Em i Strong Long Holimpas Bilip
TRIPELA yia bipo, bikpela sik i painim wanpela Witnes Bilong Jehova, em Caridad Bazán Listán bilong Kadis long Spen. Kwiktaim ol dokta i mas katim em. I gat ol liklik ston insait long rop bilong bel, na dispela i wok long givim bikpela fiva long em na bagarapim blut bilong em. Ol i putim em long haus sik, na em i tokaut long ol dokta olsem em i no ken kisim blut, na em i kamapim ol tok bilong Baibel i as bilong dispela bilip bilong em. Ol dokta i orait long dispela na ol i tok ol i no ken givim blut long em. Tasol taim ol i laik kisim em i go long rum bilong katim man, ol dokta i tokim em long raitim nem bilong em long wanpela pepa. Dispela pepa i makim olsem ol dokta i orait long bihainim tok bilong em, tasol sapos em i laik bagarap taim ol i katim em, ol i laik bai em i orait long ol i mekim wanem samting ol i ting ol i mas mekim bilong helpim em.
Wanpela elda bilong kongrigesen i stap long haus sik, na pikinini man tu bilong Caridad i stap, em tu i wanpela Witnes. Tupela i tokim Caridad long tingting gut pastaim—sapos em i raitim nem bilong em long pepa, dispela bai givim rot long ol dokta na ol inap givim blut long em. Orait, taim ol nes samting i kam bilong bringim em long rum bilong katim man, em i tok em i no ken sainim dispela pepa. Ol i kisim em i go bek long rum bilong em, na nau ol dokta na nes i strong strong long em i mas senisim tingting bilong em.
Ol i toktok wantaim em i go i go, na bihain ol i singautim wanpela jas i kam bilong subim em long senisim tingting. Jas i mekim mekim, nogat. Caridad i tokim em, sapos em i larim ol i givim blut long em, bai em i gat asua long ai bilong God. Em i tok, long Lo bilong Moses, sapos wanpela man i holim meri na repim em, meri i no gat asua sapos em i singaut singaut long ol man i kam helpim em. (Lo 22:23-27) Em i tok, “Ol dokta i sakim laik bilong mi na ol i laik bai mi mekim samting em bel bilong mi i gat tok long en, olsem na mi mas strong long sakim ol, olsem man i laik repim mi.”
Sampela aua i go pinis na nau ol dokta i orait long katim em na i no ken givim blut long em. Taim ol i redi long katim em, em i tok em i laik beten long Jehova pastaim. Em i mekim olsem na ol i katim em na i no gat wok long blut.
Tasol bihain sik bilong em i go nogut na ol dokta i pasim tok olsem ol bai givim blut long em, maski em i no laik kisim. Olsem na wanpela dokta na nes i redim ol samting bilong givim blut long em. Skin bilong em i no gat strong moa, tasol long liklik hap strong i stap yet em i wok long sakim dispela blut, na em i kaikaim dispela gumi em blut i mas ran long en. Em i mekim mekim na bihain dokta i sem long dispela samting ol i mekim long em. Em i tok, “Mi no inap mekim moa. Maski! Mi lus pinis!”
Caridad i no bagarap—em i winim dispela sik na skin bilong em i orait. Ol dokta na nes i kirap nogut long strongpela bilip na strongpela bel bilong em. Dispela samting i bin kamap taim Caridad i gat 94 krismas.