Ripot Long Wok Bilong Kingdom

‘Bungim Kaikai’ Long Veneswela

Wanpela taim Jisas i tok, wok bilong autim tok i wankain olsem wok bilong bungim kaikai long gaden. (Matyu 9⁠:​36-38) God Jehova i Papa bilong gaden, na planti kaikai i redi pinis long olgeta hap bilong graun. Long Veneswela tu, long ol hap ol man i no save autim tok long en long planti taim, planti kaikai i redi pinis.

Brens-ofis bilong Sosaiti Was Taua long Veneswela i salim ripot long ol samting i bin kamap taim sampela meri Witnes i go autim tok long hap bilong Sabana Grande, long Provins Huwariko. Ol Witnes i tok: “Haus mipela laik slip long en i gutpela ples bilong mekim ol miting. Olsem na wantu mipela i kirap long singautim ol man i kam long sampela miting long dispela haus. Ol man ol i no save long ol Witnes Bilong Jehova. Tru long taun i gat 4-pela misin evanjelikal, tasol ol man i gat bikpela laik long kisim save long Baibel.

“Inap 3-pela aua long moningtaim na inap 3-pela aua long belo bek mipela i go long ol haus na singautim ol man i kam long miting long apinun long de bihain. Mipela i no gat sia bilong sindaun, olsem na mipela i singautim ol long karim i kam sia bilong ol yet. Taim miting i laik kirap, nau ol manmeri i wokabaut i kam karim sia bilong ol wan wan yet. Taim miting i pinis, mipela i tokim ol manmeri olsem mipela i laik wokim wanpela lista na raitim nem bilong ol manmeri i gat laik long lainim tok bilong Baibel long haus bilong ol yet. Inap 29 manmeri i kam long dispela miting na olgeta i laik bai mipela i putim nem bilong ol long dispela lista.

“Orait, olgeta i go pinis na taim mipela i laik pasim dua mipela i lukim 3-pela man i sanap i stap klostu long kona bilong haus. Long 9 klok samting, mipela i redi long sindaun na kaikai, na nau ol dispela man i kam paitim dua. Ol i givim ol askim long mipela olsem: ‘Yu autim wanem tok long dispela taun? Bilong wanem yupela i wokim wanpela miting nau long apinun?’

“Mipela i askim ol, i gat sampela lo mipela i bin brukim o olsem wanem? Ol i tok, nogat, na ol i tok ol i pasto bilong 3-pela misin evanjelikal long dispela taun. Ol i kros, long wanem, nau long apinun, haus lotu bilong ol i stap nating. Mipela i singautim ol i kam insait na mipela i stori gut long wok bilong mipela. Mipela i tilim sampela buk bilong Baibel long ol na mipela i singautim ol i kam bek gen long Fonde bihain.

“Long Fonde bihain, ol pasto i kam bek wantaim 22 manmeri em ol i gat laik long harim ol tok bilong mipela. Ol pasto i ting, mipela i meri tasol na bai ol inap winim mipela long toktok. Tasol mipela i amamas long ol samting i kamap long dispela bung. Long pinis bilong bung mipela i tok, mipela i wokim lista bilong ol man i gat laik long lainim sampela tok moa bilong Baibel. Sampela manmeri i bin kam wantaim ol pasto i laik bai mipela i putim nem bilong ol long dispela lista, na sampela i tok ol i laik kam wantaim mipela long wok autim tok!

“Mipela i tokim ol, pastaim ol i mas kisim sampela save moa long Baibel na lain long pasin bilong mekim wok autim tok. Long olgeta de i gat sampela man i kam long haus na tokim mipela long kamapim as bilong ol tok bilong Baibel long ol. Sampela taim mipela i toktok i go inap long biknait, na nau mipela i mas tokim ol long go bek long haus bilong ol. Taim mipela i lusim dispela hap, ol manmeri i bel hevi tru na ol i tok taim mipela i kam bek lukim ol gen, bai ol i go autim tok wantaim mipela, long wanem, ol i tok promis long wok strong bambai ol inap winim ol mak bilong man i laik mekim dispela wok.”

Taim ol Witnes i lusim dispela hap, i gat 40 manmeri i gat laik long stadi long Baibel. Lista bilong ol manmeri i laik harim tok bilong Baibel ol i givim long wanpela kongrigesen i stap klostu, inap 50 kilomita samting. Bihain, sampela Witnes bilong narapela biktaun i go i stap long dispela ples na wanpela grup i kamap em ol i save givim bel long autim tok bilong Kingdom.