wok bilong em. Long wanem, Baibel i tok: “Stilman i no ken stil moa. Nogat. Nau em i mas wok. Em i mas mekim gutpela wok long han bilong em yet, na bai em i gat samting bilong givim long man i sot long samting.” (Efesas 4:28, NT) Ol bos i gat gutpela tingting ol i laik painim wokman i save mekim gut wok bilong ol, Olsem na maski i no gat planti wok nau long dispela taim, tasol ating Kristen tru i no ken hatwok tumas long painim wanpela wok.

Na sindaun bilong Kristen i save helpim em taim pe bilong ol samting i go antap. Long wanem, Kristen i save tingim gut sindaun bilong em na i skelim gut mani bilong em. Em i no tromoi mani bilong em long smok na laki na planti dring na ol marasin i save longlongim tingting, olsem drak. Na em i no save baim ol gutpela gutpela bilas samting i gat bikpela pe bambai em i ken hambak long bikpela kago bilong em. Nogat. Em i save pinis, “olgeta pasin bilong man bilong graun, em pasin bilong bel kirap na aigris na bikhet, ol dispela i no kam long Papa [God]. Nogat. Em i kamap long pasin bilong graun.”—1 Jon 2:16, 17, NT.

Tasol olsem wanem pasin bilong Kristen inap helpim em long dispela taim nogut bilong bagarapim man na stil samting? Baibel i tok: “Yu no ken wokabaut long rot bilong ol man nogut, na yu no ken bihainim pasin bilong ol. Yu mas abrusim tru dispela rot na go i stap longwe long en.” (Provep 4:14, 15, Baibel Pisin) Kristen i save bihainim dispela tok na em i abrusim ol rot na ples ol raskol na ol man nogut i save wokabaut o bung long en na em i abrusim ol ples i gat pait samting long en. Na em i no save poromanim ol man i gat tingting long mekim ol pasin nogut na pait samting.

Tru planti Kristen i rabis liklik na ol i mas sindaun long ol haus nogut. Tasol ol i save bihainim lo bilong Baibel na ol i klinim gut haus bilong ol na lukautim gut haus na mekim gut ol samting bilong en. Ol i save pinis, ol man i lotu tru long God Jehova ol i mas i stap klin long skin na long sindaun bilong ol, olsem profet Aisaia i tok: “Yupela mas i stap klin.”—Aisaia 52:11.

Ol Kristen i lain long beten olsem: “Nau yu ken givim mipela kaikai inap long dispela de.”(Matyu 6:11, NT) Taim Kristen i beten olsem, dispela i kamapim tingting bilong em, em i tingim kaikai bilong dispela wanpela de tasol, na em i no tingting planti long kaikai bilong em bilong tumora. Sapos Kristen i givim bel tru long Jehova, em i save Jehova bai lukautim em long ol samting bilong skin long olgeta wan wan de, olsem Devit i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim pikinini bilong stretpela man i sot long kaikai, na i singaut long ol arapela man bilong helpim ol. Nogat.”—Sam 37:25, Baibel Pisin.

Olsem wanem? Inap ol marit i ken abrusim o daunim ol kros na pait? Baibel tok: “Man bilong bel isi i save daunim sos bilong ol man, na ol i stap wanbel gen.” (Provep 15:18, Baibel Pisin) Na Baibel i tok: “Yupela i mas rausim olgeta pasin bilong bel nogut, na kros, na belhat, na bikmaus, na tok bilas, na olgeta pasin nogut. Yupela i mas mekim pasin isi long ol brata … Yupela mas lusim sin bilong ol.” (Efesas 4:31, 32, NT) Sapos olgeta marit Kristen i bihainim dispela tok, dispela bai helpim ol tru, a?

Planti papamama ol i tingting planti long ol pikinini bilong ol, na ol i tingting planti long pasin nogut sampela wanskul i mekim, na i strong long ol dispela pikinini tu i mas mekim. Insait long ol famili Kristen, papamama i mas skulim gut ol pikinini long bihainim ol lo bilong God na sakim ol pasin nogut. Baibel i tok, ol papamama i mas wok strong long kamap wanbel wantaim pikinini bilong ol na i stap olsem poroman tru bilong ol. Ol i mas laikim tru ol pikinini, tasol ol i mas stretim ol tu na givim gutpela tingting long ol.—Efesas 6:4; Provep 1:8.

Ol Kristen i save bilip na wetim gutpela taim i kamap bihain. Olsem na taim ol hevi bilong graun i painim Kristen, em i no bel hevi nogut tru na bel wantaim tingting i bagarap long hevi. Nogat. Em i no save kisim ol marasin olsem drak bilong helpim em long karim ol hevi. Nogat. Wanpela man bilong raitim sam em i tok: “God, yu tasol i save lukautim mi na mi stap gut. Olsem na mi no save pret long wanpela samting. Taim mi go long bet, wantu mi slip olsem daiman.”—Sam 4:8, Baibel Pisin.

Tru ol Kristen i save, inap wanpela bikpela pait moa i ken kamap long graun. Tasol ol i save, ol man i no papa bilong dispela graun. God yet em i papa bilong en. Ol Kristen i save, God i no ken larim ol man i bagarapim graun o bagarapim olgeta lain man bilong graun. Nogat. Long wanem, em i “Man bilong wokim graun … em i wokim bilong man i ken i stap long en.” (Aisaia 45:18) Olsem na God i tok promis pinis long kamapim “nupela heven na nupela graun,” bilong ol manmeri i bihainim tok bilong em. Tasol em i no ken wokim wanpela nupela graun tru na nupela skai tru. Nogat. Dispela “nupela graun” em olsem nupela pasin na lo na nupela taim bai kamap long graun. Olgeta manmeri bai lain na kisim save, na ol samting bilong spirit i as bilong ol dispela save ol i kisim, olsem profet Aisaia i tok: “Save bilong Jehova bai pulap long olgeta hap graun, olsem wara inapim ples bilong solwara.”—Aisaia 65:17; 11:9.

Tasol dispela bikpela senis bai kamap olsem wanem? Bilong wanem em i mas kamap? God bai kamapim gutaim long rot bilong ol gavman bilong graun o olsem wanem? Bai yu stap long dispela nupela taim? Kaunim ol narapela tok i kamap bihain long dispela na yu ken save long bekim bilong ol dispela askim.

[Piksa long pes 9]

Maski man i mas sindaun long haus nogut, sapos em i bihainim lo bilong Baibel em bai klinim gut haus bilong em